ജിം

വർഷങ്ങൾക്ക് മുമ്പ് അല്പം മസ്സിൽ എല്ലാം ശരീരത്തിൽ ആകാം എന്നു കരുതി ഞാൻ ജിമ്മിൽ പോകുവാൻ തീരുമാനിച്ചു. എന്തായാലും നന്നാവാൻ തീരുമാനിച്ച സ്ഥിതിയ്ക്ക് നല്ലൊരു ജിം ക്ലാസ്സ് തന്നെ തിരഞ്ഞെടുത്തു.
ഇൻസ്ട്രക്റ്റർ എന്നെ കണ്ടപ്പോൾ ചോദിച്ചു .

പെട്ടെന്ന് എന്താ ഒരു തീരുമാനം?

ഒന്നൂല്ല്യ. കുറച്ച് മസ്സിൽ ആയിക്കോട്ടെ എന്നു കരുതി.

നല്ല കാര്യം. പക്ഷെ പെട്ടെന്ന് തന്നെ ആകും എന്ന് വിചാരിക്കരുത്.
ഒരു ആറ് മാസമെങ്കിലും ആകും ഈ ശരീരത്തിൽ എന്തെങ്കിലുമൊന്ന് ആവാൻ ട്ടോ.

ധൃതിയില്ല. ആയാൽ മതി.
ഞാനും പറഞ്ഞു.

അടുത്ത ദിവസം മുതൽ രാവിലെ ഞാൻ ജിംമ്മിൽ പോയി തുടങ്ങി.
എല്ലാവരും നല്ല തടിയൻമാരും നല്ല മസ്സിൽമാൻമാരും.
പ്രായത്തിൽ മൂപ്പ് ഉണ്ടെങ്കിലും വലുപ്പത്തിൽ ശിശു ഞാനായിരുന്നു.
ആദ്യം ഒരു മാസം മെഷീനിൽ കയറാതെ ചെറിയ എക്സർസൈസ്സ് മാത്രം മതിയെന്ന് ഇൻസ്ട്രക്റ്റർ പറഞ്ഞു.

ചെറിയ എക്സർസൈസ്സുകൾ ചെയ്ത് പോരുമ്പോൾ ഒരു തൃപ്തിയും തോന്നിയില്ല. ഒപ്പം മറ്റുള്ളവരുടെ മസ്സിലുകൾ കാണുമ്പോൾ ഒരു ജാള്യതയും.

ഒരാഴ്ച കഴിഞ്ഞപ്പോൾ ഞാൻ ആരും കാണാതെ മെഷീനിൽ വെയ്റ്റ് ഇട്ട് സീറ്റിൽ ഇരുന്നു. ഹാൻഡിൽ അനക്കാൻ നോക്കിയപ്പോൾ ഒരു രക്ഷയുമില്ല.
ആകെ പാടെ മുഖം ഒന്നു കോച്ചി വലിഞ്ഞു എന്നു മാത്രം.

ഇത് കണ്ട് പെട്ടെന്ന് അവിടെ മാറി വെയ്റ്റ് എടുത്തിരുന്ന ഒരുവൻ വന്നു.

ചേട്ടനോട് ആരാ ഇത് ചെയ്യാൻ പറഞ്ഞത്.
2 മാസമെങ്കിലും കഴിഞ്ഞാലെ ഇത് ചേട്ടന് പറ്റൂ.
ഞങ്ങൾക്ക് മറ്റന്നാൾ മൽസരത്തിന് പോകുവാൻ ഉള്ളതാ.
ചേട്ടൻ ഇങ്ങനെയൊക്കെ കാട്ടിയാൽ നാളെ ക്ലബ് അവധി കൊടുക്കേണ്ടി വരും ട്ടോ. ഞങ്ങളുടെ പ്രാക്റ്റീസും മുടങ്ങും

അവർ എല്ലാവരും കൂട്ട ചിരി. ഞാൻ എന്റെ ഇല്ലാത്ത മസ്സിൽ നോക്കി ഒരു വളിച്ച ചിരി പാസാക്കി.
അന്നോടെ തീർന്നു എന്റെ ജിം ക്ലാസ്സും മസ്സിൽ മോഹവും.......

By, ഷാജു തൃശ്ശോക്കാരൻ
08/12/2017