ഇങ്ങനെയും പ്രണയങ്ങൾ

°°°°°°°°°°°°°°°°°°°°°°°°°°°°°°°°°°
അയാൾക്ക് എന്നോടു പ്രണയമായിരുന്നു. ഉത്സവരാവുകളിൽ പ്രണയം കണ്ണുകളിൽ ചാലിച്ച് അയാൾ എന്നെ നോക്കി നിൽക്കുമായിരുന്നു.എപ്പോഴോ ഞാൻ അത് തിരിച്ചറിഞ്ഞു.പക്ഷേ ഒരിക്കൽ പോലും സംസാരിച്ചിരുന്നില്ല. അടുത്തിടെ എങ്ങനെയോ എഫ് ബിയിൽ നല്ലൊരു സൗഹൃദത്തോടെ എത്തിയപ്പോൾ ഉറപ്പിച്ചു എപ്പോഴെങ്കിലും ഒരു തുറന്നു പറച്ചിൽ ഉണ്ടാവുമെന്ന്. അങ്ങനെ കുറച്ചു ദിവസങ്ങൾ ഗുഡ് മോർണിംഗും,ഗുഡ് നൈറ്റിലും ഒതുങ്ങി.

കഴിഞ്ഞ ദിവസം മനസ്സിൽ സൂക്ഷിച്ചു വച്ച പ്രണയത്തിന്റെ ഒരു തുറന്നു പറച്ചിൽ എന്നെ വല്ലാതെ അത്ഭുതപ്പെടുത്തി. കുറേ വർഷങ്ങളായി ഉത്സവകാലത്തും മറ്റുമായി എന്നെ ശ്രദ്ധിച്ചു, പ്രണയിച്ചു ആൾ പിറകെ ഉണ്ടായിരുന്നു. ഞാൻ അറിഞ്ഞത് ഒരു പക്ഷേ എന്നെ അറിയിച്ചത് ഏറെ വൈകി ആയിരുന്നു. അറിഞ്ഞപ്പോൾ എല്ലാം ഒരു തമാശ പോലെ അതിലേറെ കൗതുകത്തോടെ
ഞാൻ കേട്ടു. പിന്നെ വീണ്ടും ഞങ്ങൾ യാദൃശ്ചികമായി കണ്ടു.
എൻ്റെ നോട്ടം ചിലപ്പോൾ പ്രണയം ആണെന്ന് തെറ്റിദ്ധരിക്കുമെന്ന ഉൾ ഭീതിയിൽ ഞാൻ ശ്രദ്ധിച്ചിരുന്നില്ല.

ഒരു ചുവരിന് ഇരുവശത്തായി നിൽക്കുബോൾ അയാളുടെ നെഞ്ചിടിപ്പിൻ്റെ താളം ഞാൻ അറിയുന്നുണ്ടായിരുന്നു.
അയാൾ ജോലി ചെയ്യുന്ന കടമുറിയോടു ചേർന്നുള്ള അക്ഷയ സെൻ്ററിൽ ഒരു സർട്ടിഫിക്കറ്റ് ആവശ്യത്തിന് കൂട്ടുകാരിയുടെ കൂടെ പോയതായിരുന്നു.
ജീവിതത്തിൽ ഞാൻ അത്രയേറെ ടെൻഷൻ ആയ ദിവസം ഇല്ലായിരുന്നു. ആ ഇഷ്ടം തുറന്ന് പറഞ്ഞില്ലായിരുന്നു എൻകിൽ ഒരു സൗഹൃദ സംഭാഷണം എൻകിലും ഞാൻ നടത്തുമായിരുന്നു.ഇന്ന് അറിഞ്ഞു കൊണ്ട് അഭിമുഖീകരിക്കുവാൻ കഴിയാതെ ഞാൻ തലകുനിച്ചിരുന്നു.

എഫ് ബിയിൽ ഞങ്ങൾ ഒരുപാട് സംസാരിച്ചു.
പക്ഷേ നേരിട്ട് ഇന്നുവരെ സംസാരിച്ചില്ല.
ഇനിയും സംസാരിക്കുവാൻ കഴിയുമോ എന്ന് അറിയില്ല.

തുറന്ന് പറയപ്പെടാതെ പോയ എത്രയോ പ്രണയങ്ങൾ
ഒരാൾ അറിയാതെ അയാളെ പ്രണയിക്കുവാൻ,കാത്തിരിക്കണമെന്ന വാക്കു പോലും ഇല്ലാതെ തിരിച്ചു കിട്ടും എന്ന പ്രതീക്ഷ പോലും ഇല്ലാതെ,ഉപാധികളില്ലാതെ എങ്ങനെ പ്രണയം ഇത്രമേൽ പവിത്രമായി സൂക്ഷിക്കുവാൻ കഴിയും.

തിരിച്ചു സ്നേഹിക്കണം എന്ന വാശി ഇല്ലാതെ, ഇഷ്ടമില്ല എന്ന് പറഞ്ഞപ്പോൾ
എന്നാലും എൻ്റെ പ്രണയം അവസാനിക്കില്ല എന്ന് ഉറപ്പിച്ചു പറയുന്ന ഒരു വ്യക്തിത്വം.
പ്രണയം പെട്രോളും ,കത്തിയും ഇല്ലാതെ
അതിന്റെ പരിശുദ്ധിയോടെ കാത്തു സൂക്ഷിക്കാൻ ഇന്നും ചിലരുണ്ടെന്നത് സത്യം.

നിനക്ക് എന്നെ സ്നേഹിക്കാൻ കഴിഞ്ഞില്ലെങ്കിലും,എനിക്ക് നിന്നെ സ്നേഹിക്കുവാൻ കഴിയും.തിരിച്ചു തരുന്നുണ്ടെന്ന് ഞാൻ കരുതിക്കോളാം.

എന്ന മെസ്സേജ് വീണ്ടും വീണ്ടും ഞാൻ വായിച്ചു.
അതേ തിരിച്ചു കിട്ടണമെന്ന വാശിയിൽ നിന്നാണല്ലോ വൈരാഗ്യം ഉടലെടുക്കുന്നത്.
എന്തായാലും, വിവരവും വിവേകവും ഉണ്ട്.
എന്നത് തീർച്ചയാണ്.

ഇപ്പോഴും നല്ല സൗഹൃദ സംഭാഷണത്തിലൂടെ നല്ല സുഹൃത്തുക്കൾ ആയി ഞങ്ങൾ മാറി.

ഇഷ്ടം തുറന്നു പറയുന്നവരെ ആട്ടിയോടിക്കാനല്ല കാര്യങ്ങൾ അവരെ പറഞ്ഞു മനസ്സിലാക്കാൻ ഒന്നു ശ്രമിച്ചു നോക്കാം.പെൺകുട്ടികൾ ഒരല്പ്പം വിവേകത്തോടെ കാര്യങ്ങൾ കൈകാര്യം ചെയ്യുവാൻ ശ്രമിക്കണം.
ചിലപ്പോൾ എവിടെ നിന്നും സ്നേഹമോ,പരിഗണനയോ ലഭിക്കാതെ വളർന്നു വരുന്നവരിൽ സ്നേഹം കിട്ടാനുള്ള വാശിയുണ്ടാവാം. ഉറച്ച തീരുമാനം ശാന്തമായി തന്നെ പറയാം.

എല്ലാവരും ഒരുപോലെ ആവില്ലായിരിക്കും
ചിലരെങ്കിലും തെറ്റുകളിലേയ്ക്കും,കൊടും ക്രൂരതയിലേയ്ക്കും എത്തിപ്പെടാതിരിക്കട്ടെ.

രാജിരാഘവൻ