ജീവിതം മടുത്ത്
എല്ലാരോടും യാത്ര പറഞ്ഞ്
ഇറങ്ങാൻ നിന്നതാ
അപ്പോഴാ കഴുകാനിട്ട
കരിപിടിച്ച പാത്രങ്ങൾ കണ്ടത്
അതവിടെ ഇട്ട് എങ്ങനെ പോകും..
കഴുകിക്കഴിഞ്ഞപ്പോൾ ഓർത്തു
മുഷിഞ്ഞ തുണികളും കുറെയുണ്ടാകും
അതും കഴുകിയിട്ടേക്കാം
പിന്നെ അരിയിട്ട്
ചോറ് വാർത്ത്
തേങ്ങാ അരച്ച കറിവച്ച്
മെഴുക്ക് വരട്ടി ഉണ്ടാക്കി
പപ്പടം വറുത്ത്
അടുക്കളയൊതുക്കി
കഴിഞ്ഞപ്പോഴേക്കും വിശന്നു
എല്ലാർക്കും കൊടുത്ത്
ചോറുണ്ട് കഴിഞ്ഞപ്പോ
വല്ലാത്തൊരു ക്ഷീണം
ഉറങ്ങാൻ കിടന്നവൾ
ഇറങ്ങിപ്പോക്ക് നാളേക്കാക്കി..
ലിസ് ലോന
No comments:
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക