ഈ അമ്മമാരൊക്കെയെന്താ ഇങ്ങനെ?

ഈ അമ്മമാരൊക്കെയെന്താ ഇങ്ങനെ?
......................................................
നേരവും കാലവും നോക്കാതെ, ആരോടും പറയാതെ ഒരൊറ്റ പോക്ക് .....

നടന്ന് നടന്ന് തേഞ്ഞു തേഞ്ഞു പതിഞ്ഞ കാലുകളുമായി,
ചുളിഞ്ഞു ചുളിഞ്ഞു വരകൾ മാത്രമായ വിരലുകളുമായി,
ഉരുകിയിയുരുകി, ഉടഞ്ഞുശുഷ്കിച്ചോരുടലുമായി,
അമ്മയെങ്ങോട്ടോ പോവുകയാണ് ..................

പശുവിനോടും ആടിനോടും കോഴിയോടും ചങ്ങാത്തം കൂടി,
പാല് വിറ്റും, മുട്ട വിറ്റും, കൂട്ടിവെച്ച ഇത്തിരി തുട്ടുകളുടെ ധൈര്യത്തിൽ ചെറിയ ചെറിയ കുറികൾ കൂടിയും,
ചാന്തും, കണ്മഷിയും, വളയും, മാലയും വാങ്ങിക്കൊടുത്തും,
മക്കളെ സ്നേഹിച്ച്‌ സ്നേഹിച്ച്‌ കൊല്ലുകയാണ് ..................

ജീവിതം മുഴുവനും ഓടിയോടിത്തളർന്ന്,
ഇടിഞ്ഞു വീഴാത്തൊരു കരയിൽ മക്കളെയെത്തിച്ച്,
നടുവൊന്നു നിവർത്താൻ കിടന്നപ്പോഴേക്കും,
എവിടെയോ പതുങ്ങി നിന്നൊരു കള്ളൻ വന്നെങ്ങോട്ടോ -
എടുത്തു കൊണ്ട് പോയ് ..... യാതൊരവശേഷിപ്പുവമില്ലാതെ!

തലേന്ന് മാറിയിട്ട എണ്ണയും തൈലവും വിയർപ്പും മണക്കുന്ന വസ്ത്രമൊഴികെ
വേറൊന്നുമില്ല!!!
നെഞ്ചോട് ചേർത്തത്, കെട്ടിപ്പിടിച്ചു പൊട്ടിക്കരയാനല്ലാതെ,
ആ സ്നേഹത്തിന്റെ, കരുതലിന്റെ, വില നിശ്ചയിക്കാനാവാതെ !!!
.......................................
അമ്മയൊന്നും കൊണ്ട് പോയില്ല.
ആറടി മണ്ണ് പോലും!!!

Resmi