എൻ പ്രിയവാക്കുകളോട്

ഇന്നലെ ഞാൻ ഒരുക്കൂട്ടിവെച്ച
വാക്കുകൾ ഇന്നെവിടെയാണ്? 
കയ്യെത്താദൂരത്തെ കാണാമരച്ചില്ലകളിൽ
തിരഞ്ഞുപിടിക്കാനാകാതെ
ഒക്കെയും വേണമെന്ന് കരുതിവെച്ചതാണ്
എന്നിട്ടും ഓർത്തെടുത്തു അടുക്കി പെറുക്കി
കൊരുത്തെടുക്കാനാകാതെ

ഇന്നലെ അവ എന്റെ ഓർമ്മകൾക്കൊപ്പം
കളിച്ചുല്ലസിച്ചതാണ്
ഇന്നിതാ തിരികെ വേണമെന്ന
എന്റെ വാശിയിൽ മുഖം തിരിച്ചു
എങ്ങോ പോയി മറഞ്ഞിരിക്കുന്നു

ഒരുവേള ഇന്നിന്റെ നിസ്സംഗതയിൽ
അലിഞ്ഞതാകാം .
അല്ലെങ്കിൽ ഒരു കണ്ണുപൊത്തിക്കളിയിൽ
വഴുതിമാറിയതാകാം

എങ്കിലും പ്രിയവാക്കുകളെ
നിങ്ങളെന്റെ ചിന്തകൾക്ക് കൂട്ടായിരിക്കുക
ഉണർവ്വിന്റെ ഉയിരായി
അറിവിന്റെ ശക്തിയായി
ഞാനുണ്ടെന്ന ഓർമ്മപ്പെടുത്തലായ്

ഈ വഴിയരികിലൊരുകോണിൽ
തനിയെ ഇരിക്കുമ്പോൾ
വിരൽത്തുമ്പിൽ കിനിയുന്ന
സ്നേഹമായ് വന്നെന്റെ
മനസ്സിലൂടൊഴുകി കടന്നുപോയീടുക.

By: 

Anitha Nassim