നാഗവല്ലിയും സണ്ണിയും പിന്നെ കോഡുകളും - ചില വ്യാഖ്യനങ്ങൾ - 9
പരമ്പരക്ക് നൽകുന്ന പിന്തുണക്കു നന്ദി പറഞ്ഞു കൊണ്ട് ഇന്നത്തെ പോസ്റ്റിലേക്ക് വരാം
ഗംഗയുടെ ഉപബോധമനസ്സു എങ്ങനെ നാഗവല്ലിയുടെതായി മാറി എന്നത് സിനിമയിൽ കാണിക്കുന്നുണ്ട് .ഇവിടെ നാഗവല്ലിയുടെ കഥ അറിഞ്ഞ ഗംഗ അതിൽ നിന്നും കണ്ടെടുക്കുന്ന ചില കോഡുകൾ അവളുടെ ഉപബോധമനസ്സിൽ പതിയുന്നതുകൊണ്ടാണ് നാഗവല്ലി എന്ന സ്വത്വം അവളെ കീഴടക്കുന്നത്.കൂടാതെ മാടമ്പള്ളിയിൽ നടക്കുന്ന എല്ലാ വിചിത്ര കാര്യങ്ങൾക്കും ഗംഗയിലെ ചിത്തരോഗിക്കുള്ള പങ്കു വ്യെക്തമാണ് . കൂടാതെ സണ്ണി അവിടെ കാണിക്കുന്ന ഓരോ ചെറിയ കാര്യങ്ങൾക്കു പോലും പല തരത്തിൽ ഉള്ള വ്യാഖ്യാനങ്ങൾ കൊടുക്കുവാൻ സാധിക്കും . അതിൽ ചിലതിനെ പറ്റിയാണ് ഇന്നത്തെ പോസ്റ്റ്.
ആദ്യമായി ഗംഗയിലെ ചിത്തരോഗി തെക്കിനിയിൽ വച്ച് പാടുന്നതിനിടയിൽ സണ്ണി അവിടേക്ക് വരുമ്പോൾ സണ്ണിയെ കിണ്ടി എടുത്തെറിയുന്നുണ്ടല്ലോ. അതിനു ശേഷം ആരാണ് എറിഞ്ഞതെന്നു നോക്കാൻ താഴേക്ക് ഇറങ്ങുമ്പോൾ ചന്തുവിനെ കാണുകയും പിന്നീട് എപിക്‌ ആയ" കിണ്ടി " സീൻ അരങ്ങേറുകയും ചെയ്യുന്നു . ചിത്രത്തിലെ നല്ലൊരു തമാശരംഗം ആയി നമ്മൾ അതിനെ കണ്ടു . എന്നാൽ വെറും തമാശരംഗമായി തള്ളി കളായാനാവുന്നതല്ല അതെന്ന് നമ്മൾ മനസ്സിലാക്കേണ്ടതുണ്ട്. ഇവിടെ എന്തുകൊണ്ടായിരിക്കും ചന്തുവാണ് ആ കിണ്ടി എറിഞ്ഞതെന്നു ഉള്ള രീതിയിൽ അവിടെ സണ്ണി സംസാരിച്ചത്. കാരണം സണ്ണി ഒരു സ്ത്രീശബ്ദം അല്ലെ കേട്ടത് കൂടാതെ ചിലങ്കയുടെ ശബ്ദവും കേൾക്കുന്നുണ്ട്.അപ്പോൾ പിന്നെ എന്തിനു ചന്തു " കിണ്ടി "ആയി ?
ഇവിടെയാണ് നമ്മൾ സണ്ണിയെ മനസ്സിലാക്കേണ്ടത് ,അതായതു ചിത്തരോഗി തന്നെ വീണ്ടും അക്രമിക്കുമോ എന്നൊരു ഭയം സണ്ണിക്കുണ്ട്. കാരണം തെക്കിനിയിൽ നിന്ന് ഓടിയ സ്ത്രീയെ കണ്ടില്ല എന്നതുകൊണ്ടുതന്നെ അവൾ തക്കം പാർത്തിരുന്നു അക്രമിക്കുമോ എന്ന് സണ്ണി ഭയക്കുന്നുണ്ടാകാം . അതുകൊണ്ടുതന്നെ ചിത്തരോഗിയല്ല കിണ്ടി എറിഞ്ഞതെന്നു കാണിക്കാൻ ചന്തുവിന്റെ സാന്നിധ്യം സണ്ണി വിദഗ്ധമായി ഉപയോഗിക്കുകയാണ് അവിടെ . അങ്ങനെ തന്റെ നേർക്കുള്ള ചിത്തരോഗിയുടെ ആക്രമണവും സംശയവും ഒഴിവാക്കാനായിരിക്കാം സണ്ണി കിണ്ടി എന്ന് ചന്തുവിനെ വിളിക്കുന്നത്.കൂടാതെ കുളത്തിൽ കുളിക്കാൻ പോകുന്ന സണ്ണി ചന്തു പെട്ടെന്ന് കുളത്തിലേക്ക് ചാടുമ്പോൾ പേടിക്കുന്നതും കൂടി ശ്രദ്ധിക്കുക .
ഇനി ഗംഗയുടെ നാടായ ഏവൂരിലേക്കു സണ്ണിയും "കിണ്ടിയും" കൂടി പോകുന്ന രംഗം നോക്കുക .ബസിൽ പോകാമെന്ന് പറയുന്ന ചന്തുവിനോട് അല്ലിയുടെ സൈക്കിളിൽ പോകാം എന്നാണു സണ്ണി പറയുന്നത്.ഇവിടെ ചിലർ ചോദിച്ച സംശയം ആരെങ്കിലും 70 km ദൂരം സൈക്കിളിൽ പോകുമോ എന്നാണ് .
ഇവിടെ ഇക്കാലത്തു പോലും സൈക്കിളിൽ ദിവസം നൂറുകണക്കിന് കിലോമീറ്ററുകൾ സഞ്ചരിക്കുന്നവർ ഉണ്ട് . കൂടാതെ ഇന്നത്തെ പോലെ ട്രാഫിക് ഒന്നും അന്ന് ഇല്ലായിരുന്നല്ലോ . എന്നാൽ എന്തുകൊണ്ടാണ് ധാരാളം സമയം ലാഭിക്കാമെങ്കിലും ബസിൽ പോകാതെ അല്ലിയുടെ സൈക്കിളിൽ തന്നെ അവർ പോകുന്നത്? ഇതിനായി സൈക്കിളിൽ തന്നെ പോകാം എന്ന് പറയുമ്പോളും ചന്തു അവിടെ നിന്ന് പോയ ശേഷവും ഒരു ഗൗരവഭാവം സണ്ണിയുടെ മുഖത്ത് വരുന്നത് ശ്രദ്ധിക്കുക.എന്തോ പ്ലാൻ ചെയ്യുന്നത് പോലെ അല്ലെ .
ഇനി അവർ എന്ത് കൊണ്ടാണ് സൈക്കിളിൽ പോകുന്നതെന്ന് അറിയാൻ അല്ലി മാടമ്പള്ളിയിലേക്കു വരുന്ന രീതി ശ്രദ്ധിച്ചാൽ മതി. സൈക്കിളിലാണ് അല്ലി അവിടേക്ക് വരുന്നത് . ഇതറിയാവുന്ന ഗംഗയുടെ ഉപബോധമനസ്സു അല്ലി മാടമ്പള്ളിയിൽ വന്നിട്ടുണ്ടെന്ന് ആ സൈക്കിൾ അവിടുള്ളതിലൂടെ അറിയുകയും അല്ലിയെ അപായപ്പെടുത്താൻ തക്കംപാർത്തിരിക്കുകയും ചെയ്യും.അതായത് സൈക്കിൾ ഒരു കോഡായി വർത്തിക്കുന്നു .ഇതറിയാവുന്ന സണ്ണി അല്ലി മാടമ്പള്ളിയിലേക്കു താനില്ലാത്തപ്പോൾ വരുന്നത് തടയാനാണ് അല്ലിയുടെ സൈക്കിളിൽ തന്നെ അത്രയും ദൂരം പോകുന്നത്.അപ്പോൾ നകുലനെ ആക്രമിക്കില്ലേ എന്നൊരു സംശയം അവിടെ ഉയരുന്നുണ്ട് . എന്നാൽ നകുലൻ ഒരു ഗവണ്മെന്റ് എംപ്ലോയ്‌ ആയതുകൊണ്ട് പകൽ സമയം മാടമ്പള്ളിയിൽ കാണാൻ സാധ്യത കുറവാണ് എന്നത് നമ്മൾ മനസ്സിലാക്കേണ്ടതുണ്ട്.കൂടാതെ ഗംഗയിൽ ചിത്തരോഗി ഉണരുവാൻ തക്കതായ എന്തെങ്കിലും കാരണങ്ങൾ വേണം . അങ്ങനുള്ള ട്രിഗറുകൾ പരമാവധി ഒഴുവാക്കിയാണ് സണ്ണി ആ യാത്ര പ്ലാൻ ചെയ്യുന്നത്.
അതുപോലെ തന്നെ ആ സമയം ചന്തു വളരെ അധികം മാനസിക വിഷമം അനുഭവിച്ചിരുന്നു എന്ന് കാണാം . കാരണം തന്റെ ചേച്ചിയെ അകാരണമായി ഭ്രാന്തിയെന്നു മുദ്രകുത്തിയത്തിൽ വളരെ അധികം പ്രയാസം ഉണ്ടായിരുന്നു അവനു. ഈ സ്ട്രെസ്സിൽ നിന്നുകൂടി ചന്തുവിനെ രക്ഷപെടുത്താൻ ആണ് അക്കാലങ്ങളിൽ കൂടുതൽ പേര് ഉപയോഗിച്ച സൈക്കിൾ യാത്ര സണ്ണി തിരഞ്ഞെടുക്കുന്നത് ,കൂടാതെ ചന്തുവിനോട് സ്വസ്ഥമായി കാര്യങ്ങൾ സംസാരിക്കാനും ഈ അവസരം വിനിയോഗിക്കാം .കാരണം തറവാട്ടിൽ സണ്ണിക്ക് ഒരാളുടെയെങ്കിലും പിന്തുണ കൂടിയേ തീരു എന്ന് സണ്ണിക്കറിയാം . ഇതിൽ നിന്നും സണ്ണിയുടെ മറ്റൊരു "സൈക്കിൾ ഓടിക്കൽ മൂവ് " ആയിരുന്നു ഈ സൈക്കിൾ യാത്ര എന്ന് നമ്മൾക്ക് അനുമാനിക്കാമല്ലോ 
അടുത്തതായി നകുലൻ ചായയിൽ വിഷം ഉണ്ടെന്നറിയുന്ന രംഗം നോക്കുക . ഇതിന്റെ രണ്ടു ചാൻസുകളെ പറ്റി നേരത്തെ തന്നെ ഒരു എപ്പിസോഡിൽ നമ്മൾ ചർച്ച ചെയ്തതാണല്ലോ .എന്തുകൊണ്ടാണ് വിഷം കൊടുത്തത്‌ എന്നതിനുള്ള പ്രാഥമികമായ ഉത്തരം എല്ലാവര്ക്കും അറിയാവുന്നതാണലോ. ആദ്യ ചാൻസ് ആയ ഗംഗയാണ് വിഷം കലർത്തിയതെങ്കിൽ വിഷം കൊടുത്തു തന്നെ നകുലനെ കൊല്ലാൻ നോക്കിയത് എന്തുകൊണ്ടാണ്?
ഇതിനുള്ള ഉത്തരം അറിയണമെങ്കിൽ ഗംഗ ഭാസുരയിൽ (kpac ലളിതേച്ചിയിൽ) നിന്ന് നാഗവല്ലിയുടെ കഥ കേൾക്കുന്ന രംഗം നോക്കേണ്ടിവരും.അതായതു നാഗവല്ലിയെ തെക്കിനിയിലിട്ടു വെട്ടികൊന്നശേഷം പിന്നീട് നാഗവല്ലി പ്രേതമായി കാരണവരെ ഓടിച്ചെന്നും മന്ത്രം ചൊല്ലിയാണ് അപ്പോൾ രക്ഷപെട്ടന്നും അവർ പറയുന്നുണ്ട് കൂടാതെ പിന്നീട് ഹോമം നടത്തി നാഗവല്ലിയെ ആവാഹിച്ചു തെക്കിനിയിൽ ബന്ധിച്ചതായും എന്നാൽ അതിനുശേഷം ശങ്കരന്തമ്പിയും "വിഷം" കഴിച്ചു ആത്മഹത്യാ ചെയ്യുകയായിരുന്നു എന്നും പറയുന്നുണ്ട്.ഇവിടെ കാരണവർ ആത്മഹത്യാ ചെയ്ത രീതി ശ്രദ്ധിക്കുക .വിഷം കഴിചാണ് ആത്മഹത്യാ ചെയ്തത്.ഇത് ഗംഗയുടെ ഉപബോധമനസ്സിൽ ഉണ്ട്.അങ്ങനെ വരുമ്പോൾ ഗംഗ കാരണവരായി കാണുന്ന നകുലനെ അല്ലെങ്കിൽ പണ്ട് തന്നിൽ നിന്ന് രക്ഷപെട്ട ശങ്കരന്തമ്പിയെ പഴയതു ഓർമ്മിപ്പിക്കാൻ കൂടിയാവണം ഗംഗ അങ്ങനെ ചെയ്തത് കാരണം വിഷം കഴിച്ച മരണവെപ്രാളം കാണിക്കുന്ന നകുലനിൽ അവൾ ആ പഴയ കാരണവരെയാണ് കാണുന്നത് എന്നത് തന്നെ.
ഇനി അന്ന് പറഞ്ഞപോലെ രണ്ടാമത്തെ ചാൻസ് ആയ സണ്ണി ആണ് വിഷക്കുപ്പി അവിടെ കൊണ്ടിട്ടതെങ്കിൽ ഈ കഥകൾ എല്ലാം സണ്ണി നേരത്തെ മനസ്സിൽ ആകിയിട്ടുണ്ടാകാം . അതിൽ നിന്ന് തന്നെ ഗംഗയിലെ ചിത്തരോഗിയെ മനസിലാക്കുവാൻ വേണ്ടി കാരണവരുടെ മരണവുമായി കണക്ട് ചെയ്യുന്ന ട്രിഗർ ആയി ആ വിഷക്കുപ്പി കണ്ടെത്തുന്നതാകാം.
അടുത്തതായി ക്ലൈമാക്സിൽ നാഗവല്ലിക്കു നകുലനെ കൊല്ലാൻ വാൾ കൊടുക്കുന്നത് ശ്രദ്ധിക്കുക ഇതെന്തുകൊണ്ടാണ് ? കാരണം നാഗവല്ലിയെ തെക്കിനിയിൽ ഇട്ടു വെട്ടികൊന്നയാളാണ് ശങ്കരന്തമ്പി അങ്ങനെ വരുമ്പോൾ ഈ കഥ അറിയാവുന്ന ഗംഗയുടെ ഉപബോധമനസ്സു ശങ്കരന്തമ്പിയെയും അതേപോലെ തന്നെ കൊല്ലാൻ നോക്കും .കൂടാതെ കഴിഞ്ഞ പോസ്റ്റുകളിൽ പറഞ്ഞിരുന്ന ദുർഗ ദേവിയുടെ മഹിഷാസുരനെ തലവെട്ടി നിഗ്രഹിക്കുന്ന പ്രതികാരരീതികൂടി കണക്കിലെടുത്തുകൊണ്ടും കൂടിയാവണം നാഗവല്ലി ഈ രീതിയിൽ പ്രതികാരം നടപ്പാക്കുന്നത്. അങ്ങനെ നാഗവല്ലിയുടെ പകയെ അടക്കാൻ ആണ് സണ്ണി വാൾ വച്ച് കൊല്ലാൻ ഉള്ള വിദ്യ അവിടെ പ്രയോഗിക്കുന്നത്.
ഇങ്ങനെ ധാരാളം ലിങ്കുകൾ ചിത്രത്തിലുടനീളം തിരക്കഥാകൃത്തായ മധുമുട്ടം നൽകിയിട്ടുണ്ട് .അതൊക്കെ നമ്മൾക്ക് വഴിയേ മനസിലാക്കാം. അപ്പോൾ അടുത്ത പോസ്റ്റ് വരേയ്ക്കും വിട നന്ദി
തുടരും ..
Jijo
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക