മിനിക്കഥ : റൂം മേറ്റ്സ്.

ഞാൻ അടിച്ചതിലായിരുന്നു അവൾക്ക് ദേഷ്യം മുഴുവൻ. അടിച്ചത് മാത്രമല്ല, നിഷ്കരുണം പുറത്തേക്കിടുകയും ചെയ്തു. ആ ഒരൊറ്റ കാരണത്താൽ രണ്ടു ദിവസമാണ് എന്നോട് മിണ്ടാതിരുന്നത്. 
സ്നേഹം കൂടാൻ ചെല്ലുമ്പോഴൊക്കെ പിണങ്ങി ഒരേ ഇരുത്തം. എന്നാലും ഇത്രയ്ക്കു ദുഷ്ടയായല്ലോ എന്ന് വീണ്ടും വീണ്ടും ആവർത്തിക്കും.

അവസാനം, വളരെ വളരെ താഴ്മയോടെ ഞാൻ മാപ്പപേക്ഷിച്ചതിനു ശേഷമാണ് അവളെന്നോട് മിണ്ടിത്തുടങ്ങിയത്. ഇനി ഒരിക്കലും ആവർത്തിക്കില്ല എന്ന് സത്യം ചെയ്യുകയും ചെയ്തു.
അങ്ങനെ വീണ്ടും സ്നേഹമായപ്പോൾ അവൾ പറഞ്ഞു.

'"അമ്മ ഒന്നാലോചിച്ചു നോക്കിയേ. ആ എട്ടുകാലി പാവമല്ലെ. അതിനെ സംബന്ധിച്ച് അതിന്റെ റൂം മേറ്റ്സ് അല്ലെ നമ്മള്. 'അമ്മ ചൂലുകൊണ്ടു അതിനെ അടിച്ചു പുറത്തേക്കിട്ടപ്പോൾ അതിന്റെ മനസ്സിൽ എന്തായിരിക്കും ഉണ്ടായിട്ടുണ്ടാകുക. പാവം!!. അതിനെ നമ്മൾ അടിച്ചു പുറത്താക്കീന്നല്ലേ അത് വിചാരിച്ചിട്ടുണ്ടാവുക".

ഞാൻ വീണ്ടും നമിച്ചു.
ശരിയാ മോളെ. ഇനി അങ്ങനെ ചെയ്യില്ല. സത്യം!!!
അങ്ങനെ മൂന്നു തവണ തലയിൽ കൈ വെച്ച് സത്യം ചെയ്തപ്പോഴാണ് അവൾക്ക് സമാധാനമായത്.

By: Resmi Gopakumar