തെക്കിനിയിലെ നാഗവല്ലിയുടെ കബളിപ്പിക്കൽ - 3

പരമ്പരയ്ക്കു നൽകുന്ന മികച്ച പിന്തുണക്കു നിങ്ങൾ വായനക്കാരോട് ആദ്യമേ നന്ദിപറയുന്നു.നിങ്ങളുടെ പ്രോത്സാഹനങ്ങളും വിമർശനങ്ങളും ഉൾകൊണ്ടാണ് ഈ പരമ്പര മുൻപോട്ടുപോകുന്നത്. ആയതിനാൽ തെറ്റുകൾ ഉണ്ടെങ്കിൽ ചൂണ്ടികാണിക്കുക

ചിത്രത്തിൽ സണ്ണി ഗംഗയിലെ ചിത്തരോഗിയോട് സംസാരിക്കുകയും അപ്പോൾ നകുലനെ ദുർഗ്ഗാഷ്ടമിക്കു കൊല്ലുമെന്ന് പറഞ്ഞിട്ട് പോകുന്ന രംഗത്തെ കുറിച്ച് ധാരാളം പേര് ഉന്നയിച്ച സംശയത്തിനുള്ള ഉത്തരമാണ് ഇന്നത്തെ പോസ്റ്റ്.

സംശയം ഇതാണ് , അങ്ങനെയെങ്കിൽ അവസാനം തെക്കിനിക്കുള്ളിൽ നിന്ന് ഗംഗ എങ്ങനെ സണ്ണികാണാതെ പുറത്തേക്കു പോയി ? കാരണം തെക്കിനിയിലേക്കുള്ള വാതിൽ കുറ്റിയിട്ടിരിക്കുവായിരുന്നല്ലോ മാത്രവുമല്ല ആ രംഗം കഴിഞ്ഞു സണ്ണി തെക്കിനി തുറക്കുമ്പോൾ അവിടെ മറ്റൊരുവാതിൽ കാണിക്കുന്നില്ലല്ലോ അപ്പോൾ പിന്നെ എങ്ങനെ നാഗവല്ലി രക്ഷപെട്ടു ? അതോ സണ്ണിയുടെ കാഴ്ചയെ പോലും ഭ്രമിപ്പിക്കുന്ന വേഗതയിൽ അവൾ രക്ഷപെട്ടോ ഇനി നാഗവല്ലി ആയതുകൊണ്ടാണോ ഇങ്ങനെ സണ്ണിയെ കബളിപ്പിക്കാൻ സാധിച്ചത് ? മാത്രമല്ല അവൾക്കു അമാനുഷിക ശക്തി ഉണ്ടെങ്കിൽ ആ വാതിൽ നിഷ്പ്രയാസം തുറക്കുവാൻ കഴിയുമായിരുന്നില്ലേ എന്നിങ്ങനെ ഉള്ള കുറെ സംശയങ്ങൾ ഉന്നയിച്ചിരുന്നു.

അപ്പോൾ ഒരു സുഹൃത്ത് ഇതിനുള്ള കാരണമായി പറഞ്ഞത് ഒന്നുകിൽ ഗംഗ ബോധം കേട്ട് തെക്കിനിയിൽ തന്നെ കിടപ്പുണ്ടായിരിക്കാം അത് നമ്മളെ കാണിക്കുന്നില്ല എന്നേയുള്ളൂ എന്നും അതല്ലെങ്കിൽ തെക്കിനിയിലെ ജനാല വഴി രക്ഷപെട്ടിരിക്കാമെന്നും പറഞ്ഞു കാരണം ആ സമയം നാഗവല്ലിയായതുകൊണ്ടു അതിനു കഴിയുമെന്നും അദ്ദേഹം പറയുകയുണ്ടായി .അപ്പോഴാണ് എനിക്കും ഈ സംശയം തോന്നിയത് എന്നാൽ പിന്നെ ഇതിനുള്ള ഉത്തരം തന്നാവട്ടെ ഇന്നത്തെ പോസ്റ്റ് എന്ന് വിചാരിച്ചു .

ഇവിടെ ആദ്യം തന്നെ നമ്മൾ മനസ്സിൽ ആകേണ്ടത് ഗംഗയിൽ നാഗവല്ലിയുടെ പ്രേതം അല്ല അത് ഗംഗയുടെ അബോധമനസ്സു ആണെന്നാണ്. ഇവിടെ അമാനുഷികമായി ഒന്നും നടക്കുന്നില്ല എന്ന് മനസ്സിൽ ആക്കുക . ഇവിടെ ഗംഗക്കുള്ള കായികശക്തിയെ നാഗവല്ലിക്കും ഉള്ളൂ . അപ്പോൾ വാതിൽ തള്ളിതുറക്കാമായിരുന്നില്ലേ എന്ന ചോദ്യത്തിനുള്ള ഉത്തരം കിട്ടിയെന്നു വിചാരിക്കുന്നു.

ഇനി ഗംഗ അവിടെ നിന്നു എങ്ങനെ രക്ഷപെട്ടു എന്നതിനുള്ള ഉത്തരത്തിലേക്കു വരാം. ഇതിനുള്ള ഉത്തരം മനസ്സിലാക്കാൻ ആദ്യം നമ്മൾ മാടമ്പള്ളിയിലെ തെക്കിനിയെ ഒന്ന് നന്നായി നിരീക്ഷിക്കേണ്ടിവരും .അമാനുഷികമായി ഒന്നും നടക്കുന്നില്ല എങ്കിൽ അവൾ വേറെ ഏതെങ്കിലും വഴി ഉപയോഗിച്ചു എന്നത് വ്യക്തമാണല്ലോ .അങ്ങനെ ആ വഴി തേടി ഗംഗ തെക്കിനിയിൽ എത്തിയ ശേഷമുള്ള എല്ലാ സീനും അരിച്ചുപറക്കി ഉള്ള അന്വേഷണം ചെന്നെത്തി നിന്നതു ഗംഗ ആദ്യം തെക്കിനി തുറക്കുന്ന രംഗത്തിലാണ്.

ഇവിടെ ഗംഗ തെക്കിനി തുറന്ന ശേഷം അവിടുള്ള ഓരോ വസ്തുക്കളും ആശ്ചര്യത്തോടെ നോക്കുന്നത് ശ്രദ്ധിക്കുക .അപ്പോൾ ആണ് നാഗവല്ലിയുടെ ഛായാചിത്രം ഗംഗ നോക്കുമ്പോൾ ചിത്രത്തിന്റെ ഇടതു വശത്തായി ഒരു വാതിൽ യാദൃശ്ചികമായി ശ്രദ്ധയിൽ പെട്ടത് (pic1) .അതൊന്നു നോട്ട് ചെയ്ത വച്ച ശേഷം വീണ്ടും കാണാൻ തുടങ്ങി അപ്പോൾ ഗംഗ നാഗവല്ലിയുടെ ആഭരണപെട്ടികളുടെ അടുത്തേക്ക് വരുമ്പോൾ വലതു വശത്തായി മറ്റൊരു വാതിലും ശ്രദ്ധയിൽ പെട്ടു (pic2) .

ഇതിൽ നിന്ന് നമ്മൾ മനസ്സിൽ ആക്കേണ്ടത് തെക്കിനിയിൽ നിന്ന് ഗംഗക്ക് രക്ഷപെടാൻ വേറെയും വഴികൾ ഉണ്ടെന്നതാണ്
ഇനി നമ്മൾക്ക് ആദ്യം പറഞ്ഞ സീനിലേക്കു വരാം ഇവിടെ നാഗവല്ലി തിരിച്ചുപോകുമ്പോൾ ചിലങ്കയുടെ ശബ്ദം നമ്മൾക്ക് കേൾക്കാൻ കഴിയും എന്നാൽ അതിനുള്ളിലുള്ള വാതിൽ തുറക്കുന്ന ശബ്ദം നമ്മൾക്ക് കേൾക്കാൻ കഴിയുന്നില്ല .അതിൽ നിന്നും നമ്മൾക്ക് ആ വാതിൽ നേരത്തെ തന്നെ ഗംഗ തുറന്നിരുന്നു എന്ന് മനസ്സിലാക്കാം .ഇനി സണ്ണി തെക്കിനി തുറന്നു അകത്തേക്ക് കയറി എന്ത് ചെയ്യണം എന്ന ഭാവത്തിൽ നാഗവല്ലിയുടെ ചിത്രം ഇരിക്കുന്ന ഭാഗത്തേക്ക് നോക്കുന്നത് ശ്രദ്ധിക്കുക (pic3) .അതിൽ നിന്നും അതിനടുത്തുള്ള വാതിലിലൂടെയാണ് ഗംഗ രക്ഷപെട്ടതെന്നു നമ്മൾക്ക് അനുമാനിക്കാം .

ഇനി നമ്മൾക്ക് പടത്തെ ഒന്ന് റീവൈൻഡ് ചെയ്തു ആദ്യമേ തന്നെ സണ്ണി നാഗവല്ലിയുടെ പാട്ടുകേട്ട് തെക്കിനിയിൽ ചെല്ലുമ്പോൾ ഗംഗ അവിടെ നിന്ന് രക്ഷപെടുന്ന രംഗം കാണുക . അപ്പോൾ സണ്ണി തെക്കിനിയുടെ വലതു വശത്തേക്കാണ് നോക്കുന്നത്. കാരണം ഒരു വാതിൽ തുറക്കുന്ന ശബ്ദം ആ വശത്തു നിന്ന് കേൾക്കാം. അതിൽ നിന്ന് തന്നെ നമ്മൾക്ക് അവിടെ തെക്കിനിയിൽ നിന്ന് പുറത്തേക്കു മറ്റൊരു വാതിൽ കാണാനുള്ള സാധ്യത ഉള്ളതായി മനസ്സിലാക്കാം. ഇപ്പോൾ തെക്കിനിയിൽ നിന്ന് ഗംഗ എങ്ങനെ രക്ഷപെട്ടെന്നു മനസ്സിലായി കാണുമെന്നു വിചാരിക്കുന്നു.

അതിനെ പിന്തുടർന്ന് വന്ന സംശയം ആയിരുന്നു സണ്ണി എന്തുകൊണ്ട് മുൻവശത്തെ വാതിൽ കുറ്റിയിട്ട പോലെ തെക്കിനിക്കകത്തെ ഗംഗ രക്ഷപെട്ട വാതിൽ കൂടി കുറ്റിയിടാതിരുന്നത്, അങ്ങനെ ആയിരുന്നെങ്കിൽ സണ്ണിക്ക് ഗംഗയെ കണ്ടുകൂടായിരുന്നോ എന്നത്.

ഇതിനുള്ള ഉത്തരം മനസ്സിൽ ആക്കാൻ ഇവിടെ സണ്ണി പറയുന്ന വാക്കുകൾ ശ്രദ്ധിച്ചാൽ മതി " ഗംഗയുടെ ലക്ഷ്യവും സഞ്ചാര ദിശയും" മനസ്സിലാക്കാൻ കൂടി ആണ് അന്ന് രാത്രി സണ്ണി തെക്കിനിയിൽ എത്തിയത് . എന്നാൽ സണ്ണിയെ കണ്ടാൽ ഉപദ്രവിക്കാതെ ഇരിക്കാൻ ആണ് മുൻഭാഗത്തെ വാതിൽ കുറ്റിയിടുന്നത്. മാത്രവുമല്ല താൻ ഗംഗയിലെ ചിത്തരോഗിയെ മനസ്സിൽ ആക്കിയെന്നു ഗംഗ അറിയുകയും ചെയ്യരുത് . അങ്ങനെ വന്നാൽ ആ നിമിഷം ഗംഗ അതിജീവിക്കില്ല എന്ന് സണ്ണിക്കറിയാം . അതുകൊണ്ടുതന്നെ എല്ലാം കഴിഞ്ഞു തന്റെ സ്ഥിരം വഴിയിലൂടെ തന്നെ ഗംഗ പുറത്തേക്കു പോകട്ടെ എന്ന് സണ്ണി വിചാരിക്കുന്നുണ്ടാവാം. എങ്കിലേ തന്റെ ഭാവി ചികിത്സ കാര്യങ്ങൾ സണ്ണിക്ക് തീരുമാനിക്കാൻ കഴിയുമായിരുന്നുള്ളൂ .
ഇപ്പോൾ ആ സംശയം ക്ലിയർ ആയെന്നു കരുതുന്നു.

ഈ പംക്തിയിലേക്കു ചോദ്യങ്ങൾ ചോദിച്ചവർക്കും സഹായിച്ചവർക്കുമുള്ള നന്ദി രേഖപെടുത്തികൊണ്ടു നിർത്തുന്നു :)

തുടരും...