ആത്മാവിന്റെ ഏകാന്തത

പ്രപഞ്ചത്തിന്റെ കണ്ണാടിയിൽ
കാണുന്നു ഞാൻ എന്നെയും നിന്നെയും
നിന്റെ മുഖവും എന്റെ മുഖവും
ഒന്നാവുമ്പോൾ
നിന്റെ ഹൃദയത്തുടിപ്പുകൾ
എന്റേതും കൂടിയാവുന്നു
വേർപിരിക്കാനാവാത്ത
തീവ്രനൊമ്പരമാവുന്നു

എല്ലാം ഒന്നാണെന്നുള്ള
ഭ്രമമാകാം
ഏകാന്തപഥികയാക്കിയത്
ആത്മാവിന്റെ ഈ ഏകാന്തത
ഭൗതികതയിൽ അപ്രസക്തമെങ്കിലും
ബോധത്തിന്റെ ആരംഭം മുതൽ
ഇനി അന്ത്യം വരെയും
അറിഞ്ഞും അറിയാതെയും
അനുഭവവേദ്യമാകുന്ന
ഈ ആത്മപീഡയെ
ആവിഷ്കരിക്കാൻ
ഒറ്റ ഭാഷയേയുള്ളു
ആത്മാവിന്റെ ഭാഷ
ആവുമോ നിനക്ക്
അത് തിരിച്ചറിയാൻ ?
ഒരിക്കലെങ്കിലും

Satheedevi Radhakrishnan
8/12/2017