ചില ' പത്രധർമ്മങ്ങൾ '

വാർത്തകൾ വേണം നിനക്കിന്ന്
വാശി കാട്ടി വരയ്ക്കണമാദ്യമീ
വായനക്കാരെ നടുക്കണം..!

നേരു തിരയാൻ
നേരമില്ലാതെയീ
നേദ്യമാദ്യം വിളമ്പണം

ചോരവാർന്ന് പിടയും കുരുന്നിനെ
ചിരിയോടെയൊറ്റക്കണ്ണിൽ പകർത്തണം

പുതുമണം മാറാത്ത നോട്ടിനെ
പുണർന്നിത്തിരി പ്രത്യുപകാരമായ്
പുലരിയാക്കണമീ രാവിനെ വരികളാൽ

വിശപ്പുരിഞ്ഞ മടിക്കുത്തിൻ
വഴി തിരഞ്ഞ് തളരണം

നക്ഷത്ര മന്ദിര മദാലസകൾക്കായ്
നല്ല വാക്കേറെ പിറക്കണം

പത്രധർമ്മമെന്ന പടുവൃദ്ധനെ
പടിയിറക്കി പരിഷ്കരിക്കണം
പതിനായിരമെണ്ണം കൂട്ടണം

ഗോപകുമാർ കൈമൾ
മുതുകുളം