ഒരു പെണ്ണുകാണൽ ഓർമ

 ഡിഗ്രി കഴിഞ്ഞു മധുര പ്രണയ വിരഹവുമായി രാമനാട്ടുകാര ട്യൂട്ടോറിയലിൽ കുട്ടികളെ കണക്കു പഠിപ്പിക്കാനെന്ന വ്യാജനെ വീട്ടീന്ന് നാട് കാണാൻ ഇറങ്ങ്യ കാലം..

വീട്ടീന്ന് മുക്കാൽ മണിക്കൂർ പോണം ബസ്സിൽ തന്നെ..

രാമനാട്ടുകാര ബസ്സിറങ്ങി ജീപ്പ് കയറി കൊളക്കൂത്ത് എന്ന സ്ഥലത്തു എത്തിയാലും പിന്നേം നടക്കണം 2 കിലോമീറ്ററോളം.. ആ നടത്തമാണ് ഏറ്റവും സുഖകരം..

നല്ല ഒന്നാന്തരം പച്ചപ്പ് നിറഞ്ഞ നാട്ടിൻപുറം..

നടവഴിക്കു രണ്ടു വശത്തും കുലച്ചു നിൽക്കണ നേന്ത്ര വാഴത്തോട്ടങ്ങൾ.. നെൽപ്പാടങ്ങൾ.. ആഹാ അന്തസ്..

അന്നത്തെ എന്റെ കോലം 45kg എല്ലു വലിച്ചു നീട്ടിയ നീളം..പൊക്കം മാത്രം ഉള്ളു..ബാക്കിയൊന്നുമില്ല.

സെന്ററിൽ സാരി നിർബന്ധം.. അല്ലേൽ എന്നെയൊക്കെ പിള്ളേർ എടി പോടീ വിളിച്ചാലോ എന്ന് കരുതിയാകും..

അമ്മയുടെ സാരി 4 എണ്ണം 'അമ്മ എനിക്കായി ഉപേക്ഷിച്ചു.( തന്നു എന്ന് പറഞ്ഞൂടാ. ഞാനുടുത്തു പാടത്തുടെയും വരമ്പിലൂടെയും നടന്നു വക്ക് പൊട്ടിച്ച, അഴുക്കാക്കുന്ന സാരി അമ്മക്ക് ഇനി വേണ്ടാന്ന് )

സാരിയുടുക്കാൻ പഠിച്ചത് രണ്ടു ദിവസം കൊണ്ടാണ്.. 'അമ്മ ഉടുപ്പിക്കാൻ വരും ആദ്യം സാരി കയ്യിൽ പിടിച്ചു ഈ കോലത്തിനു ഇതെവിടെയാ ദൈവമേ ഉടുപ്പിക്കേണ്ടത് എന്നൊരു നോട്ടമാണ്..

പിന്നെ ഉടുപ്പിക്കൽ തുടങ്ങിയാൽ ശറ പറാ ശകാരങ്ങളും.. ഇങ്ങോട്ട് തിരിയ്.. അവിടെ പിടിക്ക്.. ഇങ്ങനെ കുത്ത്..

മൂന്നാം ദിവസം ഞാൻ പറഞ്ഞു ഞാനൊറ്റക്ക് ഉടുത്തോളം 'അമ്മ പോയേന്നു.. അല്ല പിന്നെ..

'അമ്മ ഹാപ്പി..

അങ്ങനെ വലിച്ചു വാരി ചുറ്റിയ സാരിയുടുത്ത എന്നെ ജീപ്പിൽ കുത്തി നിറച്ച ആളുകളുടെ ഇടയിൽ നിന്നും ആദ്യം പുറത്തിട്ടു പിന്നെ സാരി തരുന്ന ജീപ്പ് ക്ലീനേർക്ക് നൻഡ്രി പറഞ്ഞാണ് ക്ലാസ്സെടുക്കാൻ പോകൽ..

അവിടെ കിട്ടണ മറ്റൊരു സുഖം ഇടയ്ക്കിടെ കാണുന്ന നാട്ടുകാരുടെ ടീച്ചറെ എന്നുള്ള വിളിയും, ചിരിയുമാണ്.. ഈ കോലത്തിനേം ടീച്ചർ ആയി അംഗീകരിക്കാനുള്ള ആ മനസ്സുകൾ മാസ്സാണ്..

അത്തരം ഒരു യാത്രയിലാണ് ആദ്യ പെണ്ണുകാണൽ എന്റെ സഹോദര സ്ഥാനത്തുള്ള ഒരുത്തന്റെ വക അറേഞ്ച് ചെയ്തത്. ബസ്റ്റോപ്പിൽ വെച്ചാണ് അത്. സത്യത്തിൽ എന്നോടാരും പറഞ്ഞില്ല

ഞാൻ ഒരു കൊട്ട ടീച്ചർ അഹങ്കാരവും പേറി ബസ്റ്റോപ്പിൽ നിൽക്കുമ്പോൾ അതാ ഒരു വെളുത്ത ഒരു ചുള്ളൻ നീല ഷർട്ടിട്ട്, Inside ഒക്കെ ആക്കിയത് എന്നെ ഈ സൈഡിൽ നിന്ന് നോക്കുന്നു.. തൃപ്തിയാകാതെ മറ്റേ സൈഡിൽ നിന്നു നോക്കുന്നു..

ആകെ പന്തികേട് നോട്ടം...

അത് കണ്ടു സാരി ഒന്നുടെ ചുറ്റിപ്പിടിച്ചു, വയറു കാണാതിരിക്കാൻ കുത്തിയ പിന്നൊക്കെ ഇല്ലെന്നു ഉറപ്പു വരുത്തി ഞാനും അയാളെ ഞാൻ നന്നായി ശ്രെദ്ധിച്ചു.. അന്നെന്നെ അങ്ങനാര് നോക്കാനാ?

വീട്ടിൽ എത്തിയപ്പോഴാണ് അതായിരുന്നു പെണ്ണുകാണൽ എന്ന് അറിഞ്ഞത്..

എന്തായാലും ആ കല്യാണം നടന്നില്ല.

അവനെ എനിക്കു മാത്രം ബോധിച്ചാൽ പോരല്ലോ.. ഉടലിൽ ഒരിത്തിരി ഇറച്ചി ഏതു വഴിക്കും ചുറ്റിനടന്നു കാണാഞ്ഞിട്ടാകും അയാൾ ഓടിയത്..

അയാക്കു അറിയില്ലലോ ഞാൻ ഭാവിയിൽ ഇങ്ങനെ തടിച്ചു 66kg മാസാലദോസ ആകുമെന്ന്.

#Achuhelen

നബി : അയാൾ രക്ഷപ്പെട്ടെന്ന കമന്റ് നിരോധിച്ചിരിക്കുന്നു

By: Achu Helen