അരുത് I കവിത I Riyas Pulikkanni

പറക്കമുറ്റാത്ത കുരുവികളാണ്

ചിറകടിക്കാൻ പഠിക്കുമുമ്പേ

കൂരവിട്ട് ഇര തേടാൻ പറയരുത്,

പറന്നുയരണമെങ്കിൽ

ആദ്യം നിവർന്നു നിൽക്കാൻ

പഠിക്കണ്ടേ .

ചിത്ര ശലഭങ്ങളൊത്ത്

ഓടികളിക്കേണ്ട 

ചെറു ബാല്യങ്ങളാണ്

ചുമട് എടുക്കാൻ അയക്കരുത്,

കാലത്തിൻ ചുവടുവെച്ച്

നടക്കണമെങ്കിൽ ആദ്യം

കലാലയത്തിൻ പടികടക്കണ്ടേ .

വളരാൻ കൊതിക്കുന്ന 

തലമുറയാണ്

വളരുന്ന മുമ്പേ 

വേലയെടുക്കാൻ പഠിപ്പിക്കരുത്,

ഉയരങ്ങൾ കീഴടക്കണമെങ്കിൽ

അറിവിൻ ഗോവണി കയറണ്ടേ.

നാടിന് കരുത്ത് പകരേണ്ട

കരങ്ങളാണ് 

ഭിക്ഷയെടുപ്പിച്ച് ബലി കൊടുക്കരുത്

ഈ ചെറുബാല്യങ്ങളെ .

ഒന്ന് ഓർത്തുനോക്കൂ,

ഇലതളിർക്കുന്നപാടെ  

തണൽ മരങ്ങളെ 

ആരെങ്കിലും മുറിക്കാറുണ്ടോ?

കുടയായ് അത് നിവരണമെങ്കിൽ

മരമായി തന്നെ വളരണ്ടേ .

✍️ റിയാസ് പുലിക്കണ്ണി

📱8129568629