മൗനമായ്.

മൗനം സംഗീതമാകുന്നത്
നിങ്ങളറിഞ്ഞിട്ടുണ്ടോ?

ഹൃദയം മറ്റൊന്നിനെ തൊട്ട്
കുളിർന്നു തരളിതമാകുന്നത്..?

കണ്ണിലെ പിടച്ചിലിൽ ആരവങ്ങളത്രയും
അമർന്നു മുങ്ങിപ്പോകുന്നത്..?

മറ്റാരുമറിയാതെ നാസികയിൽ
വന്നുരുമ്മുന്ന ഗന്ധം
ഉള്ളിനെ പൊള്ളിച്ചിട്ടുണ്ടോ?

ആർദ്രമൊരു നോട്ടത്തിൽ
ആവി പടർന്നു വിയർത്തിട്ടുണ്ടോ?

ചുമ്മാ ചിരിച്ചിട്ടുണ്ടോ..., പിന്നെ
ചുറ്റിനും കണ്ണോടിച്ചിട്ടുണ്ടോ?

ഉറക്കം മറന്നിട്ടുണ്ടോ? കണ്ണുകൾ
വിടർത്തി കിനാവു കണ്ടിട്ടുണ്ടോ?

ചിപ്പിക്കുള്ളിലൊരു മൺതരിയായ് ലോകം
ചുരുങ്ങിച്ചെറുതായിട്ടുണ്ടോ..

ഹൃദയം കുതിക്കുന്നത് താൻ പോലുമറിയാതിരിക്കാൻ
നിങ്ങളതിനെ വരിഞ്ഞു കെട്ടിയിട്ടുണ്ടോ?

എങ്കിൽ ...
നിങ്ങൾ പ്രണയിച്ചിട്ടുണ്ട് ...
പ്രണയം നമ്മെ പുണരുന്നതങ്ങനെയാണ്
മൗനമായ്.... മധുരമായ്....
... Surya Manu