ദശാസന്ധി - പുതുവത്സരരചനാ മത്സരം- 2017- കവിത

കാലത്തിൻ ദശാസന്ധിയിൽ
മൂക വിലാപ പതിരരായലയുന്നു
സ്മരണ തൻ ബലി കുടീരങ്ങളിൽ
വിലീനമായൊരിമണ്ണിൻ്റെ മക്കൾ
നാടിനെ തമസ്സിലാഴ്ത്തിയ മാനവ -
ധ്വംസനങ്ങൾക്കെതിരിട്ടു നിന്നവർ
ചിന്തയും കർമ്മവും വിലീനരാക്കിയോർ
കാലാതിവർത്തിയാം സന്ദേശമേകിയോർ
ചോരയൂറ്റിക്കുടിക്കും അഭിനവ -
മാനവ സംസ്കാരത്തിലുത്കണ്ഡരാണിവർ
ആദർശം വിപണന തന്ത്രമാക്കിടുവോർ
വലകൾ മുറുക്കിയിരകളെ തേടവേ
തെരുവിൽ വിരിയുന്നു നിണപ്പൂക്കൾ

അശ്രു വർഷിത കിനാവുകളായിരം
അകത്തളങ്ങളെ വിഹ്വലമാക്കീടവേ
പകമൂത്ത് കൊന്നു കൊലവിളിച്ച -
ന്യോന്യം ദുരിതം വിതയ്ക്കുവോരെ
രക്തസാക്ഷിയായ് ആണിയടിച്ചവർ
വോട്ടു ബാങ്കുകൾ സൃഷ്ടിച്ചിടുമ്പോൾ
കാലാതിവർത്തിയാം ചിന്ത വിതച്ചൊരി
ദർശനപുണ്യത്തെ കാറ്റിൽ പറത്തുന്നു.
കാലത്തിൻ ദശാസന്ധിയിലങ്ങനെ -
ബലികുടീരത്തിൽ സുഷുപ്തിയിലാണ്ടൊരു
പതിരരാമാത്മാക്കൾ ഉയിരുവിട്ടുണരുന്നു.
മൂകസാക്ഷിയാമവരുടെ വിലാപം
ആർദ്ര മാനസ്സങ്ങളെ തൊട്ടുണർത്തട്ടേ
സമത്വത്തിൽ പുതുഗീതിയുയരട്ടേ
സർഗ്ഗ ശക്തിയെ തൊട്ടുണർത്തട്ടേ

By: Sabu Aroor