അച്ഛൻ (കവിത )

നേരം വൈകി,യൊരു 

പുലരിയോടൊപ്പമെത്താൻ 

കിതപ്പിനെ കീഴടക്കിയോടു-

ന്നവർക്കിടയിലൂടെ 

ഓരോ ദിവസവും 

നടന്നുനീങ്ങുകയാണ്;

വെന്തുരുകിയ കാലുകൾ 

നെട്ടോട്ടങ്ങൾക്കു പ്രാപ്തമല്ലെങ്കിലും. 

തിളച്ചുമറിയുന്ന വെള്ളത്തിലേക്ക് 

നാഴിയരിയിട്ട് 

പെറ്റവയറിനെപ്പോറ്റിയെ-

ന്നുറപ്പുവരുത്താൻവേണ്ടി;

പരാതികളെയടക്കിപ്പിടിച്ച പാതിക്കുവേണ്ടി;

മിഠായിമധുരങ്ങളെ കാത്തുനില്ക്കുന്ന 

കുരുന്നുകൾക്കുവേണ്ടി. 

വർണ്ണവ്യതിയാനങ്ങളിൽ ചാലിച്ചൊരുക്കിയ 

അംബരവിസ്മയങ്ങളെ

ആസ്വദിക്കാൻ മറന്നുപോയവന്‍റെ 

നെട്ടോട്ടത്തെക്കുറിച്ചാണ്, 

അവന്‍റെ വേദനകളെക്കുറിച്ചാണ്.

കാതോർത്താൽമാത്രം കേൾക്കാവുന്ന 

ഗൗരവക്കാരന്‍റെയിടനെഞ്ചിലെ 

പിടപ്പുകളുടെ സമ്പന്നതയെക്കുറിച്ചാണ്.

പ്രതീക്ഷകളെപ്പേറുന്ന പുലരിയിലെ

വൈകിയ നേരങ്ങളെ 

പിറുപിറുത്തുതോല്പിച്ചോടുന്ന

അച്ഛനെക്കുറിച്ചാണ്.

Sent from my Huawei phone