അളിയനു കിട്ടിയ എട്ടിന്റെ പണി

"എനിക്കിവനെയങ്ങിഷ്ടപ്പെട്ടളിയാ..."

മൂന്നര വയസ്സുള്ള മകനേ എടുത്ത് പൊക്കിക്കൊണ്ട് അളിയൻ എന്നോടു പറഞ്ഞു...

"അങ്ങനെ പറഞ്ഞോർക്കൊക്കെ........... അവൻ എട്ടിന്റെ പണി കൊടുത്തിട്ടുണ്ടളിയാ..." ഞാൻ ചിരിച്ചു കൊണ്ടൂന്നി പറഞ്ഞു.

അപ്പച്ചിയുടെ മകൾ പ്രീയയുടെ വിവാഹം കഴിഞ്ഞിട്ട് ഒരു മാസമേ ആയിട്ടുള്ളൂ. ഇന്നലെ വൈകുന്നേരം അവൾ ഭർത്താവിനോടൊപ്പം "നല്ല വിരുന്ന്" വന്നതാണ് ഞങ്ങളുടെ വീട്ടിലേക്ക്. ഗൾഫുകാരനായ അളിയൻ അതിന്റെ പകിട്ട് കാണിയ്ക്കാൻ സർവ്വാഭരണ വിഭൂഷിതനായാണ് വരവ്. ഇടതു കൈയ്യിലെ അഞ്ചു വിരലുകളും മോതിരങ്ങൾ കൊണ്ടലങ്കരിച്ചിരിക്കുന്നു. നടുവിരലിലെ വൈരക്കല്ല് മോതിരം എന്റെ മോതിരവിരലിലെ വെളുത്ത പാടിനെ നോക്കി പരിഹസിച്ചു ചിരിച്ചതു പോലെ..?
മാല പുറത്തു കാണിക്കാൻ വേണ്ടിയെന്ന വിധം രണ്ട് ബട്ടനുകൾ തുറന്നിട്ടിരിക്കുന്നു. തുടലു പോലെയുള്ള കയറു പിരിയൻ മാലയും, വലതു കൈയ്യിലെ ഘടാഘടിയനായ ചങ്ങലയും അളിയന്റെ പ്രതാപവും, എന്റെ ഭാര്യയുടെ സങ്കടവും വലുതാക്കുന്നു.

രാത്രി കിടന്നപ്പോൾ അവൾ, എന്റെ കൺകണ്ട സാമ്പത്തീക ദൈവങ്ങളെയൊക്കെ ഒടുക്കത്തെ പ്രാക്കാണ് പ്രാകിയത്." വീട്ടിൽ സ്വർണ്ണം വച്ചിട്ടെന്തിന്..." എന്ന സാർവ്വദേശീയഗാനം ഞാനിനി വീട്ടിൽ പാടിയാൽ " ലാലേട്ടനെതിരെ " കേസ് ഫയൽ ചെയ്യുമെന്ന് പറഞ്ഞ് കുറേക്കരഞ്ഞു.
നിറയെ സ്വർണ്ണവുമായി വലതുകാൽ വച്ച് ഈ വീട്ടിലേക്ക് കയറി വന്ന അവളെ ഞാൻ ചതിക്കുകയായിരുന്നത്ര.?

തിരിച്ചടിക്കാൻ ഒരു വാക്ക് നോക്കിയിരുന്ന എനിക്ക് " ചതിച്ചു " എന്ന വാക്ക് ഒരത്യാധുനിക ആയുധമായി മാറി. അതിൽ പിടിച്ച് വേണമെങ്കിൽ, അമേരിക്കയെ പോലും ആക്രമിക്കാൻ ഞാൻ തയ്യാറായിരുന്നു.എന്നിട്ടും ഉള്ളിലുണർന്നു വന്ന ഉട്ടോപ്യൻ ഡയലോഗുകളെ പണിപ്പെട്ട് വന്ന വഴി തിരിച്ചയച്ചു. കാരണം വെള്ളിയാഴ്ച്ച ചിട്ടിപ്പൈസാ കൊടുക്കണമെങ്കിൽ ഈ പാട്ട് വീണ്ടും പാടേണ്ടി വരും.
ഇവിടെ ക്ഷമയും, സെന്റിയുമാണ് ശരണം. എല്ലാ ഭർത്താക്കൻമാരേയും പോലെ ഞാനും സെന്റിയായി....!

"ന്നാലും, പറഞ്ഞു കളഞ്ഞല്ലോ... കൂട്ടുകാരി.. നീ... ഞാൻ ചതിച്ചൂ... ന്ന് "

"എടാ അളിയാ... എന്റെ സ്വൊര്യ ജീവിതം തകർത്ത നിന്നോട് ദൈവം ചോദിച്ചോളും....." എന്നു മനസ്സിൽ പറഞ്ഞ്, അൽപം തുപ്പൽ വിരലാൽ തോണ്ടിയെടുത്ത് കൺപീലികളിൽ പുരട്ടി...!

അവൾ മൈൻഡു പോലും ചെയ്തില്ല.
അങ്ങനെ ആ രാത്രിയും അവസാനിച്ചു.
..................................................................

രാവിലെ കുളി കഴിഞ്ഞ് വന്നപ്പോൾ അളിയനും, പ്രീയയും കൂടി സ്വീകരണമുറിയിൽ ഒരുമിച്ചിരുന്നു പത്രം വായിക്കുന്നു. മകൻ ഇൻറ്റർനാഷണൽ വഴക്കാളിത്തരവുമായി കൂടെയുണ്ട്.
അവർ വായന നടത്തുന്ന പത്രത്തിൽ അവൻ കൈ കൊണ്ട് തല്ലുകയാണ്. ആദ്യമൊക്കെ അളിയനൊരു രസം തോന്നി... പിന്നെപ്പിന്നെ അത് പ്രീയയുടെ കണ്ണുരുട്ടലായ് മാറി..! എന്തു ഫലം...? അവൻ കൂടുതൽ ആക്രമണകാരിയായി മാറി...

"ടാ..."!!!! ഞാൻ ഒറ്റ അലറൽ....
അവൻ ഒറ്റയോട്ടം അടുക്കളയിലേക്ക്... അളിയനും പേടിച്ചു പോയി എന്ന് വ്യക്തം. പ്രീയക്ക് പിന്നെ നേരത്തെ മുതലെ എന്റെ സ്വഭാവം അറിയാമല്ലോ..?

"അളിയാ.... കുട്ടികളെയിങ്ങനെ ഭയപ്പെടുത്തരുത്.. അതവരുടെ മാനസീക നിലയെ ബാധിക്കും. തന്നെയുമല്ല കുട്ടികളോട് വളരെ സോഫ്റ്റായി മാത്രമെ പെരുമാറാവൂ... അവൻ കളിച്ചു വളരട്ടെ.......!"

സ്വീകരണമുറിയിലിരുന്ന പൂച്ച ദയനീയമായി എന്നെ നോക്കി... ഇനീ അവനെ കൂടുതൽ കളിക്കാൻ വിട്ടാൽ എന്റെ കഴുത്ത്....? എന്നാണാ നോട്ടത്തിനർത്ഥം..!

കഴിഞ്ഞയാഴ്ച്ച അയൽപക്കത്തെ ചേച്ചി സ്നേഹത്തോടെ അവനെ എടുത്തു കൊണ്ടു പോയതും, കക്കൂസ് കഴുകുന്ന ലോഷൻ അവനെടുത്ത് കിണറ്റിലിട്ടതും, ചേച്ചിയും, ചേച്ചിയുടെ മകളും കൂടി നിസ്സാരമായി മൂന്ന് മണിക്കൂർ നിർത്താതെ മോട്ടറടിച്ച് വെള്ളം വറ്റിച്ചതും, കൊണ്ടുപോയ സാധനം അതിലേറെ സ്നേഹത്തോടെ തിരിച്ചു കൊണ്ടുത്തന്നതും അഭിമാനത്തോടെ ഓർത്തു പോയി...!

ഞാനൊന്നും മിണ്ടിയില്ല. വിധിയെ തോൽപ്പിക്കാൻ വില്ലേജോഫീസർ വിചാരിച്ചാൽ പറ്റുമോ...? എന്ന ഭാവത്തിൽ ഒരുങ്ങാൻ പോയി.

"കൊച്ചേ.... എടീ.. നിങ്ങള് ഒരാഴ്ച്ച കഴിഞ്ഞു പോയാ മതി.. കേട്ടോ.."

ജോലിക്കു പോകാനൊരുങ്ങിയെത്തിയ ഞാൻ എല്ലാ ഗൃഹനാഥൻമാർ പറയുന്നതുപോലെ വിരുന്നുകാരിയോട് പറഞ്ഞു . ഒപ്പം പറയുന്നതു പോലെ അനുസരിക്കുമോ എന്നു ഭയപ്പെടുകയും ചെയ്തു.

"അമ്പലത്തിലെ ഉത്സവമൊക്കെ കഴിഞ്ഞിട്ട് പോയാ മതി.... ഇന്നാണ് ഘോഷയാത്ര... " ഏതോ ഒരു വഴി രംഗപ്രവേശനം ചെയ്ത അമ്മ ശവപ്പെട്ടിയിൽ അവസാനത്തെ ആണിയുമടിച്ചു.

" അതേ... സുമൂ... നമുക്ക് രണ്ടീസം കഴിഞ്ഞു പാം...? ഇവിടുത്തെ അമ്പലത്തിലെ ഘോഷയാത്ര ഫെയ്മസാ..... എനിക്കതൊന്നു കാണണോന്നുണ്ട്..?
പ്രീയ, പാതി കൊഞ്ചലോടെ അളിയനോട് പറഞ്ഞു...

"Ofcourse........" അവളുടെ കൊഞ്ചൽ കണ്ട് അളിയൻ ഫ്ലാറ്റ്.!

ഇത് കണ്ടു കൊണ്ടുവന്ന ഭാര്യ എന്നെയൊന്നു നോക്കി, ഇടതു ചുണ്ടിന്റെയറ്റം ഒന്നു വക്രിച്ചു കാട്ടി എന്റെ പുറത്ത് വിശ്രമിച്ച ബാഗിലേക്ക് ടിഫിൻ ബോക്സ് നിക്ഷേപിച്ചു.

"ഭർത്താക്കൻമാരുടെ സ്നേഹം... കണ്ട് പഠിക്ക്.. " എന്നതാണ് ആ വക്രീരിന്റെ അർത്ഥമെന്ന് ടിഫിൻ ബോക്സിന്റെ ബാഗിലേക്കുള്ള വയ്ക്കലിന്റെ ശക്തിയിൽ നിന്ന് എനിക്കറിയാനായി.

ഒരു മാസമല്ലാ.... ആയൊള്ളോ....? പൊന്നളിയൻ ഇനി എത്ര ഫ്ലാറ്റുകൾ പണിയുമോ.... എന്തോ.?

"ഇന്നെങ്കിലും നേരത്തേ വരണേ..?" ഇറങ്ങുമ്പോൾ ഭാര്യയുടെ പരിഭവം.

" ഇല്ല, സിനിമാക്ക് പോയിട്ടേ വരൂ..."
തറുതലയും പറഞ്ഞ് ബൈക്ക് സ്റ്റാർട്ടാക്കി.
.............................................................

വൈകീട്ട് ഇറങ്ങിയപ്പോൾ സമയം ഏഴ് മണി. നേരത്തെ ഇറങ്ങണമെന്ന് കരുതിയതാണ്, പക്ഷെ ഓഡിറ്റിങ് നടക്കുന്നതിനാൽ സാധിച്ചില്ല. ഇന്നു കട്ടകലിപ്പായിരിക്കും പെണ്ണുമ്പിള്ള.. ! മനസ്സിലുറപ്പിച്ചു. ഒരു പക്ഷെ എല്ലാവരും ഘോഷയാത്രക്ക് പോയിട്ടുണ്ടാവും...." ഈശ്വരാ.... കാത്തോണേ....!

വീട്ടിലേക്ക് ബൈക്ക് കയറ്റിയപ്പോഴെ ഞെട്ടി... രണ്ടു പേരും വരാന്തയിലുണ്ട്...

"ങേ.... ആരും അമ്പലത്തിൽ പോയില്ലേ..?"
ബൈക്ക് സ്റ്റാൻഡിൽ വയ്ക്കുന്നതിനിടയിൽ ഞാൻ ചോദിച്ചു...!

"ചേട്ടനെന്താ ഫോൺ വിളിച്ചിട്ടെടുക്കാത്തത്..? എത്ര തവണ വിളിച്ചു....?" ഭാര്യയുടെ ദേഷ്യം നിറഞ്ഞ ചോദ്യം...!

"ശ്ശോ".....!!! ഫോൺ ചാർജ്ജു ചെയ്യാൻ CPU വിന് മുകളിൽ വച്ചിരിക്കുന്ന കാര്യം അപ്പോഴാണോർത്തത്
ഓഫീസിലെത്തിയാൽ സൈലന്റ് മോഡാക്കുന്നതിനാൽ ആരും വിളിച്ചതറിഞ്ഞതുമില്ല. ഓഡിറ്റിങ് ടീമിന് ഫയലുകൾ എടുത്തു കൊടുക്കുന്ന തിരക്കിൽ മൊബൈലിന്റെ കാര്യം മറന്നും പോയി.

"ഫോൺ ഓഫീസിൽ ചാർജ്ജു ചെയ്യാൻ കുത്തിയിട്ടിരിക്കുവാ... എടുക്കാൻ മറന്നു പോയി.... എന്താ.. എന്തു പറ്റി.... കുഞ്ഞെന്തിയേ...?"

പേടിയോടെ, ആകാംക്ഷയോടെ ഞാൻ ചോദിച്ചു...!

"കുഞ്ഞകത്തുണ്ട്... ക്ഷീണം കാരണം ഉറങ്ങുന്നു... " താടിക്ക് കൈ കൊടുത്ത് വരാന്തയിലിരുന്ന അമ്മ പറഞ്ഞു.

" അവരെന്തിയേ.... അളിയനും, പ്രീയേം...? അമ്പലത്തിപ്പോയോ..? ഞാൻ വീണ്ടും അമ്മയോടു ചോദിച്ചു.

" ങാ.... അവരിപ്പോ തിരിച്ചു പോയി.... " അമ്മ കാൽമുട്ടിൽ കൈ ചേർത്ത്, ബദ്ധപ്പെട്ട് എഴുന്നേറ്റ് അകത്തേക്ക് നടന്നു..

" അവരു പോയോ.... എന്താടി.... എന്തു പറ്റി.. "...? എനിക്ക് ദേഷ്യം വന്നു തുടങ്ങി.

" ചേട്ടൻ ഇങ്ങോട്ടു വാ.... പറയാം...!" അവൾ ബാഗ് തോളിൽ നിന്ന് വാങ്ങി അകത്തേക്ക് നടന്നു. ഞാൻ ആശങ്കാകുലനായി പുറകേയും...!

കിടപ്പുമുറിയിലേക്ക് കയറിയയുടനെ ഭാര്യ കതക് ചാരി, എന്നിട്ടെന്റെ കൈയ്യിൽ പിടിച്ച് കട്ടിലിൽ ബലമായിരുത്തി... എന്നിട്ട് പറഞ്ഞു..

" ഇന്ന് മോനൊരു പണി കാണിച്ചു... "

" അതിൽ വെല്ല്യ പുതുമയൊന്നുമില്ലല്ലോ... ഇന്നെന്താ..?" കട്ടിലിൽ രണ്ടു കയ്യും, കാലും മലർത്തി കിടന്നുറങ്ങുന്ന കുഞ്ഞിനെ നോക്കി ഞാൻ ചോദിച്ചു.

" അതേ...... " ഭാര്യ രഹസ്യം പറയുന്നതുപോലെ ചെവിക്കരികിലേക്ക് വന്നു.

"വൈകിട്ട് സുമേഷ് ചോദിച്ചു.. അമ്പലത്തിൽ അവർ രണ്ടു പേരും കൂടിപ്പോകുമ്പോൾ കുഞ്ഞിനെക്കൂടി കൊണ്ടു പൊയ്ക്കോട്ടേയെന്ന്..., ഒത്തിരി നേരം ചോദിച്ചപ്പോൾ ഞാനും, അമ്മയും സമ്മതിച്ചു. അവന് കുസൃതിയുണ്ട്, നന്നായി ശ്രദ്ധിക്കണമെന്നും അമ്മ പറഞ്ഞു.. "
ഭാര്യ ശ്വാസമെടുക്കാനായി ഒന്നു നിർത്തി.

" എന്നിട്ട്.. "?

" വൈകിട്ടത്തെക്കിനുള്ള ആഹാരമൊക്കെയുണ്ടാക്കി, ആറ് മണിക്ക് ശേഷമാണ് ഞാനുമമ്മയും ഇറങ്ങിയത്. അപ്പോഴേക്കും ഘോഷയാത്ര അമ്പലത്തിലെത്തിയിരുന്നു. തൊഴുതതിനു ശേഷം സുമേഷ്, ഒരു കൈയ്യിൽ കുഞ്ഞിനെയുമെടുത്തു കൊണ്ട്, പ്രീയയുടെ കൈയ്യും പിടിച്ച് ഘോഷയാത്രയുടെ തിരക്കിലേക്ക് കയറി. ആൾക്കാരുടെ ഉന്തിലും, തള്ളിലും പെട്ടു നീങ്ങവെ... തൊട്ടു മുൻപിൽ പോയ സ്ത്രീ തിരിഞ്ഞു നിന്ന് സുമേഷിന്റെ കരണക്കുറ്റിക്ക് ഒറ്റയടി....!!!!!

കണ്ണു കലങ്ങിപ്പോയ സുമേഷിന്റെ മുഖത്തേക്ക് കൈ ചൂണ്ടി ആ സ്ത്രീ അലറിയത്രേ.... ?

" കുറേ നേരമായി ഞാൻ സഹിക്കുന്നു... നിന്റെ നെഞ്ചത്ത് പിടുത്തം... മേലാൽ................! ഒരു പെണ്ണിനോടും.. ഈ തോന്ന്യാസം കാണിക്കരുത്.." എന്ന്...????

"യ്യോ..." എന്റെ കണ്ണു മിഴിഞ്ഞു പോയി.. " അളിയൻ അത്തരക്കാരനാണോ...?"

" ന്റെ....... പൊന്നു ചേട്ടാ..... അതൊന്നുമല്ല കാര്യം... നമ്മുടെ കുഞ്ഞ് പിടിച്ചതാണന്നാ.. സുമേഷ് കരഞ്ഞുകൊണ്ട് പറയുന്നത്...!"

" കുഞ്ഞോ.... " ?????? എനിക്ക് ചിരിയും, കരച്ചിലും കൂടി ഒരുമിച്ച് വന്നു...!

" എന്നിട്ടവളെന്തു പറഞ്ഞു... പ്രീയ..?"

" അവളെന്തു പറയാൻ... മുഖത്ത് ചോരമയമില്ലാതെയാ അവള് തിരികെ വന്നത്. വന്നയുടനെ പോകുകയാണന്ന് പറഞ്ഞ് അവളിറങ്ങുകയും ചെയ്തു.. അവനും, പ്രീയേന്നു വിളിച്ച് പുറകെ....! അതു പറയാനാ ഞാൻ ചേട്ടനെ വിളിച്ചത്....! "

ഞാൻ വീണ്ടും മോന്റെ മുഖത്തേക്ക് നോക്കി... ഒരു ദാമ്പത്യ ജീവിതത്തിന്റെ അടിവേരു പിഴുതെടുത്തിട്ട് അവൻ നിഷ്ക്കളങ്കമായി ഉറങ്ങുന്നു...!!!

എന്തു പറയാൻ.. അല്ലങ്കിൽ തന്നെ ഇനി പറഞ്ഞിട്ടെന്തു കാര്യം.. മരണം വരെ തുമ്മാനായിരിക്കും എന്റെ വിധി...?

(അനുഭവമല്ല, കഥ മാത്രം)

© രാജേഷ്.ഡി..✍️