തിരയാം നമുക്കാതീരങ്ങളിൽ

തിരയാം നമുക്കാതീരങ്ങളിൽ,
തിരകൾ തുടച്ചൊരാകാല്പാടുകൾ ..
തിരയിട്ട കാലം കടന്നുപോയേറെ ..
തിരികെ മടങ്ങുവാനാവാത്തവർ ..
തിരികെയണയുവാൻ വെമ്പുന്ന,
തിരമാലകൾ ,നമ്മൾ ...
തീരങ്ങൾ കൈവിട്ടൊരലമാലകൾ ...

ചെറുകാറ്റിലുലയുന്ന പുതുപൂക്കളിൽ,
പുലർമഞ്ഞുചുംബിച്ച നനവൂറവേ ..
മൃദുപരാഗച്ചെപ്പുടഞ്ഞുപാറിപ്പോയ
സൗവർണ്ണ രേണുക്കളന്നുനമ്മൾ ...

പൂങ്കാറ്റുകൈവിട്ട തീരങ്ങളിൽ ശിഥില -
മോഹങ്ങളൂറും വിഷപ്പൂക്കളിൽ, ചീഞ്ഞ
ദളപുടങ്ങൾ തീർത്ത നൊമ്പരശയ്യയിൽ ,
അറിയാതെ വീണു പോയ് നമ്മൾ ....
നമ്മളറിയാതെവീണടിഞ്ഞോർ... നമ്മൾ ,
എവിടെത്തിരയേണ്ടൂ .... നമ്മളെ ...?

നിറയൗവനത്തിന്റെ നീലാംബരത്തിലെ
മഴവില്ലുമാഞ്ഞൊരാ പകൽവേളയിൽ ,
പുകമഞ്ഞിറങ്ങി ,മറഞ്ഞ പുഴയുടെ
വ്യഥിത കല്ലോലരവങ്ങളിൽ ,ആർദ്രമാം
പുലരിത്തുടുപ്പിന്റെ ചുംബനമേൽക്കാത്ത
പാതിരാപ്പൂവിന്റെ സ്വപ്നങ്ങളിൽ ...
ആയിരം നോവുകൾ പെരുമ്പറകൾ കൊട്ടും
മനസ്സിന്റെ കാണാക്കയങ്ങളിൽ...
തിരയാംനമുക്കിനി ....നമ്മളെ ...

By: Sumod Parumala