വിനാശകാലേ വിപരീതബുദ്ധി

ഗുരുവായൂർ റോഡിൽ
വാരാപ്പുഴയിൽ ഉച്ചഊണിന്
മാത്രമായി ഒരു ഹോട്ടലുണ്ട്..
#പെരിയാർ.

കയറിയവർക്കറിയാം..
ഇടയ്ക്കിടയ്ക്ക് ഞാൻ
അവിടെ നിന്നും ഊണ് കഴിയ്ക്കും

ഒരുദിവസം

അങ്ങനെ നിർത്തുമ്പോളാണ്
റോഡരികിൽ ഒരാൾക്കൂട്ടം കണ്ടത്..
ഒരു കാർ ബൈക്കിൽ ഇടിച്ചതാണ്.

ആളുകൾ കാറുകാരനോട്
കയർക്കുന്നുണ്ട്...
ഇവരെ ആശുപത്രിയിൽ
കൊണ്ടുപോകാൻ പറയുന്നുണ്ട്..

ബൈക്കിലുണ്ടായിരുന്നവരെ
( ആങ്ങളയും ഒരു കൊച്ചുപെങ്ങളും ആവണം )
കാറിൽകേറ്റി
അല്പദൂരം മുന്നോട്ടുപോകുന്നതും
ആൾക്കൂട്ടത്തിനപ്പുറം
കാറ് നിർത്തി അവരെയിറക്കി
കാറുകാരൻ കടന്നുകളഞ്ഞതും
ഞൊടിയിടയിൽ കഴിഞ്ഞു...

ആൾക്കൂട്ടം അവർക്കുചുറ്റും
വീണ്ടും കൂടുന്നതും
സംസാരിക്കുന്നതും
കണ്ടുകൊണ്ടാണ് ഞാൻ
പെരിയാറിലേക്ക് കയറിയത്...

തിരിച്ചിറങ്ങുമ്പോളവിടെ
ആൾക്കൂട്ടമില്ല..
ഒന്ന് രണ്ടു കൂട്ടുകാരാവണം
എന്ത് ചെയ്യുമെന്നറിയാതെ
അവർക്കൊപ്പം ആ നട്ടുച്ചയ്ക്ക്
അവിടെനിന്നു
വെയിൽ കൊള്ളുന്നുണ്ട്....

എന്നിലെ സഹജീവി
സടകുടഞ്ഞേണീറ്റ്
അവർക്കിടയിലേക്ക് ചെന്നു...
ആ പെൺകുട്ടി നിന്ന് വിതുമ്പുന്നുണ്ട്..
ഒരു ന്യൂ ജെൻ ബൈക്ക്..
C.c.തന്നെ നല്ല തുക കാണണം..
ഹെഡ്‍ലൈറ്റ് പൂർണ്ണമായും പൊടിഞ്ഞുപോയിട്ടുണ്ട്....

എന്റെ കയ്യിൽ ഒത്തിരിയുണ്ടായിട്ടല്ല...
അത് നന്നാക്കാനുള്ള തുക അവരെയേല്പിച്ചു
ഞാൻ തിരിഞ്ഞുനടന്നു...
പുറകിൽ പിറുപിറുക്കുന്നുണ്ടവർ....

ഇനിയാണ് മാരകമായ ട്വിസ്റ്റ്..

ഞാൻ വണ്ടിയിൽകയറി
മുന്നോട്ടെടുത്തു..

" ചേട്ടാ ഒന്ന് നിർത്തിയ്ക്കേ...
ചേട്ടൻ ആ ഇടിച്ചേച്ചുംപോയ
ആളുടെ ആളാണോ..
അയാളാണോ ചേട്ടനെ
ഇങ്ങോട്ടിപ്പോൾ കാശുമായി വിട്ടത് "

വഴിയേ പോയ വയ്യാവേലി
ഏണി വെച്ച് കേറിയപോലായി....

അല്ല എന്ന് സമർത്ഥിയ്ക്കാൻ
ഒരുപാട് പറയേണ്ടിവന്നെനിയ്ക്ക്...
അവർ വിശ്വസിച്ചുവോ ആവോ.

BY Niyas Vaikkam