*കാത്തിരിപ്പിന്റെ വിരസത*

ഗിരി ബി വാരിയർ
++++++

വേഗമാവട്ടെ !
നീ കൈകൊട്ടുന്നതും
കാത്തുനിൽക്കുകയാണ് ഞാൻ..

നീ കൈ കൊട്ടുമ്പോഴേക്കും
പറന്നുവന്ന് ബലിച്ചോറ്
കൊത്തുന്നത് വിശന്നിട്ടല്ല,
കൊതിച്ചിട്ടുമല്ല ...

എന്നെ കാത്തുനിന്ന് നീ
അക്ഷമനാവുന്നത് കാണാൻ
എനിക്കു കഴിയാത്തതിനാലാണ്

കാത്തിരുപ്പ് എന്നും വിരസമത്രെ..

നീ സ്കൂളിൽ നിന്ന് വരുന്നതും,
വൈകീട്ട് കളി കഴിഞ്ഞ് വരുന്നതും,
ജോലി കഴിഞ്ഞു വരുന്നതും,
സാമ്പാർകൂട്ടിയുണ്ണാനെന്ന് പറഞ്ഞ്
അവധിയെടുത്തോടി വരുന്നതും,
ഭാര്യയും കുട്ടികളുമായി
വർഷത്തിലൊരിക്കൽ വരുന്നതും
നോക്കി കാത്തിരുന്നപ്പോഴും,
പിന്നെ നിന്റെ വരവും കാത്ത്
വ്യദ്ധാശ്രമത്തിനുമ്മറത്ത്
മാസങ്ങളോളം കാത്തിരുന്നപ്പോഴും
ആ വിരസത ഞാൻ
ഏറെ അനുഭവിച്ചതാണ്...

ഇല്ല, നീ കാത്തുനിൽക്കുന്നത്
കാണാനെനിക്കാവില്ല..
നീ കൈകൊട്ടുന്നതും
കാത്ത് ഞാൻ നിൽക്കാം.

വേഗമാവട്ടെ..
നിനക്ക് പോകാനുള്ളതല്ലേ...!
*****

ഗിരി ബി. വാരിയർ
31 ജൂലൈ 2019
©copyrights protected