ക്രിസ്മസ് സമ്മാനം

 അയാൾ കടയടയ്ക്കാൻ തുടങ്ങുന്ന സമയത്താണ് അവൻ അകത്തേയ്ക്കു വന്നത് . വൈകുന്നേരം മുതൽ പലപ്പോഴായി അവനെ കടയ്ക്കു മുൻപിൽ അയാൾ കണ്ടതാണ് . ഏകദേശം ഒരു പതിനഞ്ചു വയസ്സിൽ താഴെ മാത്രം പ്രായമുള്ള ചെറുക്കൻ . ഇപ്പോഴത്തെ കാലത്തു ചെറിയ പിള്ളേരെ പോലും വിശ്വസിക്കാൻ പറ്റില്ല എന്നൊരു തോന്നലുള്ളത് കൊണ്ട് അയാൾ അവനെ പ്രത്യേകമായി ശ്രദ്ധിച്ചിരുന്നു . മെലിഞ്ഞ മുഖവും നീണ്ട കാലുകളും . എണ്ണമയമില്ലാത്ത നീളൻ മുടി മുഖത്തേയ്ക്കു വീണു കിടക്കുന്നു . അവൻ വന്ന സൈക്കിൾ അടുത്ത് തന്നെ ഇരിപ്പുണ്ട് . കോഴിക്കടയുടെ മുന്നിൽ ഇവനെന്തിനാണ് ചുറ്റി തിരയുന്നത് എന്നൊരു ചോദ്യം അയാളുടെ മനസ്സിൽ ഉടക്കി കിടന്നു .

ഒരുപാടു അലഞ്ഞിട്ടാണ് അയാൾക്ക്‌ ആ കോഴിക്കടയിൽ ജോലി കിട്ടിയത് . നാട്ടിൽ അത്യാവശ്യം അറിയപ്പെടുന്ന ഗുണ്ടയായ അയാൾക്ക്‌ ജോലി കൊടുക്കുവാൻ ആരും തയ്യാറല്ലായിരുന്നു . അവസാനമായി നേർച്ചപെട്ടി മോഷ്ടിക്കാൻ ശ്രമിച്ചതിനും മോഷണ ശ്രമത്തിനിടയിൽ തടയാൻ ശ്രമിച്ച പള്ളീലച്ചനെ കുത്തി പരിക്കേൽപ്പിച്ചതിനുമാണ് അയാൾ ജയിലിൽ കിടക്കേണ്ടി വന്നത് . പക്ഷെ താൻ കുത്തിയ അച്ചൻ തന്നെ ജയിലിൽ സ്ഥിരം സന്ദർശകനായപ്പോൾ അയാൾ തനിയെ മാറുകയായിരുന്നു . ആ സമയത്തു തന്നെയാണ് പല തവണ ബൈബിൾ വായിച്ചതും പിന്നീട് സ്വയം തിരുത്തി നല്ലവനായി ജീവിക്കാൻ തീരുമാനിച്ചതും . അച്ചന്റെ തന്നെ ശുപാർശയിലാണ് ഇവിടെ ജോലിക്കു കയറിയത് . ഇന്നത്തെ കൂലി അഞ്ഞൂറ് രൂപയും അര കിലോ പ്ലം കേക്കും പിന്നെ ഒരു കോഴിയുമാണ് . നാളെ ക്രിസ്തുമസാണ്‌ . നേരത്തെ കട അടച്ചു പൊയ്ക്കോളാൻ വർക്കിച്ചൻ മുതലാളി പറഞ്ഞിട്ടുണ്ട് . രാവിലെ തന്നെ കേക്ക് മേടിച്ചു തന്നിട്ടാണ് മുതലാളി പോയത് .

മുതിർന്നതിൽ പിന്നെ ഇതുവരെ ഒരു വിശേഷ ദിവസവും വീട്ടിൽ ഇരിക്കാത്ത അയാൾക്ക്‌ ഇതൊക്കെയും പുതിയ അനുഭവങ്ങളായിരുന്നു . അമ്മക്കുള്ള മരുന്ന് വാങ്ങണം . അമ്മയുമൊത്തു ക്രിസ്മസ് ആഘോഷിക്കണം . കോഴിക്കറി വെച്ച് അമ്മച്ചിയെ ഞെട്ടിക്കണം . കേക്ക് മുറിയ്ക്കണം . അയാളുടെ കണ്ണിൽ നിന്ന് ഒരു തുള്ളി കണ്ണുനീർ അടർന്നു വീണു . ഒന്നും കൊടുക്കാൻ സാധിച്ചിട്ടില്ല ഇതുവരെ ആ പാവത്തിന് . ഉള്ളിലെ കുറ്റബോധത്തിന്റെ അലകൾ അടങ്ങിയത് അവന്റെ വിളിയൊച്ചയിലാണ് .

"ചേട്ടാ .... ഞാൻ സഹായിക്കട്ടെ ..." അയാൾ തല ഉയർത്തി അവനെ നോക്കി . " എന്തിനു " അയാളുടെ ചോദ്യത്തിന് മുൻപിൽ അവനൊന്നു ചൂളി .

അയാളുടെ മുഖത്ത് നോക്കാതെയാണ് ബാക്കി അവൻ പറഞ്ഞത് ..

" അനിയത്തിക്ക് ചിക്കൻ ഭയങ്കര ഇഷ്ടമാ .. ക്രിസ്മസിന് വെച്ചിരുന്ന പൈസ 'അമ്മ ആശുപത്രിയിൽ കിടന്നപ്പോൾ ചെലവായി . ഞാനും അവളും അമ്മേം മാത്രേ ഉള്ളൂ വീട്ടിൽ , 'അമ്മ കെടപ്പാ ... പൈസ ഞാൻ പിന്നെ തരാം ..."

അയാൾ അവന്റെ കുനിഞ്ഞ മുഖത്തേയ്ക്കു നോക്കി .

" ബാ ..." അയാളവനെ കൈ കാണിച്ചു വിളിച്ചു . രണ്ടു പേരും ചേർന്നു . കടമുറി മുഴുവൻ വൃത്തിയാക്കി . കോഴിയുടെ വേസ്റ്റ് മൊത്തം പ്ലാസ്റ്റിക് കവറിലാക്കി മാറ്റി വെച്ചു. ദേഹത്ത് പറ്റിയ ചോരപ്പാടുകൾ നന്നായി കഴുകി വൃത്തിയാക്കി .

" നീ പഠിക്കാൻ പോണുണ്ടോ .." അവൻ ചുമലു വെട്ടിച്ചു .

" അച്ചായി മരിച്ചേൽ പിന്നെ ..പോകുന്നില്ല ..അനിയത്തി പോണുണ്ട് അവള് ഈ വർഷം അഞ്ചാം ക്ലാസ്സിലാ ... " അവൻ അഭിമാനത്തോടെ ചിരിച്ചു .

അപ്പോ നീയോ ...

" ഞാൻ രാവിലെ പേപ്പറിടാൻ പോകും .. വൈകുന്നേരം അന്തിപത്രം വിൽക്കാൻ പോണുണ്ട് . പിന്നെ അടുത്ത വീടുകളിലൊക്കെ ചില്ലറ സഹായമൊക്കെ ചെയ്യുന്നുണ്ട് . "

ആഹാ ... നീ മിടുക്കനാണല്ലോ ..

"ആകാതെ പറ്റില്ലല്ലോ ചേട്ടാ ... അനിയത്തിയെ പഠിപ്പിക്കണം , അമ്മേടെ മരുന്ന് .. ഈ അവസ്ഥ വന്ന ചേട്ടനും എന്നെ പോലെ ഒക്കെ ആയി പോയേനെ ..." അവൻ ചിരിച്ചു .

അയാളുടെ ഉള്ളു നീറി . എത്ര വർഷമാണ് വയ്യാത്ത അമ്മയെ ഒറ്റയ്ക്കിട്ടു താൻ ജീവിച്ചു തീർത്തത് .

"പോകാം ..." അയാൾ കട പൂട്ടിയിറങ്ങി . അവൻ ചോദ്യ ഭാവത്തിൽ അയാളെ നോക്കി .

ഞാനും വരാടോ നിന്റെ വീട്ടിലേക്കു . കൈയ്യിലിരുന്ന പൊതി അവന്റെ കൈയ്യിൽ കൊടുത്തു അയാൾ സൈക്കിളിൽ കയറി കാലു കൊണ്ട് പെഡല് കറക്കിയെടുത്തു . അവൻ ചിരിച്ചു കൊണ്ട് ചാടി പിന്നിൽ കയറി .

ചന്തയ്ക്കു പിന്നിലായി , വലിയ പാലത്തിനു കീഴേയ്ക്കാണ് അവൻ അയാളെ കൊണ്ട് പോയത് . അവിടെ പലക ചേർത്തടിച്ചുണ്ടാക്കിയ ഒരു വീട്ടിലേക്കു അവന്റെ പിന്നാലെ അയൽ കേറി . അയാളെ കണ്ടതും ഒരു പത്തുവയസ്സുകാരി വാതിലിനു പകരം വിരിച്ചിട്ട സാരിയുടെ പിന്നിലൊളിച്ചു . അയാൾ അവളെ കൈകാണിച്ചു വിളിച്ചു . ചേർത്തു പിടിച്ചു . നെറുകയിൽ ചുംബിച്ചു . കൈയിലിരുന്ന കേക്കും കോഴിയും അവളുടെ കൈയിൽ വെച്ചു കൊടുത്തപ്പോൾ പിന്നെയും അയാളുടെ കണ്ണുകൾ നിറഞ്ഞു . അകത്തു കയറി അവന്റെ അമ്മയെ കണ്ടു . അവരുടെ കണ്ണുകൾ നിറഞ്ഞു തുളുമ്പിയിരുന്നു . ഇറങ്ങാൻ നേരം അയാളവനെ ചേർത്തു പിടിച്ചു .

പോക്കറ്റിൽ നിന്നും അഞ്ഞൂറ് രൂപ എടുത്തു അവന്റെ കൈയിൽ വെച്ചു കൊടുത്തിട്ടു പറഞ്ഞു . " ഇതു ചേട്ടന്റെ ക്രിസ്മസ് സമ്മാനമാണ് , ഇതൊന്നും മോൻ തിരിച്ചു തരേണ്ട. .. നീ എനിക്ക് അതിലും വലിയതാണ് ഇന്ന് തന്നതൊക്കെ .." കണ്ണുകൾ തുടച്ചു അയാൾ ഇരുട്ടിലേക്കിറങ്ങി നടന്നു . അകലെ നഗരമെങ്ങും ക്രിസ്മസ് ആഘോഷത്തിൽ മുങ്ങി നിൽക്കുന്നു .

ആരാ ചേട്ടായി.... ആ ചേട്ടൻ .... " അനിയത്തിയാണ്

അവൻ അവളെ നോക്കി . " ഉണ്ണിയേശുവിന്റെ ദൂതൻ .. " അവൻ ചിരിച്ചു . ഇത്തവണ നമ്മുടെ വീട്ടിൽ വന്ന മാലാഖയാ മോളെ അത് .." അവൻ അവളെ ചേർത്തു പിടിച്ചു . അവൾ അത്ഭുതത്തോടെ അവനെയും അയാൾ നടന്നു മറഞ്ഞ വഴിയിലേക്കും നോക്കി .

അമ്മേയെന്നു നീട്ടി വിളിച്ചു കൊണ്ടാണയാൾ വീട്ടിലേക്കു കയറി ചെന്നത് . തിണ്ണയിൽ അയാൾ മലർന്നു കിടന്നു ആകാശത്തേയ്ക്ക് നോക്കി . ചൂടൻ കട്ടൻ ചായയുമായി ഇറങ്ങി വരുന്ന അമ്മയെ നോക്കി അയാൾ ചിരിച്ചു . പിന്നെ എണീറ്റ് കെട്ടി പിടിച്ചു

ഉമ്മ

വെച്ചു .

എന്നതാടാ ..ചെറുക്കാ ... അവരവനെ നോക്കി ..

" അമ്മച്ചി ..നാളെ ക്രിസ്മസാണ് . കേക്ക് മേടിക്കാൻ പറ്റിയില്ല. . "

നീയുണ്ടല്ലോടാ ..അമ്മച്ചീടെ കൂടെ , എനിക്കതു മതി . .. അവരവന്റെ നെറ്റിയിൽ

ഉമ്മ

വെച്ചു .

തിണ്ണയിൽ മൂലക്കൊരു കവർ ഇരിക്കുന്നത് അപ്പോഴാണ് അയാൾ കണ്ടത് .

" ഇതെന്നതാ അമ്മച്ചിയൊരു പൊതി .."

" ങേ ..നീ തന്നതാണെന്നു പറഞ്ഞാണല്ലോ ഒരാൾ ഇവിടെ കൊണ്ട് വെച്ചിട്ടു പോയത് .. "

അയാളാ പൊതി എടുത്തു തുറന്നു . അകത്തു വലിയൊരു ക്രിസ്മസ് കേക്കും അമ്മയുടെ മരുന്നുകളും . അകത്തു നിന്നുമെപ്പോൾ നല്ല കോഴിക്കറിയുടെ മണം വരുന്നുണ്ടായിരുന്നു . അയാൾ ആകാശത്തേയ്ക്ക് നോക്കി . അനേകായിരം നക്ഷത്രങ്ങൾ അയാളെ നോക്കി കണ്ണുകൾ ചിമ്മി . അകലെ നിന്നും ക്രിസ്മസ് ഗാനത്തിന്റെ ശീലുകൾ ഒഴുകി വരുന്നുണ്ടായിരുന്നു .

അവസാനിച്ചു )

എബിൻ മാത്യു കൂത്താട്ടുകുളം .