നല്ലെഴുത്ത്

The biggest ever archive in Malayalam Literature. 2.5 crores pageviews, 14000+ creations, 2000+authors and adding on....

New Books

Post Top Ad

Your Ad Spot

കുട്ടന്റെ അച്ഛൻ I Kavitha I Maya Dinesh


കള്ളിമുണ്ടും ചുറ്റി,കള്ളും മോന്തി
കണ്ടോരോടൊക്കെ കവലേല്
കയ്യാങ്കളികാട്ടി നടക്കുന്ന
കുറ്റിത്തലമുടിയുള്ള,കറുത്ത
കണ്ണനെ അവന്റെച്ഛനായിട്ടും
കുട്ടനിഷ്ടമല്ലാത്തതുകൊണ്ടാണ്
കരൾരോഗം മൂർച്ഛിച്ചയാളെന്നേക്കുമായി
കണ്ണടച്ചിട്ടും കരയാനാവാതെ
കല്ലു പോലെ കുട്ടനിരുന്നത്.
അച്ഛൻ മരിച്ച് മൂന്നാംപക്കം
കുളിപ്പുരയുടെ പുറത്തൊര-
നക്കം കേട്ടെന്നു
പെങ്ങൾ പേടിച്ചു കരഞ്ഞത്
കേട്ടപ്പോഴാണ്
കുട്ടനച്ഛന്റെ മുറിയിൽ ചെന്ന്
അച്ഛന്റെ കള്ളിമുണ്ടാദ്യമായുടുത്തത്.
കൈയ്യിലൊരു കൊടുവാളുമെടുത്ത്
അമ്മയ്ക്കും,പെങ്ങൾക്കും
രാപ്പകൽ കാവലാളായപ്പോഴാണ്
കുട്ടന് അച്ഛനെയോർമ്മ വന്നത്.
കണ്ണിലൂടെ കണ്ണീരായി അച്ഛൻ
പെയ്തു തോരുമ്പോഴാണ്
കുട്ടനച്ഛനോട് മനസ്സുകൊണ്ട്
മാപ്പു പറഞ്ഞത്.
കള്ളുകുടിയനാണെങ്കിലും,
കുടുംബത്തെ മറക്കാനാവാത്ത-
വനായതുകൊണ്ടാണ്
കുട്ടനെയുമ്മവെച്ച
കാറ്റിനപ്പോ അച്ഛന്റെ
മണമായിരുന്നത്.
Written by Maya Dinesh

2 comments:

ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക

Post Top Ad

Your Ad Spot