മൃഗം

മൃഗം
---------
ഓളങ്ങൾ പോലെ അലയടിക്കുന്നൊരു
മനസ്സെന്ന മായിക കൂടുമായി
അലയാഴിക്കടിയിൽ മുളപൊട്ടി വന്നൊരു
ജീവനെന്നുള്ള വിസ്മയവും.

താനേ കരകേറി രൂപഭാവങ്ങളിൽ
കാലങ്ങൾ തീർത്തോരു മാറ്റവുമായ്
ഇഴഞ്ഞു നീങ്ങവെ കൈകാൽ മുളച്ചതും
നാൽക്കാലി ഇരുകാലിയായ് മാറിയതും.

തങ്ങളിൽ തങ്ങളിൽ പൊരുതി ജയിച്ചവർ
മൂപ്പനായ് വാണു പല കോലങ്ങളായ്
ബുദ്ധി കൂടും വിധമുള്ളോർ പതുക്കവേ
മണ്ണിൽ മനുഷ്യനായ് മാറിയതും.

ഗോത്രങ്ങളായ് പിരിഞ്ഞുടനെ പിന്നെ
പോരിനു കാരണം വേണ്ടാതായി
വീണ്ടും വളർന്നവൻ രാജാവായ്
മന്ത്രിയായ് മതങ്ങളായ് നിയമമായ്
ഈ വിധംഭൂലോകമാകെ നിറഞ്ഞു നിന്നു.

മാ നിഷാദ ചൊല്ലി വിലക്കിയ മുനിയുടെ
മാറിലേക്കെല്ലെ നിന്നാദ്യ ശരം.
ഒരു ചെറു കണികയാം തന്നെ വളർത്തിയ
പോറ്റമ്മ തൻ മാറിലാഴ്ന്നിറങ്ങി.

അമൃതം ചുരത്തുന്ന പൂഞ്ചോലക്കുന്നിൻ്റെ
അമൃതകുംഭങ്ങൾ തകർത്തെറിഞ്ഞും.
ആർത്തിപൂണ്ടീ വിധം മണ്ണേമറന്നവൻ
തനിക്കായി പണ്ടേ ചിതയൊരുക്കി.

ഭൂമി തൻ യൗവ്വനം കവർന്നെടുത്തു പിന്നെ
അവസാനച്ചാറും വലിച്ചെടുത്തു.
ചവിട്ടി മദിച്ചുനടക്കുന്ന നേരത്തീ
വൃദ്ധയാം ജനനിയെ നീ മറന്നു.

ഒരു മാത്ര ഒരു മാത്രയെങ്കിലും
ഓർക്കുന്നുവോ നിൻ്റെ കാലടികൾ
അമ്മതൻ നെഞ്ചിലാണാ പാടും പാദങ്ങളുമെന്ന്
ഒന്നു ചിന്തിക്കാമോ ഒരിക്കൽ മാത്രം .

23/06/17.
ബാബു തുയ്യം.

അഗ്നി

അഗ്നി.
-----------
ഗാന്ധിതൻ ദർശ്ശനം ചില്ലിട്ടൊരുക്കി
ചുവരിലെയാണിയിൽ തൂക്കി വെച്ച്.
അഷ്ടിക്കു ഗതിമുട്ടും
ദരിദ്രൻ്റെ മടിക്കുത്തിൽ
ശേഷിച്ച ചില്ലറക്കാർത്തികൂട്ടി
സംഘബലമുള്ളോരുദ്ദോഗക്കൂട്ടങ്ങൾ
ദൃംഷ്ട വളർന്ന പിശാചിൻ്റെ കൂട്ടങ്ങൾ
സാധുവിൻ രോദനമാത്മരതിയാക്കി
അട്ടഹാസങ്ങൾ മുഴക്കുന്ന വേളയിൽ
മറുപടിയുമായ് ഞാൻ തിരിഞ്ഞു നിന്നാൽ
നിരത്തി നിറുത്തിയീ നികൃഷ്ടജന്മങ്ങളെ
നിറതോക്കിനിരയാക്കി കൊന്നുവെന്നാൽ
കുറ്റം പറഞ്ഞിടെരുതെന്നെയാരും.
എനിക്കു ജീവിക്കണമെൻ്റെ മണ്ണിൽ.

22.06.17
ബാബു.

മരങ്ങൾ.

മരങ്ങൾ.
---------
വൃക്ഷ തൈകൾ നടാൻ വന്ന അപ്പേട്ടൻ ഭക്ഷണം കഴിച്ചു വിശ്രമിക്കുമ്പോൾ എന്നോട് ചോദിച്ചു.
എന്താണിതൊക്കെ സ്ക്കൂളിലൊക്കെ ഇങ്ങിനെ ചെയ്തിട്ട് എന്താ കാര്യം.
ഒരുപുഞ്ചിരിയോടെ ഞാൻ കൊടുത്ത മറുപടി ഇങ്ങിനെയായിരുന്നു.
നമ്മൾ ചെറുപ്പം മുതൽ കഴിക്കുന്ന ഭക്ഷണം പാചകം ചെയ്യാൻ എത്രവിറക് ഉപയോഗിച്ചിരിക്കും. കഴിക്കുന്ന ഭക്ഷണവും അവർ തരുന്നതുതന്നെ. മരിച്ചാൽ കത്തിക്കുന്നതിനും വിറക് വേണം കൂടാതേ ജനനം മുതൽ മരണം വരേ അവർ തരുന്ന വായു അല്ലേ ശ്വസിക്കുന്നത്
പിന്നെ നമ്മളിവിടെ ജീവിച്ചിരുന്നു എന്നതിന് എന്തെങ്കിലും വേണ്ടേ അപ്പേട്ടാ..,
ഞാവൽ, മാവ്, സപ്പോട്ട, പേര, അരിനെല്ലി, ചാമ്പ, ആര്യവേപ്പ് എന്നിവ യെല്ലേ വെക്കുന്നത്.
കുട്ടികളും കിളികളും അണ്ണാറക്കണ്ണൻമാരും സന്തോഷിക്കട്ടെന്നേ...

ഒരു അടയാളം, ഒരു വരം, ഒരാശ്വാസം, ഒരു വിശപ്പു തീർക്കൽ. അതു മാത്രമല്ലല്ലോ മരങ്ങൾ....
ഈ മഴക്കാലത്തെങ്കിലും സ്വന്തം ജീവിതത്തിൽ ധാരാളമായുപയോഗിച്ച എന്തെങ്കിലും ഭൂമിക്കു തിരിച്ചു നൽകാൻ നിങ്ങളാലാവുന്നതുചെയ്യൂ സ്നേഹിതരേ....

ബാബു തുയ്യം.
30/05/17

നിന്നോട്.

നിന്നോട്.
----------
നീയില്ലാത്ത ലോകത്ത്
ഞാനിരിക്കുമ്പോഴും
എന്നിൽ നിറയെ നീയാണ്
നീ മാത്രം.
ഓർമ്മകൾ നിന്നുടെ
ഓരോ ചലനത്തിലും
വാക്കുകളിലും ചുറ്റി...
നീയില്ലെങ്കിൽ പിന്നെ
എനിക്ക്
വിശപ്പും ദാഹവും എന്തിന് ?
നിന്നിലേക്കണയാൻ
വേണ്ടി മാത്രം
ദിനരാത്രങ്ങൾ......
ഒരു നാഴികമണി പോലേ
ചോർന്നു പോകുന്നതും
കൂമ്പാരം കൂടുന്നതും
നിൻ്റെ ഓർമ്മകൾ മാത്രം
സഹിക്കാൻ പറ്റുന്നില്ല
ഈ ഒറ്റപ്പെടൽ
ഏകനായ് ജീവിച്ചു തീർക്കട്ടെ ഞാനാ
കറുത്ത സത്യത്തിനെ
പുൽകുന്നതുവരെ
വൈരാഗ്യത്തോടെ..
പ്രതികാരത്തോടെ.

ബാബു.
20/05/17

പുലർകാല സ്വപ്നം

ഇന്നും കാലത്തു ഞാൻ കണ്ട സ്വപ്നത്തിലെ ദേവിക്ക് നിന്റെ മുഖമായിരുന്നു. മഹാദേവൻ്റെ പോലും മനസ്സിളക്കിയ ശ്രീപാർവ്വതിയെപ്പോലെ ജ്വലിച്ചു നിന്ന സൗന്ദര്യത്തിൽ എന്നെ മറന്ന് ആ അനുഭൂതിയിൽ അലിഞ്ഞ് ഞാൻ എന്നെ തന്നെ മറന്നൊരു സ്വപ്നം .ഒരു മഞ്ഞു തുളളി പോലെ ആ നനുത്ത സുഖം അലിയിച്ചനുഭവിക്കാൻ സർവ്വ ചേതനയും കൊതിച്ച ഒരു സങ്കൽപ്പമായികത്തിൽ എല്ലാം മറന്ന് ഞാൻ പറന്നുയരുമ്പോൾ സർപ്പ സൗന്ദര്യത്തിെൻറലയനങ്ങളിൽ ആനന്ദനടനങ്ങളിൽ എന്നെപ്പോലെ നീയും.
അനുഗ്രഹീതമായ കൈവിരലുകളിലെ വിദ്യുത് സ്പർശം ഏറ്റുവാങ്ങി ആ കൈകളുടെ അകവും പുറവും ചുംബിച്ച് വിരലുകൾ ഓരോന്നായി നുണഞ്ഞ് മുല്ലവളളി പോലെ എന്നെ വരിഞ്ഞിറുക്കിയ ആശ്ലേഷത്തിന് വീർപ്പുമുട്ടലല്ലായിരുന്നു വീണ്ടും വീണ്ടും കുടുതലടുക്കാൻ വേണ്ടിയുളള ശക്തമായ ആലിംഗനം തീർത്ത സുഖം.
കുറേയേറേ പറയുന്ന കണ്ണു ക ളിൽ നിറയെ ചുംബനം നൽകി സായൂജ്യ പടവുകളിലേക്ക് നിന്നെ അർദ്ധ ബോധത്തോടെ ആനയിക്കുമ്പോൾ ഒളിയമ്പെയ്ത കാമനും വിവശനായ് രതീദേവിയോടൊത്ത് രാസലീലകൾക്ക് തുടക്കം കുറിച്ചിരിക്കും.
ഇടതൂർന്നു നിൽക്കുന്ന കാർകൂന്തലിൽ പിൻകഴുത്തിൽ വക്ഷോജങ്ങളിൽ..... അണുവിടവിടാതെ ചുംബനമഴയിൽ നനഞ്ഞു നീ സഹിക്കാനാവാതെ എന്നിൽ നഖക്ഷതങ്ങൾ കൊണ്ട് വരച്ച ചിത്രത്തിന് ആദി യുഗങ്ങളിലെ ഭാഷയായിരുന്നു.
ആലിലവയറിലെ ഇത്തിരി വിശാലതയിൽ ചിത്രം വരക്കുന്ന ചുണ്ടുകൾ പുതിയ ചായക്കൂട്ടിനാൽ നിന്നെ പുളകം കൊളിച്ചപ്പോൾ സ്വന്തം സാമ്രാജ്യം തിരയുന്ന രാജാവിനും രാജ്ഞിക്കും വഴികൾ തേടേണ്ടതുണ്ടായിരുന്നില്ല. ഒരു കൊതുമ്പു വളളം പുഴയിലേക്കിറങ്ങിയപ്പോൾ തീർത്ത കുഞ്ഞലകൾ പോലെ നീയെന്നെ പൂർണ്ണമായും സ്നേഹിച്ചപ്പോൾ ആകാശത്ത് നക്ഷത്രങ്ങളും ഭൂമിയിൽ സുഗന്ധത്തോടെ പൂക്കളും വിരിഞ്ഞിരുന്നു.
അവ തുടുത്ത് മനോഹരമായ് മഞ്ഞു തുളളികളോടെ അടുത്ത പുലരി വരവേൽക്കാൻ നിന്നിരുന്നു

ബാബു തുയ്യം.
09/05/17.

ദൂത്

മരണം അതിെൻറ
അനിവാര്യത യോർമ്മപ്പെടുത്തി
ഒപ്പം നടക്കുമ്പോൾ
മനസ്സു പതറുകയാണ്.
ചില നഷ്ടങ്ങൾ നമുക്കു സഹിക്കാനും
പൊറുക്കാനും കഴിയും.
പക്ഷെ നമ്മോടൊപ്പം നടന്ന്
ഒരുമിച്ച് പലതും മോഹിച്ച്..........
അവർക്കിറിയാം അവർ മരണാസന്നരാണെന്ന്.
നമ്മേ നോക്കി ചിരിക്കുമ്പോഴും
ഓരോന്ന് പറയുമ്പോഴും
നിശബ്ദതയിൽ മുഴങ്ങുന്ന
മണിനാദം പോലെ
ഒരു ഭയം നമ്മെ വിറപ്പിച്ചു കൊണ്ടിരിക്കും.
ഇടിത്തീ പോലെയാണ്
ചില വാർത്തകൾ നമ്മേ തേടിയെത്തുക.
മനസ്സിലേക്ക് ഒരു വലിയ
കല്ലെടുത്തു വെച്ച്
ആ വാക്കുകൾ അനന്തതയിൽ ഇല്ലാതാകുമ്പോൾ
ആ ഭാരത്തിനാൽ
ശ്വാസംമുട്ടിപിടഞ്ഞ് നാം
നീറി നീറി മരിച്ചു കൊണ്ടേയിരിക്കും.
നിറഞ്ഞു കത്തുന്ന നിലവിളക്കു പോലുളള ഗൃഹങ്ങളിലേക്ക്
അശാന്തിയുടെ മരണദൂതുമായ്
ആ ചീത്ത വാർത്തയെത്തുമ്പോൾ
സ്നേഹിച്ചു കൊതിതീരാത്ത
ഇനിയും ഒരുപാട് കാലം
ജീവിച്ചു തീർക്കാനുളള
പ്രിയപ്പെട്ടവരുടെ മുഖങ്ങൾ നോക്കാൻ
മനസ്സു പതറാതിരിക്കാൻ
ഏതു കണ്ണടയാണ് ദൈവം കരുതിയിരിക്കുക.
മാർക്കാണ്ഡേയനെ കണ്ടിരുന്ന
മാതാപിതാക്കളെപ്പോലെ
ഓരോ കല്ലും തീരുമ്പോൾ
ഒരു വരം ഒരു നീട്ടിക്കിട്ടൽ
അതിനാകുമോ ദൈവമേ...?
മൃത്യുഞ്ജയമന്ത്രം സദാ ഉരുവിട്ട്
ഞാനും പ്രാർത്ഥിച്ചിടട്ടെ.

ബാബു.
01/05/17.

നേർക്കുനേർ

കൂട്ടി വെച്ച കുറേ സ്വപ്നങ്ങളുടെ
സൂക്ഷിപ്പുകാരനാണ് ഞാൻ.
നിങ്ങളുടെ പരിഹാസങ്ങൾക്ക്
എന്നെ പിന്തിരിപ്പിക്കാനാവില്ല.
ഒറ്റപ്പെടുത്തി ഇല്ലാതാക്കുന്ന രാഷ്ട്രീയം
ഇന്നത്തെ ജയം നിങ്ങൾക്കേകിയേക്കാം.
എന്നെ വെറുതേ വിടുക
ഇന്നലെയുടെ മോഹ വിത്തുകൾ
പുതുമഴയിൽ
മുളപ്പിക്കാനുണ്ടെനിക്ക്
നിങ്ങളുടെ ആടയാഭരണങ്ങളിൽ
തീരേ ഭ്രമമില്ലാത്ത എന്നെ
എെൻറ വഴിക്ക്.
ചിത്ര വധത്തിനു കോപ്പുകൂട്ടുന്ന
നിഴൽ കുത്തിൽ പ്രഗ്ൽഭരായ
സാഡിസ്റ്റ്കൾക്കുവേണ്ടി
കളമൊഴിഞ്ഞു തരാൻ
തൽക്കാലം ഞാനൊരുക്കമല്ല.
നിറവാർന്ന സത്യത്തിെൻറ
യഥാർത്ഥ കാരണത്തിെൻറ
തുടിക്കുന്ന ആത്മവിശ്വാസത്തിെൻറ
പിന്തുണയുണ്ടെനിക്ക്
പുകഴ്ത്തിപ്പാടാനെനിക്കാവില്ല
നേരു പറയാതിരിക്കാനും
ആരാധിക്കാനുമാവില്ല
കാരണം
മഹത്തരമായത്
ഒന്നുമില്ല നിങ്ങളിൽ.

Babu Thuyyam
19/04/17.

രണ്ടു വിഷുക്കവിതകൾ

അരവിന്ദാക്ഷൻ നായർ 

കണ്ണാ നിന്നെ കണ്ടു യാദവർ 
യമനാ നദി യുടെ തീരത്ത് .
ചുണ്ടിൽ പൊന്നോടക്കുഴലൂതി
രാഗ പരാഗം ചൂടി
മഞ്ഞ ചേലയുടുത്തു പീലി തിരുമുടി
ചാർത്തിയ നേരം
രാധാമാധവ സംഗമമായി
പനിമതി തൂകിയ രാവിൽ '..
മേട വിഷുവിനു കണി കണ്ടുണരാൻ
കണ്ണാ നിൻ മുഖ മ രി കെ
കണികൊന്നയും കണി വെള്ളരിയും
നിന്നെ കാണാൻ വന്നു .

ബാബുതുയ്യം

വിഷുക്കണി
കണ്ണിനുമമൃതാമെൻ
കണ്ണനെ കണി കാണാൻ.
കണ്ണും പൊത്തി യാ
കാഴ്ച കാട്ടാൻ.
അമ്മേ വന്നീടുമോ
ഒരു വട്ടമെങ്കിലും
ഈ വർണ്ണ കാഴ്ച തൻ
മാറ്റുകൂട്ടാൻ.

---------------
എല്ലാവർക്കും
വിഷു ആശംസകളോടെ
ബാബു.

പറയാതെ ..........!

പറയാതെ ..........!

സുന്ദരവദനത്തിൽ വിരിയുന്ന പുഞ്ചിരി
മനസ്സിലേക്കാഴും മിഴികളോടെ.
അനശ്വരമാക്കി നിർത്തുന്നിതെപ്പോഴും
നീ തെളിച്ചൊരീ കെടാവിളക്ക്.
ഓമലാളേയെന്നുമോമനിക്കാൻ
ജീവിതത്തോടെെൻറ കൂട്ടുചേർക്കാൻ.
ആകാശംമുട്ടെ പറന്നുയരാൻ
ആത്മാവിലാനന്ദ രതികൾ തീർക്കാൻ.
ദേവതപോലെ നീ ഒരുങ്ങി നിന്നാൽ
ശ്രീ പാർവ്വതിക്കും സമമെന്ന പോൽ.
ആരൂപമാകാരഭംഗിയാലെൻ മനം
ആറാടും നിർവൃതി നൽകീടുന്നു.
ഇല്ല വർണ്ണിക്കാനിനിയുമേറേ
എല്ലാം തികഞ്ഞൊരീ സൗന്ദര്യത്തേ.

പുതുമഴ പെയ്ത്തിലെ ചെറുനാമ്പു പോൽ
എൻ ഹൃദയത്തിലിങ്ങിനെ തളിർത്തു പൊന്തും.
വീണ്ടും വെയിലേറ്റു വാടിക്കരിഞ്ഞു പോം
നൊമ്പരമായൊരീ ആഗ്രഹങ്ങൾ.
നഷ്ടമോഹങ്ങൾ തൻ നിത്യഗർഭം പേറി
കാലങ്ങളിങ്ങനെ പോവുവതേ മെച്ചം.
എന്നും പറയുവാനേറേ കൊതിച്ചീടും
ഒരു പിൻവിളിവാക്കിനെ ശൂന്യമാക്കും.

Babu Thuyyam
21/03/17.

അന്ധതയുടെ ലോകം.

അന്ധതയുടെ ലോകം.

ഇത് പ്രഭു വിെൻറ പ്രേതത്താഴ്വര.
ഇവിടെ സൂര്യനുദിക്കാറില്ല. കനത്ത ഇരുട്ടിലേക്ക് ഭയപ്പെട്ടരിച്ചിറങ്ങുന്ന നിലാവെളിച്ചങ്ങൾ കാഴ്ച തരുന്ന ഭീതിയുടെ താഴ്വര.
അന്യോന്യം കെട്ടിപ്പിണഞ്ഞ് പാതയോരത്ത് നഗ്നരായ് രതിക്രീഡകളിൽ മുഴുകു ഇണകളുടെയും. വൃദ്ധകളെയും,പിഞ്ചോമനകളെയും കാമ പൂരണത്തിന് ബലിയർപ്പിക്കുന്ന പ്രഭുവിെൻറ പ്രേതത്താഴ്വര. 
അസുഖ ബാധിതർക്കും, ബുദ്ധി വൈകല്ല്യമുളളവർക്കു പോലും കാമ പേക്കൂത്തിൽ നിന്നും മോചനമില്ല. അറും കൊലകൾക്കു പേരുകേട്ട നാട്. അണികളെ ചതുരംഗ പലകയിലെ കരുക്കളാക്കി വെട്ടിനിരത്തി ആഹ്ളാദിക്കുന്ന യജമാനൻമാരുടെനാട്. അജ്ഞതയുടെ തിമിരപ്പാട കെട്ടിയ കണ്ണുകളോടെ പക പിടിച്ചലയുന്ന കൊലയാളികളുടെ സ്വന്തം നാട്. രക്തവും, കണ്ണീരും, ശുക്ളവും വീണ് അശുദ്ധമായ ശാപ ഭൂമി.ഉൻമാദത്തോടെ അലയുന്ന രാത്രി രഞ്ചൻ മാരുടെയും ഗുണ്ടകളൂടെയും സ്വന്തം നാട്. ഇവിടെ നിങ്ങൾ വെളിച്ചത്തിനെ സ്വപ്നം കണ്ടാൽ ഒരു വേള നിങ്ങളുടെ കണ്ണിൽ ആ സ്വപ്നങ്ങളുടെ തിളക്കം കണ്ടാൽ.... ഓർക്കുമ്പോൾ ഭയം തോന്നുന്നു.

Babu Thuyyam
11/03/17.

നിർഭയ ചിന്തകൾ.

നിർഭയ ചിന്തകൾ.

വനിതാ ദിനം കഴിഞ്ഞു.
എല്ലാ വർഷത്തേക്കാളും ഗംഭീരമായി ഏറ്റവും കൂടുതൽ പീഡനങ്ങൾ നടത്തി കേരളീയർ അതൊരുവൻ വിജയമാക്കി.
3, 7, 9, 16. എന്നിങ്ങനെയാണ് ഇരകളെ തിരഞ്ഞെടുത്തത് എന്ന. പ്രത്യേകതയോടെ തന്നെ രണ്ടു ജീവൻ ബലിയും കൊടുത്തു.

എന്താണ് നമുക്ക് സംഭവിച്ചത് ? ഇത്രയും കാമവെറിയൻമാരായി മലയാളി സമൂഹം മാറുന്നതെന്തേ ?
ഒരു അഗാധഗർത്തത്തിലേക്ക്, അന്ധകാരത്തിലേക്ക് പോകുന്നതിനു മുമ്പ്. അവശേഷിക്കുന്ന രക്തബന്ധങ്ങളുടെ ചരടറ്റു പോകുന്നതിനു മുമ്പ് ഒരു ശരിയായ തീരുമാനമെടുക്കേണ്ടിയിരിക്കുന്നു.

ഇവിടെ നിയമ സംവിധാനങ്ങളില്ലാത്തതല്ല ഓരോ സംഭവങ്ങളും അവർത്തിക്കപ്പെടുന്നതിെൻറ കാരണം. മത, രാഷ്ട്രീയ, ധന സ്ഥിതി നോക്കി പ്രവർത്തിക്കുന്ന നിയമപാലകരും, പണത്തിനു വേണ്ടി ആത്മാർത്ഥയില്ലാതെ ഏതു നെറികെട്ട കാര്യത്തിനും കോട്ടിട്ടു വരുന്നവരും, ഇല്ലായ്മ ചെയ്യേണ്ടവരായ സമൂഹത്തിനു ദോഷമായി ഭവിക്കാൻ സാദ്ധ്യതയുളള ക്രിമിനലുകളെ നൂലിഴ പഴുതു നോക്കി രക്ഷപ്പെടുത്തുന്ന നീതിബോധവും ചേരുമ്പോൾ ആർക്കും ഇവിടെ എന്തുമാകാമെന്നോ ?
നമ്മൾ നമുക്ക് കിട്ടിയ സ്വാതന്ത്ര്യം അമിതമായി ഉപയോഗിക്കുകയാണ് അതുമൂലം എന്തിനെയും എതിർക്കാമെന്ന ഒരു ചിന്ത വേരുന്നിയിരിക്കുന്നു.
കൊടിയുടെ നിറം ഏതുമായിക്കൊളളട്ടെ, വൃത്തികെട്ട രാഷ്ട്രീയ പാർട്ടികളുടെ പിൻബലവും മതമേലധികാരികളുടെ ഒത്താശയോടും കൂടി തന്നെയാണ് ഇവിടെ കാര്യങ്ങൾ തീരുമാനിക്കപ്പെടുന്നത് ( തേച്ചു മായ്ക്കപ്പെടുന്നത്)
ഇത്തരം കേസ്സുകളിൽ പ്രത്യേക കോടതി കൾ സ്ഥാപിച്ച് കുറ്റവാളികൾക്ക് എത്രയും വേഗം ശിക്ഷ നൽകണം.
നിഷ്ഠൂരമായ കുറ്റങ്ങളിൽ വധശിക്ഷ തന്നെ നൽകണം. ഇത്തരം പ്രതികളെ മുഖം മൂടിയില്ലാതെ പ്രദർശിപ്പിക്കണം നാളെ തിരിച്ചറിയപ്പെടേണ്ടവരാണവർ, ഒറ്റപ്പെടുത്തേണ്ടതാണ് അവരേ.ഒരു നിമിഷത്തിെൻറ സുഖത്തിനു വേണ്ടി ഒരു ജീവനും ജീവിതവും ഉടക്കുന്നവരോർക്കണം അവരെപ്പോലെ തുല്ല്യതയോടെ ജീവിക്കാനവകാശമുളളവരാണ്.പെണ്ണായതിനെ പ്രായ വ്യത്യാസമില്ലാതെ നശിപ്പിക്കുന്ന ദുഷ്ടനെ ജീവനോടെ ചുട്ട് കൊല്ലണം.
സമൂഹത്തിെൻറ കാഴ്ചപ്പാടുകൾ മാറേണ്ടതുണ്ട്. കാമവെറിപൂണ്ട് ഇണ തേടി അലയുന്ന അവസ്ഥയിൽ നിന്നും. ആത്മിയതയിലൂന്നിയ വിദ്യാഭ്യാസം വഴി നല്ല അറിവുകൾ കുട്ടികൾക്കു പകർന്നു നൽകാൻ മതങ്ങളുടെ പേരിലറിയപ്പെടുന്ന വിദ്യാഭ്യാസ സ്ഥാപനങ്ങൾക്കെങ്കിലും കഴിയണം. അതുപോലെ തുറന്നു സംസാരിക്കും വിധത്തിൽ സെക്സും അതിനോടനുബന്ധിച്ച പ്രശ്നങ്ങളും പരിഹരിക്കണം.
ചില സ്ത്രീ സംഘടനകളുണ്ട് എതിരാളികൾ ചെയ്താൽ മാത്രം ഒച്ചവെക്കുന്നവർ. തെരുവിൽ അഴിഞ്ഞാടിയിട്ടല്ല അനേകം പുരുഷരേ ചുംബിച്ചു മല്ല സുരക്ഷിത യാകേണ്ടത്.
പ്രശ്നങ്ങൾ കൂടുതൽ രൂക്ഷമാകുന്നൊരു ഭാവി എന്നെ ആകുലപ്പെടുത്തുന്നു. കുടുംബ ബന്ധങ്ങളുടെ ചട്ടക്കൂട് മാറിക്കൊണ്ടിരിക്കുന്നു. ഭർത്താവിന് ഭാര്യ പഴയതും ഭാര്യക്ക് ഭർത്താവ് പഴഞ്ചനു മാകുമ്പോൾ,വിരക്തി ഇര തേടലാകുമ്പോൾ വളരുന്ന തലമുറ കണ്ട് പഠിക്കുമ്പോൾ വൃദ്ധസദനങ്ങൾ ഇനിയും വരും വിവാഹിതരാകുന്നവരുടെ എണ്ണം കുറയും
വ്യക്തി എന്ന ആത്മിയസത്തയിൽ നിന്നും ശരീരം മാംസം എന്ന കാഴ്ചപ്പാടിന് പ്രസക്തിയേറും.

Babu Thuyyam
09/03/17

തോഴൻ.

തോഴൻ.

നേർത്തുനേർത്തൊരു ശ്രുതിയിലലിയുന്ന
നോവു നിറഞ്ഞൊരു ഗാനം.
ഹൃദയത്തിൽ നിന്നാരോ പകുത്തെടുത്തോരു
വേദന തന്നുടെ രാഗം.
ഇന്നലെ കണ്ട ദു:സ്വപ്നത്തിൽ നിന്നല്ല
ഉയിർ കൊണ്ടുണർന്നതെൻ ദു:ഖം.
കൂടപിറപ്പുപോൽ ഒപ്പം നടക്കുന്ന
വേർപിരിയാത്തൊരു ഭാവം.
ഊതിപ്പെരുപ്പിച്ചു കനലാക്കിക്കത്തിച്ചു
സ്വയമാ തീയിലുരുകട്ടെ ഞാൻ.
ഒരു ലഹരിയായെന്നിൽ എന്നും നിറയുന്ന
ശോകത്തിനടിമയായ് രസിച്ചു കൊണ്ടും
നിറക്കുക നിങ്ങളീ വിഷചഷകം.
നഷ്ടങ്ങളേറേ രുചിച്ചു ശീലിച്ചൊരീ
ഞാനുമെൻ ദു:ഖവും മാത്രമല്ലേ ?.

23/02/17
Babu Thuyyam

പറയാതെ പോയത്..............!

പറയാതെ പോയത്..............!

ഇപ്പോഴും ഇടക്കൊക്കെ അവളുടെ വീട്ടിൽ വരുമ്പോൾ കാണാറുണ്ട് ഒരിക്കലും പറഞ്ഞില്ലെങ്കിലും അവൾക്കറിയാമെന്ന് എനിക്കറിയാം അങ്ങനെ വിശ്വസിക്കുന്നതാണെനിക്കിഷ്ടം.
ചിരിക്കുമ്പോൾ വിരിയുന്ന നുണക്കുഴികളും, ആ സുന്ദരമായ മുഖവുമോർത്ത് ഉറങ്ങുകയും ഉണരുകയും ചെയ്ത ദിനങ്ങൾ.
അവളുടെ മുന്നിൽ ആളാവാൻ വേണ്ടി കാട്ടിക്കൂട്ടിയതൊക്കെ ഇന്നോർക്കുമ്പോൾ, ആ ഓർമ്മകളിലൂടെ ജീവിക്കുമ്പോൾ മനസ്സിനും കൗമാരക്കാരനാവുന്നു.
പുല്ലരിയുന്ന പാടവരമ്പിൽ, താലമെടുത്തവൾക്ക് സംരക്ഷണം തീർത്ത്, സർക്കസുകാരേക്കൊണ്ട് അവൾക്കിഷ്ട്ടമുളള പാട്ട് പാടിച്ച്, കളികളിൽ കേമനായി, സാഹസങ്ങൾ കാട്ടിയിരുന്നത്. എന്നിട്ടും അവളുടെ മുന്നിൽ ഒറ്റെക്കെത്തുമ്പോൾ എന്തേ ഹൃദയം വേഗത്തിൽ മിടിച്ചിരുന്നത്, എന്തേ ശബ്ദം തൊണ്ടയിൽ കുരുങ്ങിയത് അറിയില്ല.
ഒരു പ്രവാസ കാലത്ത് നല്ലൊരാലോചനയിൽ പെട്ടെന്നു അവളുടെ വീട്ടുകാർ എല്ലാം തീരുമാനിച്ചപ്പോഴേക്കും വൈകിയിരുന്നു. സ്നേഹിതൻമാർ വിളിച്ചു പറഞ്ഞു "നീ ഒരു വാക്ക് പറഞ്ഞാൽ മതിയെന്ന് അവളുടെ വീട്ടുകാരേ നാണം കെടുത്താനും വിഷമമായിരുന്നു.പിന്നെ ജീവിതത്തിനോട് താൽപ്പര്യം നഷ്ട്ടപ്പെട്ട് ഞാനിങ്ങനെയൊക്കെ.........
അവശേഷിക്കുന്ന കാലവും ആ ഓർമ്മകളും സുഖനൊമ്പരവും മാറോട് ചേർത്തുറങ്ങുമ്പോൾ ഇത്രയും എഴുതാതെ വയ്യ.
14.2.17
Babu

പറയാതെ പോയ പ്രണയം. എന്ന ഒരു കഥാ മത്സരത്തിനു വേണ്ടി എഴുതിയത്.

മരണം

മരണം

ജീവിച്ചിരിക്കുമ്പോൾ മരിക്കണം
അതേ അതു തന്നെയാണു പറയുന്നത്
ജീവനുളളപ്പോൾ മരിക്കണമെന്ന്
ചില മരണങ്ങളോട് വല്ലാത്ത ഒരസൂയയാണെനിക്ക്
ഒരു പുരുഷായുസ്സിലെ കടമകൾ എല്ലാം നിറവേറ്റി
വാർദ്ധക്യങ്ങളിൽ മയങ്ങാൻ കിടക്കുമ്പോൾ
ആരുമറിയാതെ ആരേയുമറിയിക്കാതെ
വന്നു വിളിച്ചു കൊണ്ടു പോകുന്ന വ
സദസ്സിനു മുമ്പിൽ തൊഴുകൈകളോടെ പ്രാർത്ഥിച്ച്
വേദി തൊട്ടു വന്ദിച്ച് വിട പറയുക
സ്വപ്നതുല്യമാണത്
ഏറ്റവും പ്രിയപ്പെട്ട സഹപ്രവർത്തകെൻറ മടിയിൽ
കിടന്ന് ജീവിതം സഫലമായി എന്നു മന്ത്രിച്ച്
അറിവില്ലായ്മയുടെ ആഴത്തിലേക്കങ്ങിനെ......
ജോലിക്കിടയിൽ ക്ഷീണം തീർക്കാൻ വെളളം കുടിക്കുമ്പോൾ
എല്ലാ പണിയും കഴിഞ്ഞ് ഉറങ്ങുമ്പോഴൊക്കെ വരുന്നവ
വേരറ്റുപോകുന്ന ചില അനാഥ ജൻമങ്ങളെ ശ്രദ്ധിച്ചിട്ടുണ്ടോ
നിനച്ചിരിക്കാതെ ആരേയും ശല്യപ്പെടുത്താതെ
മരണം വന്നു കൂട്ടിക്കൊണ്ടു പോകുന്ന ഭാഗ്യവാൻമാർ
നന്നായി വയ്യാണ്ടെ കെടന്നാൽ ആര് നോക്കാനാണ്
എ എന്നാളുകൾ പറയുന്നവ
അല്ലാതെ വയസ്സു കൂടി കണ്ണും കാതുമില്ലാതെ
ചലിക്കാൻ പോലുമാകാതേ വെളളമിറക്കാൻ കഴിയാതേ
പലപ്പോഴും മരിച്ചു, മരിച്ചു, എന്നു പറയിപ്പിച്ച്
അടുത്തവരും അകന്നവരും
അകലുന്നതിനു മുമ്പേ മരിക്കണം
ആരോഗ്യത്തോടെയിരിക്കുമ്പോൾ മരിക്കാൻ കഴിയണം
അതേ ജീവിച്ചിരിക്കുമ്പോൾ
ജീവനോടെ
മരിക്കാൻ കഴിയണം

ബാബു.
10/02/17.

ബാക്കി

ബാക്കി

ആരോ ഒരാൾ അകലെ നിന്നു വിലക്കുമ്പോഴും
ആ മനസ്സിെൻറ വേദനയിൽ ഉളളം പിടയുന്നു
എന്തുകൊണ്ടാണു ഞാനിങ്ങനെ ?
മറ്റുളളവരെ വേദനിപ്പിക്കാൻ വേണ്ടിയൊരു ജൻമം
മരണത്തിനും വേണ്ടാത്ത എന്നെ
ഞാൻ പണ്ടേ വെറുത്തതാണല്ലോ
സ്വപ്നങ്ങളും മോഹങ്ങളുമില്ലാതെ
ശിഷ്ട ജീവിതം മറ്റുളളവർക്കായ് മാറ്റിവെക്കുമ്പോൾ
അവിടെയും ദൈവം പരാജയപ്പെടുത്തുന്നു
പോയ ജീവിതത്തിെൻറ നാൾവഴികളോർക്കുമ്പോൾ
ജീവിതത്തിൽ മുറുകെ പിടിച്ച കുറേ ആദർശം മാത്രമുണ്ട് കൂട്ടിന്
ആർക്കും വിലയില്ലാത്തവ
കുറച്ചുകളവും, ചതിയും, വഞ്ചനയുമുണ്ടായിരുന്നെങ്കിൽ
ഇപ്പോളെനിക്കും വിലയുണ്ടായേനേ

ബാബു.
8.2.17

വിധി

വിധി

ആരോഗ്യവും സമ്പത്തും നഷ്ടപ്പെട്ടു കഴിയുമ്പോൾ
പറന്നുയർന്നിരുന്ന ചിറകുകൾക്ക് ഭാരം തോന്നുമ്പോൾ
നമുക്ക് അമ്മയെ ഓർമ്മവരും
എെൻറ കുട്ടിക്കൊരാപത്തും വരുത്തല്ലേ ദൈവമേ എന്ന്
നിത്യേന കരഞ്ഞു പ്രാർത്ഥിക്കാറുളള അമ്മയെ
അപ്പോൾ നമ്മുടെ അശ്വമേധയാത്രയിൽ
നഷ്ടപ്പെട്ട ബന്ധങ്ങളെയോർത്ത്
തെറ്റിപ്പോയ കണക്കുകൾ കൂട്ടുമ്പോൾ
ആദ്യം തെളിയുന്ന മുഖം അമ്മയുടെതു തന്നെയായിരിക്കും
എല്ലാവരുമുണ്ടായിട്ടും നിങ്ങർ
വൃദ്ധസദനങ്ങളിലേക്ക് ആട്ടിയകറ്റപ്പെടുമ്പോൾ
വായിലാ മുലപ്പാലിെൻറ രുചിയുണ്ടായിരിക്കും
ഉത്സവം പോലെ ജീവിതമാഘോഷിച്ച്‌
ആൾക്കൂട്ടത്തിലപരിചിതനാകുമ്പോൾ
വിജയഭേരി മുഴക്കിയിരുന്ന പടവുകളുടെ
താഴെ പടിയിലിരുന്ന് ഓർക്കുമ്പോൾ
ആ പഴയ വീടും കൂട്ടുകാരുമെല്ലാം
നന്മയുടെ സ്വർഗ്ഗങ്ങളായ് മാറും
തെണ്ടാൻ പോലും ഗതിയില്ലാത്ത നിങ്ങൾ
അഭിമാനമോർത്ത് അറച്ചു നിന്നാലും
വിധി കടക്കലേക്കു തന്നെ പാദങ്ങൾ ചലിപ്പിക്കും
പണ്ടു നിങ്ങൾക്കു നേരേ നീട്ടിയ ഭിക്ഷാപാത്രം
ഓർമ്മയിൽ തെളിയുമ്പോൾ
വേദനയിൽ നിങ്ങൾ പുളഞ്ഞു പോകും
ആയ കാലത്ത് ഒന്നു തിരിഞ്ഞു നോക്കാൻ
ശ്രമിക്കാതെ
ഇപ്പോഴവരുടെ കുഴിമാടങ്ങൾക്കരികിലിരുന്നു വിതുമ്പുമ്പോൾ
അവരോടൊപ്പം ലയിച്ചു ചേരാൻ
ആത്മാർത്ഥമായി നിങ്ങളാഗ്രഹിച്ചിരിക്കും.

02/02/17
ബാബു.

പൂമരം

പൂമരം

ചില മരങ്ങളുണ്ട് വറുതിയിൽ പൂക്കുന്നവ
ഇലകളെല്ലാം പൊഴിച്ച് ഒറ്റക്ക്
വേനലിനെ അതിജീവിക്കാൻ
ശിരസുയർത്തി നിൽക്കുന്നവ
ഉടലുപനിക്കുമ്പോഴും അറിയാതെ
എല്ലാ ചില്ലകളിലും നിറയെ പൂത്ത്
കാണികൾക്കു വിരുന്നൊരുക്കി
ഇല്ലായ്മയിലും വസന്തം തീർത്ത്
ജൻമസായൂജ്യമടയുന്നവർ
പൂമരമാകുന്നവർ

ചില മനുഷ്യരുമുണ്ട് അതു പോലെ
ജീവിതകാലം മുഴുവൻ ഓരോന്നു വിചാരിച്ച്
ഒന്നുമാകാൻ കഴിയാതെ പോകുന്നവർ
മററുളളവർക്കു വേണ്ടി കൈ എത്തി പിടിച്ച്
സ്വന്തം ജീവിതം നഷ്ടപ്പെട്ടു പോകുന്നവർ
അവരും ഇതുപോലെ തന്നെ
മറ്റുളളവർക്ക് വസന്തമാണ്
പ്രവാസിയുടെ ജീവിതം പോലെ
കാണുന്നവർക്കു സന്തോഷം നൽകി
സ്വയം ഉരുകി വെളിച്ചമായ് മാറുന്നവർ

ഇനിയും ചിലരുണ്ട്
അവർ സൗരഭ്യത്തോടെ പൂത്തു നിൽക്കുന്നവരായിരുന്നു
അതു കണ്ടു മോഹിച്ച് സ്വന്തമാക്കി
സൗന്ദര്യവും ചൈതന്യവും ഊറ്റിയെടുത്ത്
ഈ ജന്മങ്ങളെ ഉപേക്ഷിക്കുമ്പോൾ
നിസ്സഹായതയോടെ നാളെയെ കുറിച്ചോർത്ത്
ദൈവത്തിെൻ്റ കരുണ ക്കായ്
ആകാശത്തിലേക്ക് കൊമ്പുകളുയർത്തി
മരം പോലെ നിൽക്കുന്നവർ
ഭർത്താവായും കാമുകനായുമൊക്കെ വന്ന്
എല്ലാം പങ്കിട്ടു നൽകുമ്പോൾ
അവർക്കറിയില്ലല്ലോ
നാളെ കൊച്ചു കൊച്ചു തെറ്റുകൾ പോലും
വലുതാക്കി
വഴിയിലുപേക്ഷിക്കുമെന്ന്

29/01/17
ബാബു

ഭ്രാന്തെൻറ ചിരി

ഭ്രാന്തെൻറ ചിരി

ജീവിതം പലപ്പോഴും അങ്ങിനെയാണ്
ഓർക്കാനിഷ്ടപ്പെടാത്തവയെല്ലാം

തിരമാലകൾ പോലെ വന്നുലച്ചു കൊണ്ടിരിക്കും.

ഉന്മാദത്തിെൻറ നേർത്ത അതിർവരമ്പുകളിലൂടെ
സഞ്ചരിക്കുന്നവരുണ്ട് പലപ്പോഴും

എന്തൊക്കെയോ ഭാഗ്യത്തിന്
വഴിതെറ്റാത്തവർ

തെറ്റും ശരിയും സമൂഹം
തീരുമാനിക്കുമ്പോൾ
വിഹ്വലതയോടെ മനസ്സിനെ അടക്കി പിടിച്ച്
അവസാനം ഒരഗ്നിപർവ്വതംപോലെ
പൊട്ടിതെറിക്കുമ്പോൾ

അത് ഭ്രാന്താണ്

കാണുന്നവർക്കും കേൾക്കുന്നവർക്കും.

സദാ പിറുപിറുത്തു നടക്കുന്ന
ചിലതു കണ്ടാൽ വന്യമായി പ്രതികരിക്കുന്ന
ഓടിയൊളിക്കുന്നവനെയൊക്കെ
നമുക്ക് ഭ്രാന്തനെന്നു വിളിക്കാം.

എന്നാൽ

കാരുണ്യത്തിെൻറ കുപ്പായമിട്ട്
ആവോളം സമ്പാദിക്കാനായി
പാവങ്ങളെ ബലിയാടാക്കുന്നവരേയോ ?

എത്ര കിട്ടിയാലും പോരാ പോരാ
എന്നു നിനച്ച് ഒരു ജീവിതം പോലും
ആസ്വദിക്കാതെ
മരിച്ചു പോകുന്നവരേയോ ?

സുഗന്ധങ്ങൾ പൂശി
കണ്ണില്ലാത്ത കാമം
സ്വന്തം ചോരയിൽ,
പിഞ്ചു ബാലികകളിൽ,
വൃദ്ധരിൽ
തീർക്കുന്നവരേയോ ?

ഇന്നത്തെ പണത്തിെൻറ ഹുങ്കിൽ
അധികാര ഗർവ്വിൽ
മനുഷ്യനെ ചവിട്ടിയരച്ചു കൊന്ന്
ആത്മ നിർവൃതിയടയുന്നവരേയോ ?

ഒരു തലോടൽ,
ഒരു പുതപ്പ്,
കുറച്ചു സ്നേഹം
മാത്രം മതി
ഭ്രാന്തൻ മനുഷ്യനാവാൻ

ഭ്രാന്തില്ലാത്തവ െൻറ ഭ്രാന്ത്
എന്നാണ് എങ്ങിനെയാണ് മാറ്റുക
ഇതൊക്കെ ഓർത്താവും
ഭ്രാന്തൻ ചിരിക്കുന്നത്

26/01/17
ബാബു.

കാത്തിരിപ്പ്

കാത്തിരിപ്പ്

നമ്മളിൽ ചിലരുണ്ട്
നമ്മോടൊപ്പം എന്നും
കളിച്ചും ചിരിച്ചും നടന്ന്
ആശുപത്രികളിൽ
അഭയം പ്രാപിക്കുന്നവർ
ഒന്നും പറയാനാകാതേ
ഈ കൂട്ടത്തിൽ
ചേരാൻ കഴിയാതെ
വിങ്ങിപ്പൊട്ടുന്നവർ
ആർക്കും അറിയില്ല
അവരെ കുറിച്ച്
എവിടെയൊക്കെയോ
പോയ് മറയുന്ന......
ചില FB.ID കൾ മാത്രം.

എന്നാൽ മറ്റൊന്നുണ്ട്
അവരെ കാണാൻ കഴിയാതെ
സങ്കടപ്പെടുന്നവർ
ഒന്നന്വേഷിക്കാൻ പോലുമാകാതേ
സ്വയം ശപിച്ചും
കാണേണ്ടായിരുന്നു
എന്ന് ആശിച്ചു പോകുന്നവർ
ഇടക്കെങ്ങാനും ഒരു
പച്ച ലൈയ്റ്റ് കണ്ടാൽ
മഴതുളളി കിട്ടിയ വിത്തു പോലെ
മുളപൊട്ടുന്ന ഹൃദയമുളളവർ
വന്നു കണ്ടു കീഴടക്കി
മറയുന്നവരോട്
വീണ്ടും വരുമെന്നു
പറയാതെ പോകുന്നവരോട്
നമുക്കെന്തു ചെയ്യാൻ കഴിയും
കാത്തിരിക്കുകയല്ലാതെ
ബാബു
23/01/17

ഞാൻ സിദ്ധാർത്ഥൻ

ഞാൻ സിദ്ധാർത്ഥൻ

സഹജീവികളുടെ ദു:ഖങ്ങൾ
കണ്ണീറനണിയിക്കുമ്പോൾ
ആർത്തനാദങ്ങളും ദൈന്യതയും
എെൻറ വിശപ്പിനെ കൊല്ലുമ്പോൾ
ഭൂമിയുടെ ഹൃദയം തുരന്നെടുത്ത്
രക്തവും മാംസവും വിറ്റ്
പണക്കാരനാവാൻ കൊതിക്കുമ്പോൾ
തോടും, കുളവും, കാടും
മരുഭൂമിക്ക് വഴിമാറുമ്പോൾ
എെൻറ പുഴ എെൻറ
വേദനയാകുമ്പോൾ
മനുഷ്യനന്മക്കായ്
പിറന്നവരുടെ പേരിൽ
മനുഷ്യനെ കൊല്ലാൻ
വിറളിപൂണ്ടോടുമ്പോൾ
ഇസങ്ങളുടെ പേരിൽ
തെറ്റ് ശരിയായി കാണുമ്പോൾ
ആർത്തിയിൽ നിഷ്കാമനായി
കൊട്ടാരം വിട്ടോടിയകലുന്ന
സിദ്ധാർത്ഥനാകുന്നു ഞാൻ.
ഈ ബോധവൃക്ഷ ചുവട്ടിലാണ്
എെൻറ തപസ്സ്.

19/01/17
Babu Thuyyam