പൊന്മകൾ | MahaLakshmi Manoj

 ഒരു മകൾ മാത്രമുള്ള വീട്ടിൽ ശ്രെദ്ധിച്ചിട്ടുണ്ടോ അവൾ എപ്പോഴും അമ്മയെ അനുകരിക്കാൻ ശ്രെമിച്ചു കൊണ്ടിരിക്കുന്നവൾ ആയിരിക്കും, അമ്മ ഒരുങ്ങുന്ന പോലെ, അമ്മേടെ കുപ്പായം പോലെ, അമ്മയുടെ ഷൂവോ ചെരുപ്പോ പോലെ, അങ്ങനെ ഇന്നതെന്നു ഇല്ലാ, എല്ലാം. എന്റെ കുഞ്ഞാറ്റ 6 വയസു കഴിയുന്നേ ഉള്ളു എങ്കിലും എത്രെയോ നാള് മുന്നേ അമ്മയെ പോലെ എന്നാ പല്ലവി തുടങ്ങി, വല്ല തക്കാളിയോ, കടലമാവോ, അരിപൊടിയോ, അങ്ങനെ സൗന്ദര്യം കൂട്ടുന്ന എന്തെങ്കിലും മുഖത്ത് തെക്കാമെന്നു വെച്ചാൽ അമ്മ എനിക്കും വേണേ, എന്റെ മുഖത്തും ചെറിയ കുരു ഉണ്ട്

. അമ്മ ചെയ്യുന്നുണ്ടോ എന്നാ ഞാനും, അമ്മക് വേണോ എന്നാ എനിക്കും.

പിന്നെ ഉള്ള സ്വഭാവം പൊസ്സസ്സീവ്നെസ്സ് ആണ്, അതു ചിലപ്പോ ആദ്യത്തെതിനേക്കാൾ കൂടുതലായിരിക്കും, അവളുടെ അച്ഛനോട്.., ഞാൻ ഇത്തിരി കെട്ടിയോനോട് ചേർന്നിരുന്നാൽ ഉടനെ ഇല്ലാത്ത സ്ഥലത്ത് തിരുകി കേറും, അങ്ങേരുടെ മടിയിൽ ഇരിക്കാമെന്നു വെച്ചാൽ ഒരു കാലിൽ നിന്ന് എന്നെ തള്ളി ഇറകീട്ട് അതിൽ ഇരിക്കും, ഒരു

ഉമ്മ

കൊടുക്കാമെന്നു വെച്ചാലോ മുഴുവൻ കൊടുക്കാൻ സമ്മതിക്കൂല അതിനു മുന്നേ അവൾക് കൊടുക്കണം, TV-l കാർട്ടൂൺ കണ്ടിരുന്നാലും അകത്തു അച്ഛന്റേം അമ്മേടേം അനക്കമൊന്നും കെട്ടിലെങ്കിൽ അച്ഛാ അമ്മ എന്താ ചെയ്യണേ എന്ന് ചോദിച്ചു ഓടി വരും , പഠിക്കാനോ എഴുതാനോ ഇരുത്തീട് അനങ്ങാതെ ഇരുന്നു എഴുതിക്കോ എന്നു പറഞ്ഞു വന്നാൽ 100 ആവർത്തി വന്നു നോക്കും ഇതുങ്ങളൊക്കെ തൊടാതേം പിടിക്കതേം തന്നെ ആണോ ഇരിക്കണേ എന്നറിയാൻ .

സൗന്ദര്യ സംരക്ഷണം ആണേൽ പറയേം വേണ്ട. തടി കൂടാതിരിക്കാൻ ചില സമയങ്ങളിലെ ഭക്ഷണം ഞാൻ ഒഴിവാക്കിയാൽ, "അമ്മ എന്താ കഴിക്കത്തെ,?, "അതു അമ്മക് വണ്ണം കൂടുമെടാ കണ്ണാ ", "അപ്പൊ അമ്മക് അറിയാമല്ലേ കഴിച്ചാൽ വണ്ണം വെക്കുമെന്നു, പിന്നെന്തിനാ അമ്മ എനിക്കു തന്നോണ്ടിരിക്കണേ ഭക്ഷണം, ഞാൻ വണ്ണം വെച്ചോട്ടെന്നോ ". ഈ പ്രായത്തിലെ നാക്കിന്റെ നീളം ഇതാണെൽ കുറച്ചു കൂടി കഴിഞ്ഞാൽ എന്താകുമെന്നു ആലോചിച്ചാൽ അന്തവും കുന്തവും ഇല്ലാ എന്ന എന്റെ ആത്മഗതം കേട്ട കെട്ടിയോൻ "അല്ല മത്തൻ കുത്തിയാൽ കുമ്പളം മുളക്കില്ലല്ലോ അല്ലേ".. ഞാൻ ചിന്തിച്ചത് ഇങ്ങേരിനി സ്വന്തമായി ട്രോള്ളിയതാണോ അതോ എനിക്കിട്ടു താങ്ങിയതാണോ .. ആ...

മഹാലക്ഷ്‌മി മനോജ്