വിടമാട്ടേൻ സീനും നാഗവല്ലിയുടെ നൃത്തവും ഒരു അവലോകനം - 10

വിടമാട്ടേൻ സീനും നാഗവല്ലിയുടെ നൃത്തവും ഒരു അവലോകനം - 10

പരമ്പരക്കു നൽകുന്ന പിന്തുണക്കു നന്ദി പറഞ്ഞുകൊണ്ട് ഇന്നത്തെപോസ്റ്റിലേക്ക് വരാം :)

മണിച്ചിത്രത്താഴിലെ ഏവർക്കും പ്രിയങ്കരമായ ഭയത്തോടെ കാണുന്ന ഒരു സീനിനെ പറ്റിയുള്ള അവലോകനം ആണ് ഇപ്രാവിശ്യത്തെ പോസ്റ്റ്. അത് വേറൊന്നും അല്ല നമ്മടെ ഗംഗ നകുലന്റെ മുൻപിൽ നാഗവല്ലിയായി ആക്രോശിച്ചുകൊണ്ടു കട്ടില് പൊക്കിയിടുന്ന ആ എപിക്‌ "വിടമാട്ടേൻ "സീൻ തന്നെ . ഇതിലെ ശോഭനചേച്ചിയുടെ അഭിനയത്തെ കുറിച്ച് ഞാൻ പറഞ്ഞു നിങ്ങൾ അറിയേണ്ട കാര്യമില്ലല്ലോ . അപ്പോൾ പിന്നെ ഈ സീനിൽ ചില സൈക്കോളജിക്കൽ ആയ കാര്യങ്ങൾ ഒന്ന് അറിയാമെന്നു വിചാരിച്ചു കുറച്ചു ഫ്രണ്ട്സ്നോടും ഗൂഗിൾ അണ്ണനോടും :p ഇതിന്റെ കാര്യങ്ങൾ അന്വേഷിച്ചു .

ഇവിടെ ഗംഗ അല്ലിക്കു ആഭരണം എടുക്കാൻ പോകാൻ ഒരുങ്ങുന്ന നേരത്താണ് സണ്ണി നകുലനെ അവളോട് പോകരുതെന്ന് വിലക്കാൻ പറഞ്ഞു വിടുന്നത്. ഇവിടെ എന്തുകൊണ്ടായിരിക്കാം സണ്ണി ആ സമയം തന്നെ നകുലനെ പറഞ്ഞു വിടാൻ കാരണം ? കാരണം മറ്റൊന്നും അല്ല ആ പോക്കിൽ അല്ലിയെ അപായപ്പെടുത്താൻ ശ്രമിക്കും എന്ന് സണ്ണിക്കു വ്യക്തമായി അറിയാവുന്നത് കൊണ്ട് തന്നാണ് അങ്ങനെ ചെയ്തത്. ഇനി നമ്മൾക്ക് ആ സീനിലേക്കു വരാം ഇവിടെ ഗംഗ തുണി തിരയുന്നത് ശ്രദ്ധിക്കുക ഒരു തരം സംശയം ആ കണ്ണുകളിലും ബോഡി ലാംഗ്വേജിലും കാണാൻ സാധിക്കും . ഇതിൽ നിന്ന് ഗംഗ ആ സമയം അസ്വസ്ഥ ആയിരുന്നു എന്ന് അനുമാനിക്കാം.ഇതിൽ നിന്ന് നമ്മൾ മനസ്സിൽ ആക്കേണ്ടതു ഗംഗ ആസമയം നാഗവല്ലിയാകാൻ തുടങ്ങിയിരിക്കുന്നു എന്നാണ്.

ഈ ഒരു ഘട്ടത്തിൽ ആണ് നകുലൻ അവിടേക്ക് വന്നു ഗംഗ പോകരുതെന്ന് വിലക്കുന്നത്. സ്വാഭാവികമായും പലതും പ്ലാൻ ചെയ്തു വച്ചിരിക്കുന്ന ഗംഗ നകുലനോട് ദേഷ്യപ്പെടുന്നു. ഇനി ഇവിടെ നമ്മൾ മനസ്സിൽ ആക്കേണ്ടതു ഒരാൾ രോഷാകുലൻ ആകുമ്പോൾ അയാളുടെ ശരീരത്തിൽ ബോഡിലാംഗ്വേജിൽ ഉണ്ടാകുന്ന മാറ്റങ്ങളെ കുറിച്ചാണ് . അതായത് ദേഷ്യം വരുമ്പോളോ പെട്ടെന്ന് പ്രതികരിക്കേണ്ട ആവശ്യം വരുമ്പോളോ നമ്മളുടെ ശരീരത്തിൽ അഡ്രിനൽ ഗ്ലാൻഡ്‌സ് എന്ന് പറയുന്ന രണ്ടു ഗ്രന്ഥികൾ ഹോർമോണുകൾ ആയ അഡ്രിനാലിൻ, കോർട്ടീസോൾ എന്നീ ഹോർമോണുകൾ ഉല്പാദിപ്പിക്കും . ഈ ഹോർമോണുകൾ ചെയ്യുന്ന പ്രധാന പരിപാടികൾ ആണ് ശ്വാസോച്ഛാസം കൂട്ടുക , ഹൃദയമിടിപ്പ് കൂട്ടുക BPകൂട്ടുക മസിലുകളിലേക്കുള്ള രക്തയോട്ടം കൂട്ടുക അതുവഴി കൂടുതൽ ഊർജം അവക്ക് കൊടുക്കുക തുടങ്ങിയവ കൂടാതെ നമ്മളുടെ ശബ്ദത്തിൽ വ്യതിയാനം വരുത്താനും സാധിക്കും .അതുപോലെ ദേഷ്യപ്പെടുമ്പോൾ നമ്മളുടെ കണ്ണുകൾ വികസിക്കുകയും മുഖം വലിഞ്ഞു മുറുകുകയും ചെയ്യും . കൂടാതെ കൈകാലുകളുടെ ചലനങ്ങളിൽ അസ്വാഭാവികത ഉണ്ടാവുകയും ചെയ്യും.

ഇവിടെ നമ്മൾ ചിത്രത്തിലെ സീനിലേക്കു വന്നാൽ ഈ ലക്ഷണങ്ങൾ അക്ഷരം പ്രതി ശരിയാണെന്ന് കാണാം . ഗംഗയിലെ മനോരോഗിയിൽ കാണുന്ന ലക്ഷണങ്ങൾ എല്ലാം ബോർഡർ ലൈൻ പേഴ്സണാലിറ്റി ഡിസോര്ഡർ അഥവാ മൾട്ടിപിൾ പേഴ്സണാലിറ്റി ഡിസോർഡർ എന്ന രോഗാവസ്ഥയിൽ ഉണ്ടാവുന്നതാണ് . അതായതു ആ സീനിൽ അവളുടെ സംശയം , കണ്ണുകൾ വികസിക്കുന്നത് പെട്ടെന്നു മൂഡ് ചേഞ്ച് ആവുന്നത് കയ്യിൽ തുണി കറക്കികൊണ്ടിരിക്കുന്നത് ശ്വാസോച്ഛാസം ഉയരുന്നത് , മറ്റുഭാഷാ സംസാരിക്കുന്നതു കൈവിരലുകൾ മടക്കി വക്കുന്നത് എല്ലാം ഈ രോഗവസ്ഥയുടെ പ്രധാന ലക്ഷണങ്ങൾ ആണ്.

ഇവിടെ വരുന്ന വേറൊരു സംശയം എങ്ങനെ ആണ് ഗംഗ ആ കട്ടിൽ വലിച്ചു പൊക്കിയത് എന്നതാണ് . ഇതിനുള്ള ഉത്തരം ഗംഗ ആ സമയം നാഗവല്ലി ആണ് . ഗംഗക്കു വിലക്കപ്പെട്ട പലതും നേടിയെടുക്കാനുള്ള ഒരു വ്യക്തിതം ആയിരുന്നു ഇവിടെ നാഗവല്ലി അവൾക്കു . അതായതു ഗംഗക്കുള്ള തടസ്സങ്ങൾ ഒന്നും നാഗവല്ലിക്കില്ല എന്ന് അവൾ ശക്തമായി വിശ്വസിക്കുന്നു . അങ്ങനെ ഉള്ള ചിത്തമനസ്സു എന്തെങ്കിലും നേടണം എന്ന് വിചാരിച്ചാൽ അതിനു കഴിയും . കൂടാതെ ഈ ചിത്തമനസ്സു അവളുടെ അബോധം ആണെന്ന് കൂടി മനസ്സിൽ ആക്കുക. അബോധമനസ്സിനു ബോധമനസ്സിനെക്കാൾ ശക്തി കൂടുതൽ ആണ്. അതുകൊണ്ടു തന്നെ അവൾ ദേഷ്യപ്പെടുമ്പോൾ ആ കട്ടിൽ ഒക്കെ തന്നെ കൊണ്ട് പൊക്കാൻ സാധിക്കും എന്ന് ഉള്ള ഒരു വിശ്വാസം അബോധത്തിനു ഉണ്ട്. കൂടാതെ മുമ്പുപറഞ്ഞ ഹോർമോൺസ് വ്യതിയാനം മൂലം അവളുടെ ശക്തി അല്ലെങ്കിൽ അത് പൊക്കാൻ ഉള്ള ഊർജം ലഭിക്കുകയും ആ കട്ടിൽ നിഷ്പ്രയാസം പൊക്കുകയും ചെയ്യുന്നു. അല്ലെങ്കിൽ തന്നെ ഒരു കട്ടിൽ ഒക്കെ പൊക്കുക എന്ന് പറയുന്നത് മനുഷ്യസാധ്യമല്ലാത്ത കാര്യം ആണോ??

പിന്നീടുള്ളത് ഗംഗ അബോധാവസ്ഥയിൽ ആവുന്നതാണ് ഇതിനു കാരണം അവളുടെ മനസ്സ് അത്ര കലുഷിതം അയതും കയർത്തു സംസാരിച്ചതും അവളുടെ ഊർജം മുഴുവനും കട്ടിൽ പൊക്കിയതിലൂടെയും മറ്റും നഷ്ടപെട്ടതും കൊണ്ടും അവളെ ക്ഷീണിത ആക്കിയതാവാം .

ഇതിൽ നിന്നും അഭിനയത്തിൽ ആയാലും ഡബ്ബിങ്ങിൽ ആയാലും തിരക്കഥയിൽ ആയാലും സംവിധാനത്തിൽ ആയാലും എല്ലാം കൊണ്ടും തികഞ്ഞ ഒരു രംഗം ആയിരുന്നു ഈ സീൻ എന്ന് നമ്മൾക്ക് മനസ്സിൽ അക്കാവുന്നതാണ്. ഇതിൽ നിന്നും എത്രത്തോളം റിസേർച്ചുകൾ മധുമുട്ടവും ഫാസിൽ സാറും കൂടി നടത്തിയിട്ടുണ്ടെന്നും നമ്മൾക്ക് ഊഹിക്കാവുന്നതാണ്.

അതുപ്പോലെ തന്നെ ഈ സീനിനെ കുറിച്ച് ഉള്ള അടുത്ത സംശയം ഗംഗയിൽ നാഗവല്ലിയുടെ പ്രേതം അല്ലായെങ്കിൽ പിന്നെങ്ങനെ ഗംഗ തമിഴ് സംസാരിക്കുകയും നൃത്തം ചവിട്ടുകയും ചെയ്യുന്നു എന്നതായിരുന്നു

ഈ ചോദ്യം എന്നെയും പിടികൂടിയപ്പോൾ "എന്റെ അള്ളാ പെട്ട് " എന്ന് വിചാരിച്ചതാണ്. ഭാഗ്യത്തിന് അവിടെയും ചെറിയൊരു "കുളു " നമ്മടെ മധുമുട്ടവും ഫാസിൽ സാറും തന്നിട്ടുണ്ടായിരുന്നു :P .

ഇവിടെ നമ്മൾക്കൊന്നു സണ്ണി ഗംഗയുടെ രോഗവിവരം നകുലനോട് ടേബിൾ ലാംപ് വെളിച്ചത്തിൽ പറയുന്നത് ശ്രദ്ധിക്കുക . "രാത്രി കാലങ്ങളിൽ നൃത്തം പഠിച്ചിട്ടില്ലാത്ത ഗംഗ തമിഴ്‌ പാട്ടുപാടി നൃത്തം ചെയ്യുന്നു " . ഈ ഒരു വാചകത്തിൽ തന്നെ ഗംഗക്ക് നൃത്തം ആണ് അറിയാൻ പാടില്ലാത്തതു തമിഴ് അല്ല എന്ന് ഊഹിക്കാം .

ഇങ്ങനെ കരുതി സമാധാനിച്ചപ്പോൾ ആണ് അടുത്ത കുനുഷ്ടു ചോദ്യം വന്നത് ,

നിക്ക് നിക്ക് അപ്പൊ ഗംഗ ക്ലൈമാക്സിൽ എങ്ങനെയാണ് ഒരു മുറൈ വന്ത് പാർത്തയാ എന്ന് പാടി നൃത്തം ചെയ്യുന്നത് ... ഒന്ന് പറഞ്ഞെ ?????

ഇതിന്റെ ഗുട്ടൻസി മനസ്സിൽ ആകണമെങ്കിൽ നമ്മൾക്ക് ആ ക്ലൈമാക്സ് നൃത്തരംഗത്തിലേക്കു ഒന്നും കൂടി പോവേണ്ടിവരും . അതായതു ഗംഗ നാഗവല്ലി ആയി ഡാൻസ് കളിക്കുമ്പോൾ മിക്കവാറും ശ്രദ്ധിച്ചിട്ടുണ്ടാവും രണ്ടു കളർ ടോണിൽ ആണ് ആ പാട്ടു ചിത്രീകരിച്ചിരിക്കുന്നത് . അതിൽ ഒന്ന് നാഗവല്ലി രാമനാഥനെ അക്ഷമയോടെ കാത്തിരിക്കുന്ന ഭാഗം നോർമൽ രീതിയിലും മഹാദേവനെ രാമനാഥനായി കണ്ട ശേഷം അവരുടെ ഓർമ്മകൾ കാണിക്കുന്ന ഭാഗം ( അതായതു ഗംഗ ഹാലൂസിനേഷനിൽ ആവുമ്പോൾ ) bright ആയിട്ടുള്ള കളർ ടോണിലും ആണ് കാണിച്ചിരിക്കുന്നത് . ഇതിൽ ആദ്യം പറഞ്ഞ നോർമൽ കളർ ടോണിൽ കാണിക്കുന്നതാണ് ഗംഗയിലെ ചിത്തരോഗി കളിക്കുന്ന നൃത്തം . ഈ നൃത്തം ശ്രദ്ധിച്ചാൽ ഒരു പെർഫെക്ഷൻ ഇല്ലാത്ത രീതിയിൽ ആണ് മുദ്രകളും ചുവടുകളും അവൾ കാണിക്കുന്നത് . ഇതിന്റെ കാരണം എന്നതാ ?? യഥാർത്ഥ ഗംഗ നൃത്തം പഠിച്ചിട്ടില്ല എന്നത് തന്നെ . എന്നാൽ താൻ നേടിയ അറിവുകളും പഴമയോടും കലകളോടും ഉള്ള ഇഷ്ടക്കൂടുതലും കാരണം അവൾ കണ്ടു മറന്ന കുറച്ചു നൃത്തച്ചുവടുകൾ ഉപബോധത്തിൽ വരികയും അതും പ്രകാരം ആ സ്റെപ്സ് കളിക്കുന്നതും ആവാം .

ഇനി തമിഴ് പറയുന്നതിനും വേണമെങ്കിൽ ഒരു വിശദീകരണം നൽകാൻ സാധിയ്ക്കും അതായതു ഒരു മലയാളിക്ക് തമിഴ് വളരെ എളുപ്പത്തിൽ മനസ്സിൽ ആക്കാൻ സാധിക്കുമെന്നാണ് പറയുന്നത്. കാരണം നമ്മടെ ഭാഷയോടെ ഏകദേശം സാമ്യത വരുന്ന വാക്കുകളും അർത്ഥങ്ങളും ആണ് തമിഴിൽ ഉള്ളത് എന്നതുകൊണ്ടുതന്നെ . കൂടാതെ പണ്ടുകാലത്തെ ആൾക്കാർ തമിഴ് കലർന്ന മലയാളം ആയിരുന്നല്ലോ ഉപയോഗിച്ചിരുന്നത് . ഇവിടെ ഗംഗയെ കുട്ടിക്കാലത്തു വളർത്തിയിരുന്നവർ മുത്തശനും മുത്തശ്ശിയും കൂടിയായിരുന്നല്ലോ . ചിലപ്പോൾ അങ്ങനെയാവാം ഗംഗയിൽ തമിഴിന്റെ വിത്തുകൾ പാകിയത്. കൂടാതെ കൊൽക്കത്ത പോലെ വ്യാവസായിക നഗരത്തിൽ പല സമൂഹങ്ങൾ ഒന്നിച്ചുകഴിയുമ്പോൾ തമിഴുമായി ഇടപഴകനുള്ള സാധ്യതയും നമ്മൾ കാണണം. അതുപോലെ വായന ,പുരാവസ്തു ഗവേഷണം ഒക്കെ ആണ് ഗംഗയുടെ ഹോബി ആ വഴിയും തമിഴിനെ മനസിൽ ആക്കാൻ അവൾ ശ്രമിച്ചിരിക്കാം . പിന്നീട് അത് മുളക്കാൻ പാകത്തിൽ ഉള്ള സന്ദർഭം വന്നപ്പോൾ ( നാഗവല്ലി തമിഴത്തി ആണ് ) ഉപബോധമനസ്സു തനിക്കു ലഭ്യമായ എല്ലാ കഴിവുകളും ഉപയോഗിച്ച് തമിഴ് പറയുന്നതാകാം .

അതുമല്ലെങ്കിൽ പണ്ടത്തെ കൊട്ടാരങ്ങളിൽ പഴയകാലത്തെ സംഭവങ്ങൾ ചരിത്രങ്ങൾ എഴുത്തോലകളിൽ രേഖപെടുത്തിവക്കുന്ന രീതിയും ഉണ്ടായിരുന്നു അതിലും കൂടുതൽ തമിഴ് കലർന്ന രീതിയിൽ ആയിരുന്നു എഴുതിയിരുന്നത് എന്നാണ് അറിവ് . ഇവിടെ തെക്കിനി പൂട്ടാൻ തമ്പിയും കാട്ടുപറമ്പനും ദാസപ്പനും കൂടി വരുമ്പോൾ അവരെ പേടിപ്പിക്കാൻ എടുത്തെറിയുന്നതിൽ ഇത്തരം ഓലകളും ഉണ്ടായിരുന്നു . ഈ വഴിയും
ഗംഗക്ക് തമിഴ് പറയാൻ സാദ്ധ്യതകൾ ഉണ്ടെന്നു കാണാം .

കൂടാതെ ഇങ്ങനൊരു കാര്യത്തെ പറ്റി ചർച്ച വന്നപ്പോൾ നമ്മളുടെ ഡോക്ടർ സുഹൃത്ത് പുള്ളിയുടെ പരിചയക്കാരൻ ആയ ജസീം എന്ന സൈക്യാട്രിസ്റ് പറഞ്ഞ കാര്യം എന്നോട് പറഞ്ഞു .

അവർ രണ്ടുപേരുടെയും അഭിപ്രയപ്രകാരം " ഇത്തരം ന്യൂസ് നമ്മൾ പത്രതിലും വായിക്കുന്നതാണ് മുസ്ലിം സ്ത്രീ സംസ്കൃതം പറയുന്നു.. ബംഗാളി പറയുന്ന മലയാളി എന്നൊക്കെ
Psychiatry ഇതിനെ explain ചെയ്യുന്നത് കുറച്ചു linguistics കൂടി ചേർത്താണ്.(പുതുതായി ഒരു ഭാഷ സംസാരിക്കുന്നതിനു xenoglossy എന്ന് ആണ് പാരാസൈക്കോളജിയിൽ പറയുന്നത്.പക്ഷെ ഇത് വെറും മിഥ്യാധാരണ മാത്രം ആണെന്നും വാദിക്കുന്നവർ ഉണ്ട് ). അതായതു സംസ്കൃതത്തിൽ നിന്നാണ് മിക്ക indo-ആര്യൻ langunge കളുടെയും ഓർജിൻ .വാക്കുകൾ തമ്മിൽ തന്നെ ചില സാമ്യങ്ങൾ കാണാൻ കഴിയും.

സ്റ്റഡീസ് പറയുന്നത് ഒരു പുതിയ ഭാഷ ഒരാൾ പറയുന്നതിൽ അമാനുഷികമായി ഒന്നും ഇല്ല എന്നും ഈ ലാംഗ്വേജ്ന്റെ ബേസിക് ഇൻഫർമേഷൻ നമ്മുടെ ബ്രൈനിൽ processed ആയി ഉണ്ടെന്നും ..ആ ഉന്മാദത്തിൽ ചിലപ്പോ രോഗിയുടെ ബ്രെയിൻ decode ചെയ്തു use ചെയ്യുന്നതാരിക്കും എന്നാണ്.

എല്ല കേസുകളിലും പരസ്പര ബന്ധം ഉള്ള ഭാഷ മാത്രമേ രോഗി സംസാരികറുള്ളൂ..
അതായത് സംസ്‌കൃതം അറിയാത്ത ഒരാൾ സംസ്‌കൃതം സംസാരിക്കുമ്പോൾ സംസ്‌കൃതം മൂല ഭാഷ ആയി/അല്ല എങ്കിൽ ഏതെങ്കിലും indo-aryan language സംസാരിക്കുന്ന ആളാരിക്കും രോഗി.സിമ്പിൾ ആയി പറഞ്ഞാൽ മലയാളിക്കു തമിഴ് മനസിലാകുന്നത്തിന്റെ ഒരു കോംപ്ലിക്കേറ്റഡ് വെർഷൻ :) ".

ഈ അഭിപ്രായങ്ങളിൽ നിന്നും ഗംഗ എങ്ങനെ തമിഴ് പറഞ്ഞു എന്നും നൃത്തം ചവിട്ടി എന്നും മനസ്സിൽ ആയെന്നു വിചാരിക്കുന്നു .

അവസാനമായി ഈ പോസ്റ്റ് എഴുതാൻ സഹായിച്ച പ്രിയ സുഹൃത്ത് നമ്മടെ ഡോക്‌ടർ അരുൺ പോൾ ആലക്കലിനും റഹുമത് അസിമിനും
capitan mifune ക്കും അദ്ദേഹത്തിന്റെ സുഹൃത്ത് സൈക്യാട്രിസ്റ് ജസീമിനും നന്ദി പറഞ്ഞുകൊണ്ട് നിര്ത്തുന്നു. അപ്പോൾ അടുത്ത സംശയങ്ങൾക്ക് ഉത്തരം കണ്ടെത്തും വരേയ്ക്കും വിട . നന്ദി :)

തുടരും...

Jijo