പുരാണം.

കൊഞ്ചിക്കുഴയേണം കൂട്ടമുണ്ടാവേണം
കണ്ടതു മിണ്ടാതെ കണ്ണടച്ചീടേണം.

ലിങ്കു കൊടുക്കേണം വാതിലിൽ മുട്ടേണം
കുട്ടുകാർക്കു മാത്രമായൊതുങ്ങേണം.

ചെങ്ങായി പെറ്റൊരു ചവറിനു ലൈക്കിനായ്
ആളെ വിളിക്കുവാൻ ഗ്രൂപ്പിൽ നിരങ്ങേണം.

കേമൻമാരോടെന്നും അസൂയ മൂത്തിടേണം.
വാരിക്കുഴിക്കുമേൽ പുഞ്ചിരി വിതറണം.

ആർക്കാനുമൽപ്പം പ്രശസ്തിയുണ്ടായെന്നാൽ
ഞാനാണ് കേമിന്ന് മേനി പറയേണം

ഗ്രൂപ്പുവിടുമെന്നുറക്കെ കരയേണം
നെഞ്ചത്തടിക്കേണം നിലവിളിച്ചിടണം.

ഗ്രൂപ്പിനുള്ളിലായൊരു ഗ്രൂപ്പും ചമക്കേണം
കുട്ടിക്കുരങ്ങൻമാർ കൂട്ടിനുണ്ടാവേണം.

പരദൂഷണങ്ങളായെത്തും പലവിധം
ചിരിച്ചുകൊഞ്ചി ചതിച്ചു കൊല്ലുന്നവർ.

വായനക്കൂട്ടത്തിൽ കെട്ടുപോവുന്നെത്ര
ഊതി ഉരുക്കഴിച്ച മാണിക്യങ്ങൾ.

നെഞ്ചിൽ പതിപ്പിച്ചു പകുത്തൊരാ സൃഷ്ടിയെ
കണ്ടിട്ടും കാണാത്ത ഭാവം നടിക്കുന്നോർ.

വരികൾക്കിടയിൽ നിൻ മുഖം കണ്ടെന്നാൽ
കുറ്റം നിനക്കാണ് വരിക്കല്ലെന്നോർക്കണം.

ബാബു തുയ്യം.