നമ്പർ ബിസി

കല്യാണ നിശ്ചയം കഴിഞ്ഞയുടനെ ധനുശ്രീയും നവീനും കോൾ ചെയ്തു തുടങ്ങി .

രാത്രി മുഴുവൻ കോൾ ....

കോളോടെ കോൾ .

എപ്പൊ നോക്കിയാലും രണ്ട് പേരുടേയും ചെവിയിൽ ഫോൺ .

മുറ്റം അടിക്കുമ്പോഴും ചെവിയിൽ ഫോൺ ,നവീൻ ഡ്രൈവ് ചെയ്യുമ്പോഴും കോൾ .

ഒരിക്കൽ കഴിഞ്ഞ വർഷം കല്യാണം കഴിഞ്ഞ് ധനുശ്രീയുടെ വീടിനു അടുത്തു വന്ന സെലീന പറഞ്ഞു .

"കല്യാണം കഴിയുന്നവരെയെ ഇതൊക്കെയുള്ളൂ"

ധനുശ്രീ അതിനു മറുപടി പറഞ്ഞില്ല .

മൂന്ന് മാസം കഴിഞ്ഞപ്പോൾ ധനുശ്രീയും നവീനും തമ്മിലുള്ള കല്യാണം നടന്നു .

ഇടയ്ക്ക് വീട്ടിൽ നിൽക്കാൻ വരുന്ന ധനുശ്രീ കോളിംഗ് തുടർന്നു .

സെലീന നോക്കുമ്പോഴൊക്കെ കോൾ .

"ഇവര് ഇതുവരെ ഇതു നിർത്തിയില്ലെ" ?

സെലീന ചിന്തിച്ചു .

അവൾക്ക് ഇരിക്ക പൊറുതിയില്ലാതെയായ് ,ഒന്നു ചോദിക്കാതെ പറ്റില്ലെന്നായ് .

ഒരു ദിവസം സെലീന ധനുശ്രീയോട് ഇടിച്ചു കയറി ചോദിച്ചു .

"നിങ്ങൾ തമ്മിൽ നല്ല സ്നേഹമാണല്ലെ?"

അതെന്താ അങ്ങനെ ചോദിച്ചത് ?

ധനുശ്രീ ചോദിച്ചു .

"അല്ല "! ,ഇപ്പോഴും കോളിംഗ് നിർത്തിയില്ലല്ലൊ?

വളരെ വിഷമത്തോടെ ധനുശ്രീ പറഞ്ഞു .

"എന്റെ പൊന്നു ചേച്ചി ,ഈ കോളിംഗ് നിർത്തിയാ മതിയായിരുന്നു ,ആ മനുഷ്യനു സംശയമാ ... 24 മണിക്കൂറും വിളിച്ചു നോക്കും നമ്പർ ബിസിയാണൊ എന്നറിയാൻ ".

ഇത് പറഞ്ഞ് തീർന്നതും ധനുശ്രീയുടെ മൊബൈൽ റിംഗ് ചെയ്തു .

ഡോ റോഷിൻ