ഉപ്പാന്റെ രാജകുമാരി .....

ഉപ്പാന്റെ രാജകുമാരി .....

ഉപ്പാ എന്നെ കൂടി കൊണ്ടോകോ ഗൾഫിലേക്ക് ? അയാൾ ലീവ് കഴിഞ്ഞ് മടങ്ങാൻ നേരം മകൾ അരികിലായ് വന്നു നിന്നു ചോദിച്ചു ....

മകളുടെ ചോദ്യം കേട്ട് ഭാര്യ തട്ടത്താൽ തുളുമ്പി വന്ന കണ്ണുനീർ തുടച്ചു മുഖം തിരിച്ചു ...
വിതുമ്പി നിൽക്കുന്ന ഭാര്യയെ ഒന്നു നോക്കിയ ശേഷം അയാൾ മകളെ എടുത്ത് മടിയിലിരുത്തി .

മോളേ ഉപ്പ ജോലിക്കല്ലേ പോകുന്നേ ? അപ്പോ എങ്ങനെ മോളേയും കൊണ്ടോകും ? മോളെ കൊണ്ടോയാ ഉമ്മാക്ക് ആരാ കൂട്ടുണ്ടാവുക ? അയാൾ അവളെ നെഞ്ചോട് ചേർത്ത് ചോദിച്ചു ..

ഉപ്പാക്ക് അപ്പോ അവിടെ ആരാ കൂട്ടിന് ? ഉപ്പാ തനിച്ചാകൂലെ .. ഉമ്മാക്ക് ഞാൻ ഉപ്പാക്കൊപ്പം വന്നാലും ഇവിടെ വല്ല്യുമ്മച്ചീം വല്ല്യുപ്പച്ചീം അമ്മായീം ഒക്കെ ഉണ്ടല്ലോ ??? എന്നെക്കൂടി കൊണ്ടോ ഉപ്പാ പ്ലീസ് .. അവൾ കൊഞ്ചി കൊണ്ട് ചോദിച്ചു ...

മോള് ഉപ്പച്ചീടെ രാജകുമാരിയല്ലേ ? ഗൾഫിൽ എന്തോരം കഷ്ടപ്പാടാന്ന് മുത്തിന് അറിയൂലാ .. എപ്പോഴും ജോലി ചെയ്യണം , എപ്പോഴും ആഹാരം കഴിക്കാനൊന്നും പറ്റൂലാ , ആരേയും കാണാൻ പറ്റൂലാ , ഒറ്റയ്ക്ക് ഒരു മുറില് താമസിക്കണം , കൂട്ടുകാരുണ്ടാകൂലാ ... എന്റെ പൊന്നിന് അതൊന്നും പറ്റൂലാ .. മുത്തിനെ രാജകുമാരിനെ പോലെ നോക്കാനല്ലേ ഉപ്പ ഈ കഷ്ടപ്പെടുന്നത് ... എന്റെ മോള് പഠിച്ച് നല്ല ആളായി കാണാനല്ലേ ഉപ്പാ ഇത്രേം ദൂരത്ത് പോയി ജോലി ചെയ്യണത് ..
എന്റെ മോള് ഉമ്മാന്റെ കൂടെ ഇവിടെ നിക്കൂട്ടോ .. ഉപ്പച്ചി പോയിട്ട് വേഗം തിരിച്ചു പോരാം ...

അയാൾ അവളെ ഒരുവിധം ആശ്വസിപ്പിച്ചു ...

ഉപ്പച്ചി അപ്പോ ഇനി വന്നിട്ട് പോകുമ്പോ എന്നേയും കൊണ്ടോകോ ? അവൾ വീണ്ടും തന്റെ ആവശ്യം രേഖപ്പെടുത്തി .....

ഓക്കെ .. അടുത്ത തവണ വന്നിട്ട് പോകുമ്പോ എന്റെ രാജകുമാരിയെയും ഉപ്പച്ചി കൊണ്ടോകാട്ടോ ..
അതു കേട്ടതും അവൾ സന്തോഷത്താൽ അയാളെ കെട്ടിപ്പിടിച്ച് കവിളിലൊരു മുത്തം നൽകി .. അയാളും തുളുമ്പി വന്ന കണ്ണുനീർ തുടച്ചു കൊണ്ട് മകളെ വാരിപ്പുണർന്നു ..

........................................

ഇന്ന് ആ ഉപ്പാന്റെ രാജകുമാരി അവളുടെ ആഗ്രഹം പോലെ തന്നെ പ്രവാസജീവിതത്തിലാണ് ... അന്ന് ഉപ്പ പറഞ്ഞ കഷ്ടപ്പാടുകളുടെ ലോകത്ത് ... ഉറ്റവരേയും ഉടയവരേയും വിട്ട് ഇങ്ങ് ദൂരെ മണലാരണ്യത്തിലാണ് അവളുടെ വിധി അവളെ കൊണ്ടെത്തിച്ചത് ....

ഒരിക്കൽ പോകാൻ ആഗ്രഹിച്ചിടത്ത് ഇന്ന് മനസ്സില്ലാ മനസ്സോടെ ജീവിതം തളളിനീക്കുന്ന അവസ്ഥ ... കണ്ണുനീർ വറ്റാത്ത ദിനരാത്രങ്ങളിൽ ജീവിക്കാൻ പ്രേരിപ്പിക്കുന്ന പ്രതീക്ഷയുടെ ഒരു കണികയെങ്കിലുമുണ്ടാകുമെന്ന് വിശ്വസിച്ച് അവൾ ഇന്നും ജീവിക്കുന്നു ........

ലിജിയ ഷാനവാസ്

വിതച്ചതേ കൊയ്യൂ

ഡാ .. വിനൂ ... നോക്ക്യേടാ നമ്മടെ പുഷ്പമാഡത്തിനെ .. എന്തൊരു ഫിഗറാല്ലേ ? ശ്യാം വിനായകനോടായ് പതിയെ പറഞ്ഞു .

പുഷ്പ ഓഫീസിലെ സീനിയർ അക്കൗണ്ടന്റ് ആണ് . ഭർത്താവ് ഗൾഫിൽ 2 പെൺകുട്ടികൾ 35 വയസ്സിന് മുകളിൽ പ്രായം . സുന്ദരി . ആരു കണ്ടാലും ഒന്നു നോക്കും . മാന്യമായ പെരുമാറ്റം എല്ലാരോടും സ്നേഹം ..

ശ്യാം ഒന്നുടെ വിനു വിനോട് ചേർന്ന് ഇരുന്നു .
ഡാ .. ഇടയ്ക്ക് മാഡം സാരി ഉടുക്കുമ്പോൾ നീ ശ്രദ്ധിച്ചിട്ടുണ്ടോ ? ഹോ എന്തൊരു ഭംഗിയാ ? എന്താ ബോഡി ഷേപ്പ് . കടഞ്ഞെടുത്ത പോലെ . നോക്കി നിന്നു പോകും . അവരുടെ ഭർത്താവ് എന്തൊരു മണ്ടനാ ? ഇത്രേം സുന്ദരിയായ ഭാര്യയുള്ളപ്പോ എങ്ങനെ അന്യനാട്ടിൽ മനസ്സമാധാനത്തോടെ കഴിയാൻ പറ്റും?

2 പെൺമക്കൾ അല്ലേടാ ശ്യാമേ അവർക്ക് കെട്ടിച്ചു വിടണ്ടേ ? ഇന്നത്തെ കാലത്ത് നല്ലോണം സമ്പാധിക്കാതെ പറ്റോ ? വിനു ന്യായം പറഞ്ഞു .

ഉം .. ഭർത്താവ് അവിടെ കിടന്ന് സമ്പാധിക്കുന്നു . ഭാര്യ ഇവിടെ നമ്മുടെയൊക്കെ ഉറക്കം കളയുന്നു . ഇവര് ഇത്രേം സുന്ദരിയായി ഒരുങ്ങിക്കെട്ടി വരുന്നത് തന്നെ മറ്റുള്ളവരെ ആകർഷിക്കാനല്ലാന്ന് ആർക്കറിയാം .. ഇത്രേം പറഞ്ഞ് ശ്യാം തന്റെ സീറ്റിലേക്ക് പോയി . വിനു ഒന്നു നെടുവീർപ്പെട്ടു ..

വൈകിട്ട് അവർ കാന്റീനിൽ ചായ കുടിച്ചിരുന്നപ്പോൾ കൂടെ ജോലി ചെയ്യുന്ന മനു അവിടെയ്ക്ക് വന്നു . പെങ്ങളുടെ കല്യാണം പ്രമാണിച്ച് ഒരാഴ്ചയായ് മനു ലീവിൽ ആയിരുന്നു .

ഹായ് ശ്യാം ഹായ് വിനു .. സുഖല്ലേ ??

ഹാ സുഖം സുഖം . കല്യാണമൊക്കെ ഉഷാറായില്ലേ ? ഗുരുവായൂര് വച്ചായതോണ്ട് വരാൻ പറ്റീല്ലാ . സോറി ...ശ്യാം പറഞ്ഞു .

സാരല്യാ Reception വെക്കുന്നുണ്ട് ഞായറാഴ്ച്ച അതു ക്ഷണിക്കാനാ ഞാൻ വന്നത് . അന്ന് തീർച്ചയായും വരണം എല്ലാരും .. മനു ക്ഷണിച്ചു .

ഓ sure ഞങ്ങൾ എത്തിക്കോളാം . വിനു സമ്മതം മൂളി .

ഹാ .. അത് പറഞ്ഞപ്പോഴാ ഓർത്തത് .
Belated Wedding Anniversary wishes ശ്യാം .. കല്യാണത്തിരക്കിൽ പറയാൻ വിട്ടു . ഇന്നലെ FB യിൽ ഫോട്ടോ കണ്ടപ്പോഴാ ഓർത്തത് . എത്ര വർഷമായെടാ ? മനു തിരക്കി .

7 yrs .. 2 കുട്ടികൾ . ശ്യാം പറഞ്ഞു ..

ആഹാ .. But വൈഫിനെ കണ്ടാൽ പറയില്ലാട്ടോ .. ഒരു കൊച്ചു സുന്ദരി തന്നെ . എന്തൊരു shape ആ ഫോട്ടോയിൽ കണ്ടിട്ട് . ഹാ അപ്പോ നേരിട്ട് എന്താകും . എന്റെമ്മോ .

ഛീ .. എന്തു പറഞ്ഞെടാ .. ശ്യാം ചീറി കൊണ്ട് മനുവിന് നേരേ ചെന്നു . നാണമില്ലേ നിനക്ക് മറ്റൊരാൾടെ ഭാര്യയെ ഇങ്ങനെ നോക്കി വെള്ളമിറക്കാൻ . നിനക്ക് വീട്ടിൽ ഒരുത്തി ഉണ്ടല്ലോ അവളെ പോയി നോക്കടാ .. ശ്യാം മനുവിനോട് കയർത്തു .
ഡാ .. മതി ആളുകൾ ശ്രദ്ധിക്കുന്നു . വിനു ശ്യാമിനെ പിടിച്ചു മാറ്റി .

സോറി ശ്യാം ഞാൻ ഒരു തമാശ പറഞ്ഞതാ . നിനക്ക് ഫീല് ചെയ്യുമെന്ന് കരുതീലാ . I am really sorry .. ഇത്രേം പറഞ്ഞ് മനു തിരികെ നടന്നു .

ശ്യാം അസ്വസ്ഥനായി കസേരയിൽ ഇരുന്നു .
വ്യത്തികെട്ടവൻ . ഇവനെ ഒക്കെ നല്ല പത്തല് വെട്ടി അടിക്കണം ശ്യാം പിറുപിറുത്തു .

അപ്പോ നിന്നെയോ .. വിനു ശ്യാമിനോടായ് പറഞ്ഞു .

ശ്യാം ചോദ്യഭാവത്തിൽ വിനുവിനെ നോക്കി ....

അവൻ നിന്റെ ഭാര്യയെ കുറിച്ച് പറഞ്ഞതിലും മോശമായല്ലേ നീ രാവിലെ പുഷ്പമാഡത്തെ കുറിച്ച് സംസാരിച്ചത് . അപ്പോ നീയും അവനും തമ്മിൽ എന്ത് വ്യത്യാസം ??
ഡാ ... നമുക്ക് മറ്റുള്ളവരെ എന്തും പറയാം നമ്മളെ ആരും ഒന്നും പറയരുത് എന്ന് പറഞ്ഞാൽ എങ്ങനെ ശരിയാകും ? നിന്റെ ഭാര്യയെ പറഞ്ഞപ്പോ നിനക്ക് നൊന്തു . അപ്പോ നീ മാഡത്തെ കുറിച്ച് പറഞ്ഞപ്പോ അവർക്കും ഇല്ലേ നിന്നെ പോലെ ഒരു ഭർത്താവ് . എന്റെ സ്ഥാനത്ത് അയാൾ ആയിരുന്നേൽ നിന്റെ പല്ല് അടിച്ച് തെറുപ്പിച്ചേനേ ?

ഞാൻ നീ അത് പറഞ്ഞപ്പോ നിന്നെ എതിർത്ത് സംസാരിച്ചിരുന്നേൽ നാളെ നീ പറഞ്ഞേനേ ഞാനും ആ സ്ത്രീയും തമ്മിൽ ബന്ധമുണ്ടെന്ന് . അത് അറിയാവുന്നത് കൊണ്ട് തന്നെയാ ഞാൻ മിണ്ടാണ്ടിരുന്നത് .

നിന്റെ ഭാര്യയൊയോ അമ്മയെയോ സഹോദരിയേയോ ഏതെലും ഒരുത്തൻ അനാവശ്യം പറഞ്ഞാൽ നിനക്ക് പൊള്ളുന്ന പോലെ തന്നെയാ നീ മറ്റൊരുത്തന്റെ ഭാര്യയെയോ അമ്മയേയോ സഹോദരിയേയോ പറ്റി പറയുമ്പോ അവർക്കും പൊള്ളുന്നത് . സ്വന്തം കണ്ണിലെ കരട് ആദ്യം എടുക്ക് എന്നിട്ട് മറ്റുള്ളവരെ നന്നാക്കാൻ നോക്ക് . ഒരു പെണ്ണിനെ നോക്കി അനാവശ്യം വിളിച്ച് പറയുമ്പോ നൂറുവട്ടം ചിന്തിക്കണം ഞാൻ ഒരു പെണ്ണിനെ പറയുമ്പോൾ എന്റെ വീട്ടിലെ പെണ്ണിനെ പറ്റി നൂറുപേര് പറയുന്നുണ്ടാകുമെന്ന് . അന്യ സ്ത്രീകളെ ബഹുമാനിക്കുന്നവനെ സ്വന്തം കുടുംബത്തിലെ സ്ത്രീകൾ ബഹുമാനിക്കപ്പെടണമെന്ന് വാശിപ്പിടിക്കുവാനുള്ള അവകാശമുള്ളൂ .

ഇത് നിന്നെ പോലെയുള്ളവൻമാർക്ക് ഒരു പാഠമായിരിക്കട്ടേ .. ഇത്രേം പറഞ്ഞ് വിനു സ്വന്തം സീറ്റിലേക്ക് പോയി ..

ശ്യാമിന് തന്റെ തെറ്റുബോധ്യമായി . അവൻ പതിയെ എഴുന്നേറ്റ് തന്റെ ഇരിപ്പിടത്തിലേക്ക് നടന്നു . അപ്പോൾ എതിരെ പുഷ്പമാഡം കാന്റീനിലേക്ക് നടന്നു വരുന്നുണ്ടായിരുന്നു .

എന്താ ശ്യാം .. Anything wrong . മാഡം തിരക്കി .

Nothing മാം ... ശ്യാം പുഞ്ചിരിച്ചു മറുപടി നൽകി ..

ഇത്തവണ അവർ അവനെ കടന്ന് പോയശേഷം പതിവായ് അവൻ ചെയ്യാറുള്ളത് പോലെ അവരെ പിൻതിരിഞ്ഞ് നോക്കിയതേ ഇല്ല .

ലിജിയ ഷാനവാസ്

ശ്രുതി

സമയം രാത്രി 8 മണി . കല്ല് പാകിയ വഴിയിലൂടെ ശ്രുതി പതിയേ നടന്നു . ഈ സമയമായത് നന്നായി വഴിയിൽ അധികം ആളനക്കമില്ല . ഇന്നെങ്കിലും ഇങ്ങനെ ഒരു തീരുമാനം എടുത്തില്ലെങ്കിൽ ചിലപ്പോ ആഷിക്കിനെ തനിക്ക് എന്നെന്നേക്കുമായി നഷ്ടപ്പെടും . അച്ഛന്റെ തീരുമാനത്തിന് വഴങ്ങിക്കൊടുക്കേണ്ടി വരുന്ന അവസ്ഥ ഓർത്തപ്പോൾ ഇതാണ് ശരിയെന്നു തോന്നി . സൂരജേട്ടൻ പാവമാണ് . ദുബായിൽ നല്ല ജോലിയി മുണ്ട് . തന്റെ അമ്മാവന്റെ മകൻ തന്നെ . അമ്മായിക്കും അമ്മാവനും തന്നെ ജീവനാണ് . സൂരജേട്ടന്റെ അനിയത്തി ശ്രീക്കുട്ടിക്ക് തന്നെ ഒരുപാട് ഇഷ്ട്ടമാണ് . അവൾ ഇടക്കിടക്ക് ഏട്ടത്തീന്നു വിളിച്ച് കളിയാക്കാറുമുണ്ട് . പക്ഷേ തനിക്ക് ഇതുവരെ സൂരജേട്ടനോട് അങ്ങനെ ഒരിഷ്ടം തോന്നിയിട്ടില്ല.

താൻ ഇഷ്ടപ്പെട്ടതും സ്നേഹിച്ചതും ആഷിക്കിനെ യാണ് . രണ്ടു മതത്തിൻ പെട്ടവരാണേലും ആഷിക്കിന് താനെന്നു വച്ചാൽ ജീവനാണ് . തന്റെ ഒരിഷ്ടത്തിനും അവൻ എതിരുനിന്നിട്ടില്ല . മുസ്ലിം ആയിട്ട് കൂടി താൻ ജീൻസ് ഇടുന്നതും സ്ലീവ് ലെസ് ടൊപ്പ് ഇടുന്നതും അവന് ഇഷ്ടമായിരുന്നു . തന്നെ അങ്ങനെയുള്ള ഡ്രസ്സിൽ കാണാൻ നല്ല ചേലാണെന്ന് അവൻ എപ്പോഴും പറയും .

ഒരിക്കൽ അവന്റെ ഒപ്പം പാർക്കിൽ ഐസ് ക്രിം കഴിച്ചിരുന്നപ്പോൾ ആണ് തന്റെ അടുത്ത വീട്ടിലെ വീണ ചേച്ചീം ഹസ്ബന്റും തങ്ങളെ കണ്ടത് . ചേച്ചി അത് വീട്ടിൽ അമ്മയോട് പറഞ്ഞു . തിരികെ വീട്ടിലെത്തിയ തന്നെ ആദ്യമായി അമ്മ ഒരുപാട് തല്ലി . അച്ഛൻ അപ്പോഴും തന്നെ സപ്പോർട്ട് ചെയ്തതാണ് . പക്ഷേ ആഷിക്കിനെ കുറിച്ച് അന്വേഷിച്ചപ്പോഴേക്കും അച്ഛന്റെ സ്വഭാവം മാറി . അവൻ തനിക്ക് ചേർന്ന ആളല്ലെന്നാണ് അച്ഛന്റെ വാദം . അച്ഛനെയും കുറ്റം പറയാൻ പറ്റില്ല താൻ ഒറ്റ മകൾ അല്ലെ ? അന്യജാതിക്കാരന്റെ ഒപ്പം പോയാൽ നാണക്കേട് അല്ലേ കുടുംബത്തിന് . അതു കൊണ്ടാണ് അച്ഛൻ എതിർത്തത് .

പക്ഷേ അതിന് ആഷിക്കിനെ കുറ്റം പറയണ്ട കാര്യമുണ്ടോ . അവനെ സ്നേഹിച്ചു പോയതാണോ താൻ ചെയ്ത തെറ്റ് ? മാതാപിതാക്കൾ എന്തുകൊണ്ട് മക്കളെ മനസ്സിലാക്കുന്നില്ല . അവരുടെ സ്നേഹം അംഗീകരിക്കുന്നില്ല . അവരും ഈ പ്രായം കഴിഞ്ഞല്ലേ വന്നത് . അവരെ മനസ്സിലാക്കുന്നതിന് പകരം എതിർക്കുന്നത് ശരിയാണോ ? ജാതീം മതവും നോക്കി പ്രേമിക്കാൻ പറ്റുമോ ? ഇതു അറിഞ്ഞ് തന്റെ കൂടെ നിൽക്കുന്നതിന് പകരം അച്ഛൻ ചെയ്തതോ സൂരജേട്ടനുമായുള്ള വിവാഹം നിശ്ചയിച്ചു . തന്നോട് ഒരു വാക്ക് പോലും ചോദിച്ചില്ല . അതാണ് തനിക്ക് ദേഷ്യം വന്നത് . അതുകൊണ്ടാ താൻ ആരോടും പറയാതെ ഇറങ്ങി പോന്നത് .

മുൻപ് ഒരു തവണ ആഷിക്കിന്റെ കൂടെ അവന്റെ വീട്ടിൽ വന്നിട്ടുണ്ട് . അന്ന് ആരും ഉണ്ടായിരുന്നില്ല അവിടെ . കുറച്ച് നേരം സംസാരിച്ചിരുന്നിട്ട് തിരിച്ചു പോന്നു . ഇടക്ക് അവൻ ചില കുസൃതിയൊക്കെ കാട്ടാൻ നോക്കി പക്ഷേ താൻ വിലക്കി . കല്ല്യാണം കഴിഞ്ഞ് മതിയെന്ന തന്റെ വാശിയിൽ അവസാനം അവൻ സമ്മതിച്ചു. ഇനി എന്തായാലും തങ്ങൾ ഒരുമിക്കാൻ പോകുവല്ലേ . അതോർത്തപ്പോൾ അവൾക്ക് എന്തെന്നില്ലാത്ത സന്തോഷം തോന്നി . താൻ ചെല്ലുന്നത് അവന് ഒരു സർപ്രൈസ് ആകും . വിളിച്ച് പറയാഞ്ഞത് നന്നായി.

അങ്ങനെ ഓരോന്ന് ചിന്തിച്ച് നടന്ന് അവൾ അവന്റെ വീടിനു മുന്നിലെത്തി . ഹാ ബൈക്ക് മുറ്റത്തുണ്ട് . അപ്പോ ആള് അകത്തുണ്ടെന്നുറപ്പ് . പക്ഷേ ലൈറ്റുകളൊന്നും ഇട്ടട്ടില്ല . അവൾക്ക് ആകെ ഒരു വല്ലായ്ക തോന്നി അപ്പോഴാണ് ഒരു മുറിയിൽ നിന്ന് മാത്രം വെളിച്ചം പുറത്തേക്ക് വരുന്നത് അവൾ കണ്ടത് . അവൾ പതിയെ ആ വശത്തേക്ക് ചെന്നു . അടക്കി പിടിച്ച സംസാരവും ഒരു പെണ്ണിന്റെ ചിരിയും കേൾക്കുന്നുണ്ട് . അവൾ പതിയെ ജനലരികിൽ ചേർന്ന് നിന്നു . പാതി തുറന്നു കിടന്ന ജനലിലൂടെ അകത്തേക്ക് നോക്കിയ അവൾക്ക് തന്റെ കണ്ണുകളെ വിശ്വസിക്കാനായില്ല .

താൻ ആർക്ക് വേണ്ടിയാണോ ജീവിച്ചത് ആർക്ക് വേണ്ടിയാണോ തന്റെ മാതാപിതാക്കളെ ഉപേക്ഷിച്ചത് . ആർക്ക് വേണ്ടിയാണോ എല്ലാം ഇട്ടെറിഞ്ഞ് പുറപ്പെട്ടു പോന്നത് ആ അയാൾ മറ്റൊരു പെണ്ണിനൊപ്പം . അവൾക്ക് തല കറങ്ങുന്നത് പോലെ തോന്നി . വേഗം അവൾ അവിടെ നിന്നിറങ്ങി എങ്ങോട്ടെന്ന് ലക്ഷ്യമില്ലാതെ നടന്നു . അധികം നടന്നില്ല ഒരു കാർ അവളുടെ മുന്നിൽ നിന്നു . അതിൽ നിന്ന് അവളുടെ അച്ഛൻ പുറത്തേക്ക് ഇറങ്ങി . അച്ഛനെ കണ്ടതും അവൾ അതുവരെ അടക്കി വച്ച സങ്കടം അണപൊട്ടി ഒഴുകാൻ തുടങ്ങി . അദ്ദേഹം അവളെ ചേർത്ത് പിടിച്ച് നെറുകയിൽ ഒരു മുത്തം നൽകി .

ഇന്ന് ശ്രുതി സന്തോഷവതിയാണ് . അവളുടെ വിവാഹമാണ് ഇന്ന് സൂരജുമൊത്ത് . ചെയ്ത തെറ്റുകൾക്ക് അവൾ അമ്മയോടും അച്ഛനോടും മാപ്പ് പറഞ്ഞു. സൂരജിനോട് എല്ലാം തുറന്ന് പറഞ്ഞു അവൾ . എല്ലാം കേട്ട ശേഷം അവൻ ഒന്നു പുഞ്ചിരിച്ചു . നീ എന്റെ പെണ്ണാണ് . അത് ആരു വിചാരിച്ചാലും മാറ്റാൻ കഴിയില്ല അവളെ ചേർത്ത് നിർത്തി അവൻ ചെവിയിൽ മന്ത്രിച്ചു .....

ലിജിയ ഷാനവാസ്

നെരിപ്പോടുകൾ ......

നെരിപ്പോടുകൾ ......
റഹിമിക്കാ ... എണ്ണീറ്റേ സുബഹി ബാങ്ക് കൊടുത്തു . ഇങ്ങക്ക് പോണ്ടേ ..
അബു റഹിമിക്കാനെ തട്ടി വിളിച്ചു .
മ്മ് ... ഒരു ഞെരക്കത്തോടെ റഹിം മിഴികൾ തുറന്നു.
അലാറം അടിച്ചത് ഇങ്ങള് കേട്ടില്ലേ ? ഇന്നെന്താ ഒരു പുതുമ എണ്ണീക്കാൻ ഒരു മടി . അബു പതിയെ റഹിമിന്റെ കൈകളിൽ തൊട്ടു .
പടച്ചോനേ പൊള്ളുന്നുണ്ടല്ലോ ? ഇങ്ങക്ക് പാടില്ലേ ഇക്കാ ? പനി ആയിട്ടുണ്ടല്ലോ ?
അബു റഹീമിന്റെ നെറ്റിയിൽ കൈവെച്ചു .
യാ റബ്ബീ ചുട്ടു പൊള്ളണു . ഒരു കാര്യം ചെയ്യ് ഇങ്ങള് ഇന്ന് പോണ്ടാ . അലമാരിയിൽ പാനടോൾ ഉണ്ട് ഒരു ചായ കുടിച്ചിട്ട് അത് കഴിച്ച് റെസ്റ്റ് എടുക്ക് . വൈകുന്നേരമാകുമ്പോ കുറഞ്ഞോളും .
റഹിം പതിയെ എഴുന്നേറ്റു .
അതു പറ്റില്ല അബു . പോകാണ്ടിരുന്നാൽ എങ്ങനെയാ . അർബാബ് അല്ലെങ്കിൽ തന്നെ ഒരു കാരണം കിട്ടാൻ കാത്തു നിക്കാ . അയ്യാൾടെ കൈയ്യും കാലും പിടിച്ചിട്ടാ വിസ ഒന്നു പുതുക്കീത് . ഒരു ദിവസം പോലും ലീവാക്കരുതെന്നാ മൂപ്പരുടെ ആജ്ഞ . അല്ലേങ്കിൽ തന്നെ ഓര്ക്ക് എന്നെ പറഞ്ഞ് വിടാൻ ഒരു കാരണം നോക്കി നിക്കാ ... ഞാൻ പോയ്ക്കോളാം ഇയ്യ് കുറച്ച് കട്ടനിട് ഞാൻ ഒന്നു റെഡിയാകട്ടേ ... ഇത്രേം പറഞ്ഞ് റഹിം ബാത്ത്റൂമിലേക്ക് പോയി . 
അബു നിസംഗതയോടെ നോക്കി നിന്നു .
റഹിമിന് അറുപത് വയസിന് അടുത്ത് പ്രായം വരും . മുപ്പത്തഞ്ചാം വയസ്സിൽ ദുബായിലേക്ക് വന്നതാ പല ജോലികൾ മാറി മാറി ചെയ്തു . രാത്രിയും പകലും ഒരു പോലെ കഷ്ടപ്പെട്ടു .അവസാനം മുൻസിപാലിറ്റിയിൽ ക്ലീനിംഗ് വിഭാഗത്തിൽ ജോലി കിട്ടി .എന്നും സുബഹിക്ക് പോകണം തന്റെ പരിധിയിൽ വരുന്ന റോഡും പരിസരവും മുഴുവനും വ്യത്തിയാക്കണം . പാതിരാത്രി വരെ കഷ്ടപ്പെട്ടാലും പലപ്പോഴും ചീത്ത കേൾക്കേണ്ടിവരും . പൊരിവെയിലത്തും പെരുംമഴയത്തും പോലും പണിയെടുക്കണം .കിട്ടുന്ന തുച്ഛമായ വരുമാനത്തിൽ ചിലവ് കഴിച്ച് വീട്ടിലേക്ക് അയക്കണം . പലപ്പോഴും കുമ്പുസിലും തൈരിലും വിശപ്പടക്കേണ്ടി വരാറുണ്ട് .
3 പെൺകുട്ടികളാണ് റഹിമിന് . 25 വർഷത്തിനിടയ്ക്ക് കിട്ടുന്ന കാശ് സ്വരുക്കൂട്ടിവെച്ച് മക്കളെ കെട്ടിച്ചയച്ചു . 
പക്ഷേ മക്കളുടെയും സഹോദരങ്ങളുടെയും ആവശ്യങ്ങൾ അവസാനിക്കുന്നേ ഉണ്ടായിരുന്നില്ല . ഓരോ മാസവും ഓരോരോ ആവശ്യങ്ങൾ പറഞ്ഞ് നാട്ടിന്ന് ഫോൺ വിളികൾ വന്നു കൊണ്ടേയിരുന്നു . ഇപ്പോൾ ഇളയ മകൾക്ക് വീടുപണിയാണത്രേ . അതിന് കാശയക്കാനുള്ള ഓട്ടത്തിലാണ് റഹിം .
വുളു എടുത്ത് റഹിം പുറത്ത് വന്നു . നമസ്ക്കരിച്ച ശേഷം തന്റെ യൂണിഫോം ധരിച്ച് പോകാൻ തയ്യാറായി . അപ്പോഴേക്കും അബു കട്ടൻ തയ്യാറാക്കി വെച്ചിരുന്നു . ഒരു ബ്രഡിനൊപ്പം അതു കുടിച്ച് 2 പനഡോളും കഴിച്ച് സലാം പറഞ്ഞ് റഹിം പുറത്തേക്കിറങ്ങി (ഗൾഫുകാർക്ക് എത്ര പനി വന്നാലും പനഡോളിൽ ഒതുങ്ങും അവരുടെ ചികിത്സ ) . റഹിം പോകുന്നതും നോക്കി അബു അങ്ങിനെ നിന്നു ...
ഇത് ഒരു റഹിമിന്റെ കഥയല്ല . ഗൾഫുനാടുകളിലെ തെരുവു വീഥികളിൽ നമുക്ക് കാണാൻ കഴിയും ഇതുപോലെ ഒരായിരം ജന്മങ്ങളെ . നമ്മൾ ഉപേക്ഷിക്കുന്ന ചപ്പുചവറുകൾ പെറുക്കി , തെരുവുകൾ തോറും വൃത്തിയാക്കി , എവിടെയെങ്കിലും ഇരുന്ന് തങ്ങളുടെ വിശപ്പടക്കുന്ന ഒരായിരം ജന്മങ്ങളെ . എത്രയൊക്കെ അസുഖങ്ങൾ വന്നാലും അതൊന്നും കണക്കാക്കാതെ കഷ്ടപ്പെട്ടു പണമുണ്ടാക്കി നാട്ടിലുള്ള കുടുംബത്തേക്ക് അയച്ചുകൊടുക്കുന്നവർ . 
അതിലൊക്കെ കഷ്ടം പലരും 50 വയസ്സിന് മുകളിൽ പ്രായമുള്ളവരാവും . നമ്മൾ മക്കൾ എന്തുകൊണ്ടാണ് ഇങ്ങനെ ചെയ്യുന്നതെന്ന് മനസ്സിലാകുന്നില്ല . ഒരു പ്രായം കഴിഞ്ഞാൽ തങ്ങളുടെ മാതാപിതാക്കളോട് വിശ്രമജീവിതം നയിക്കാൻ എന്തു കൊണ്ട് ആവശ്യപ്പെടുന്നില്ല ? മക്കൾ സമ്പാദിച്ചു തുടങ്ങിയാൽ എന്തുകൊണ്ടാണ് ആ പണത്തിന് അവന്റെ ഭാര്യയ്ക്കും മക്കൾക്കും മാത്രം അവകാശമുണ്ടാകുന്നത് ? വളർത്തി വലുതാക്കിയ മാതാപിതാക്കൾ എന്തുകൊണ്ടാണ് ഭാര്യയോ മക്കളോ ജീവിതത്തിലേക്ക് കടന്നു വരുമ്പോൾ അന്യരാവുന്നത് ? 
ഗൾഫുരാജ്യങ്ങളിൽ കിടന്നു കഷ്ടപ്പെടുന്ന ഭർത്താവിനെയോ ബാപ്പാമാരെയോ കുറിച്ച് എന്ത്കൊണ്ട് നാട്ടിലുള്ളവർ ചിന്തിക്കുന്നില്ല . ഓരോരോ ആവശ്യങ്ങൾ പറഞ്ഞ് വിളിക്കുമ്പോൾ അവരുടെ സുഖവിവരങ്ങൾ കൂടി എന്ത് കൊണ്ട് അന്വേഷിക്കുന്നില്ല ? ഒരു പ്രായം കഴിഞ്ഞാൽ അവരോട് തിരികെ പോരുവാൻ എന്ത് കൊണ്ട് ആവശ്യപ്പെടുന്നില്ല ?
നമ്മുടെ മാതാപിതാക്കൾക്ക് എന്ത് നൽകുന്നോ അതോ നമുക്ക് നാളെ നമ്മുടെ മക്കളിൽ നിന്നും തിരിച്ചു കിട്ടുകയുള്ളൂ ... ഓരോ മാതാപിതാക്കൾക്കും പടച്ചോൻ ആഫിയത്ത് നൽകുമാറാകട്ടേ ... ആമീൻ ...
ലിജിയ ഷാനവാസ്

നേരം കൊല്ലികൾ .....

നേരം കൊല്ലികൾ .....

കേശൂ ടാ കേശു .. ഒന്നിറങ്ങി വാടാ പുറത്തേക്ക്.. അടഞ്ഞുകിടക്കുന്ന വാതിലിൽ നോക്കി നാണു വിളിച്ചു ...
ഓ .. ആരാ അവിടെ ?? അകത്തുനിന്ന് കേശുവിന്റെ ശബ്ദം പുറത്തേക്ക് വന്നു ...
ഞാനാടാ നാണു .....
ഹോ നാണുവോ ... ഞാൻ ദാ വരണൂ . വാതിൽ തുറന്ന് കേശു പുറത്തേക്ക് വന്നു .
എന്താടാ അതിരാവിലെ കിടന്നു തൊള്ളതുറക്കുന്നത് ?
അതിരാവിലെയോ എടാ 8 മണി ആയി നിനക്ക് ഇപ്പോഴാന്നോ നേരം വെളുത്തത് ? നാണു കളിയാക്കി ചോദിച്ചു .
ഹോ ... അതോ .. ഇന്നലെ രാത്രി കുമാരന്റെ കൂടെ മീൻ പിടിക്കാൻ പോയി അതാ എഴുന്നേൽക്കാൻ വൈകിയത് .. നീ എന്തിനാ വിളിച്ചത് കാര്യം പറ .

ഹോ... അതേ ആ സുകുമാരൻ നായരുടെ മകളില്ലേ മീനാക്ഷി ?
ഏത് ആ കോളേജിൽ പഠിക്കണപെണ്ണോ ?
ഹാ അതു തന്നെ . അവൾ ഇന്നു രാവിലെ ഒരു ഓട്ടോകാരന്റെ ഒപ്പം ഒളിച്ചോടീന്ന് ....
സത്യാണോടാ നാണു നീയീ പറയണത് ? എനിക്കപ്പോഴേ തോന്നിയതാ ആ പെണ്ണിന്റെ മട്ടും ഭാവവും കാണണായിരുന്നു . നമ്മളെയൊക്കെ വെറും പുച്ഛമായിരുന്നില്ലേ അവൾക്ക് . ഒരു വലിയ സുന്ദരിക്കോത . ആരോടും മിണ്ടില്ല . നിലത്തു നോക്കിയേ നടക്കൂ . അവസാനം ഒരു ഓട്ടോക്കാരനെയാണോ അവക്ക് കിട്ടീത് .
പ്രേമത്തിന് കണ്ണും മൂക്കും ഒന്നും ഇല്ലന്നല്ലേ കേശൂ പറയണത് നാണു കളിയാക്കി പറഞ്ഞു .
വന്നേ നമുക്ക് അത്രേടം വരെ ഒന്നു പോവാം .
അതു ശരിയാ എന്താ നടക്കുന്നതെന്ന് അറിയാല്ലോ? ഞാൻ ഇപ്പോ വരാം ഈ മുണ്ടൊന്ന് മാറി ഉടുക്കട്ടേ . കേശു അകത്തേക്ക് പോയി .
എടീ ശാന്തേ ... ടീ ഈ പണ്ടാരം എവിടെ പോയി കിടക്കുന്നു ? കേശു മുണ്ട് മാറുന്നതിനിടയിൽ ഭാര്യയെ വിളിച്ചു .
എന്താ മനുഷ്യാ നിങ്ങള് കിടന്ന് തൊള്ള തുറക്കുന്നത് ? ഞാൻ ഇവിടെ പിന്നാംപുറത്തുണ്ട് . നിങ്ങള് കാര്യം പറ ശാന്ത ഒച്ചയെടുത്തു .
ടീ നമ്മുടെ സുകുമാരൻ നായരുടെ മകൾ മീനാക്ഷിയില്ലേ അവൾ ഒരു ഓട്ടോകാരന്റെ ഒപ്പം ഒളിച്ചോടീന്ന് ...
ഏത് ആ സുന്ദരിക്കോതയോ ? അവളുടെ മട്ടും ഭാവവും കണ്ടാൽ പറയില്ലല്ലോ ഇത്രേം വലിയ ഒരു കള്ളത്തരം ഒളിപ്പിച്ചാ നല്ലപിള്ള ചമഞ്ഞ് നടന്നിരുന്നതെന്ന് ? ഹോ എന്തായിരുന്നു അവളുടെ അഹങ്കാരം .. ശാന്ത പിറുപിറുത്തു കൊണ്ട് വേലിക്കരികിലേക്ക് നടന്നു ...
എടീ സുമതീ ,, സുലോചനേ നിങ്ങളറിഞ്ഞോ?? അവൾ അടുത്ത വീട്ടിലേക്ക് നോക്കി ഉച്ചത്തിൽ വിളിച്ചു ...
ആ വീട്ടിന്റെ പിൻഭാഗത്തു നിന്ന് രണ്ട് സ്ത്രിരത്നങ്ങൾ പുറത്തേക്ക് വന്നു . എന്താ ശാന്തേച്ചീ എന്താ പ്രശ്നം? കൂട്ടത്തിൽ ചെറിയവൾ ചോദിച്ചു ....
സുലു .. നമ്മുടെ സുകുമാരൻ നായരുടെ മോളില്ല അവൾ ഒരു ഓട്ടോക്കാരന്റെ ഒപ്പം ഇന്നു രാവിലെ ഒളിച്ചോടീന്ന് .....
ഈശ്വരാ ... നേരാണോ ചേച്ചി ... അവൾ ആളു കൊള്ളാല്ലോ കണ്ടാൽ ഒരു പാവം .. പൂച്ചക്കുട്ടിയേ പോലെ ഇരുന്നിട്ട് ഇപ്പോ കലം ഉടച്ചുകളഞ്ഞല്ലോ ? എന്താ പെണ്ണിന്റെ ധൈര്യം . സുലോചന മൂക്കത്ത് വിരലു വെച്ചു ...
ഇത്രേയുമായപ്പോഴേക്കും കേശവൻ പുറത്തേക്ക് വന്നു .
ടീ ഞാനും നാണുവും കൂടി അത്രേടം വരെ ഒന്നു പേയേച്ചും വരാം . കേശു പോകാൻ ഒരുങ്ങി .
നിക്ക് മനുഷ്യാ ഞാനും വരുന്നു . ശാന്ത വേഗം അകത്തേക്ക് പോയി ഒരു മേൽമുണ്ട് എടുത്തുടുത്ത് പോകാൻ തയ്യാറായി .
എന്നാൽ ഞാനുമുണ്ട് കൂടെ ... സുമതിയും ശാന്തക്കൊപ്പം കൂടി . അങ്ങനെ അവർ സുകുമാരൻ നായരുടെ വീടു ലക്ഷ്യമാക്കി നടന്നു....

സ്ഥലത്തെ പ്രമാണിമാരിൽ ഒരാളാണ് സുകുമാരൻ നായർ. 2 മക്കൾ . മൂത്തത് മകൻ മനു ശങ്കർ വിദേശത്ത് ജോലി ചെയ്യുന്നു . ഇളയവൾ മീനാക്ഷി ഡിഗ്രിക്ക് പഠിക്കുന്നു . നായര് കൃഷിയും മറ്റുമായ് കുടുംബത്ത് തന്നെ . ഭാര്യ മാധവി അമ്മ . നാട്ടുകാർക്ക് പണത്തിന് ആവശ്യം വരുമ്പോഴോക്കെ നായര് പണം പലിശക്ക് കൊടുക്കുമായിരുന്നു . ക്രിത്യ സമയത്ത് പണം തിരികെ നൽകിയില്ലെങ്കിൽ പണയ പണ്ടം തിരിച്ചുകൊടുക്കില്ലെന്ന് മാത്രമല്ല മറ്റുള്ളവരുടെ മുന്നിൽ വെച്ച് കടം വാങ്ങിയവരെ അപമാനിക്കുകയും ചെയ്യുമായിരുന്നു . അതു കൊണ്ട് തന്നെ നാട്ടുകാർക്ക് അയാളോട് ഒരു ശത്രുത ഉടലെടുത്തിരുന്നു .
മകളുടെ ഒളിച്ചോട്ടക്കഥ അതു കൊണ്ട് തന്നെ നാട്ടിൽ ഒരു ചൂടൻ സംസാരവിഷയമായി . അറിഞ്ഞവർ അറിഞ്ഞവർ കഴിവിന്റെ പരമാവധി മറ്റുള്ളവരിൽ എത്തിക്കാൻ ശ്രമിച്ചു . അതു കൊണ്ട് തന്നെ നിമിഷ നേരം കൊണ്ട് നാട്ടുകാർ മുഴുവനും കാര്യമറിഞ്ഞ് നായരുടെ വീടു ലക്ഷ്യമാക്കി നടന്നു .
നാണുവും കൂട്ടരും അകലെ നിന്നു തന്നെ കണ്ടു നായരുടെ വീട്ടിനു മുന്നിലെ ജനക്കൂട്ടം . അവരും പതിയെ ആ ജനക്കൂട്ടത്തിന്റെ ഭാഗമായി തീർന്നു .
സുകുമാരൻ നായർ വീട്ടിന്റെ ഉമ്മറത്ത് ചാരുകസേരയിൽ മലർന്ന് കിടക്കുന്നുണ്ട് . ഒരു വിഷാദ ഭാവം അയാളുടെ മുഖത്ത് തങ്ങി നിൽക്കുന്നു . അകത്തുനിന്ന് മാധവി അമ്മയുടെ തേങ്ങിക്കരച്ചിലുകൾ കേൾക്കാം . സുമതിയും ശാന്തയും പതിയെ അടുക്കള ഭാഗത്തേക്ക് പോയി. നാണുവും കേശുവും ഉമ്മറത്ത് കൂട്ടം കൂടി നിന്ന ആളുകളുടെ അരികിലേക്ക് ചെന്നു.
ചായക്കടക്കാരൻ സുഗതൻ ചേട്ടൻ ചിലരോടായി കാര്യം വിവരിക്കുന്നുണ്ട്. കേശു സുഗതൻ ചേട്ടന്റെ അരികിലേക്ക് ചെന്നു .

ചേട്ടാ ... എന്താ സംഭവിച്ചത് ? ആരാ കണ്ടത് ? കേശു തിരക്കി ...
എടാ നമ്മുടെ കടയിൽ പാലു കൊണ്ടുവരുന്ന സുശീലനാ കണ്ടത് . അമ്പലത്തിൽ പോകാൻ ഇറങ്ങിയ പെണ്ണ് വഴിയിൽ വച്ച് ഒരു ഓട്ടോ യിൽ കയറി പോകുന്നത് അവൻ കണ്ടൂന്ന് . കടയിലേക്ക് പാലു കൊണ്ടുവരുന്ന വഴിയായിരുന്നു . കണ്ട പാതി അവൻ കടയിൽ വന്നു പറഞ്ഞു .
ഹോ എന്നാലും ആ പെൺകൊച്ചിന്റെ ഒരു ധൈര്യമേ . അല്ല ചേട്ടാ ഏത് ഓട്ടോകാരനാ ? സുശീലൻ ആളെ കണ്ടോ ? വല്ല മേത്തനോ നസ്രാണിയോ മറ്റോ ആണോ ?
അതറില്ല കേശു . അവൻ അവള് ഓട്ടോ യിൽ കയറുന്നതേ കണ്ടുള്ളൂ . ആരാ എന്താ എന്നൊന്നും അറിയില്ല. അല്ലെങ്കിലും അമ്പലത്തിൽ പോകുന്നേന് ഓട്ടോ യിൽ കയറുന്നതെന്തിനാ ? 15 മിനുറ്റ് നടത്തമല്ലേ ഉള്ളൂ . അപ്പോ ഇത് നിശ്ചയിച്ച് ഉറപ്പിച്ചിട്ട് പോയതു തന്നെയാ . വല്ല പണമോ പണ്ടമോ കൊണ്ടുപോയിട്ടുണ്ടോ എന്തോ .....
പാവം നായരുടെ കിടപ്പു കണ്ടോ ? മോള് പോയതറിഞ്ഞ് കിടന്ന കിടപ്പാ ഒരക്ഷരം മിണ്ടീട്ടില്ല . മാധവി ചേച്ചിയാണേൽ കരച്ചിലോട് കരച്ചിലാ . മക്കളിങ്ങനെ തുടങ്ങിയാൽ മാതാപിതാക്കൾ എന്തു ചെയ്യും ?
ഹാ ... അതും ശരിയാ . എത്ര പണമുണ്ടായിട്ടെന്താ പോയ മാനം തിരിച്ചു കിട്ടോ? കേശു ആത്മഗതം പറഞ്ഞു .

അറിഞ്ഞും കേട്ടും നായരുടെ വീട്ടിലേക്ക് ജനം ഒഴുകിയെത്തി . വരുന്നവരോടൊക്കെ തങ്ങളാലാവുന്ന വിധം പൊടിപ്പും തൊങ്ങലും വച്ച് സുഗതൻ ചേട്ടനും നാണുവും കേശുവും കഥ വിവരിച്ചുകൊണ്ടിരുന്നു . സ്ത്രികൾക്കിടയിൽ സുമതിയും ശാന്തയും അവരാൽ കഴിയും വിധം കഥ മെനഞ്ഞുണ്ടാക്കി അവതരിപ്പിച്ചു .
പെട്ടെന്നാണ് ഒരു ഓട്ടോറിക്ഷ നായരുടെ വീടിനു മുന്നിൽ വന്നു നിന്നത് . അതിൽ നിന്ന് ഇറങ്ങിയവരെ കണ്ട് കൂടിനിന്ന ജനം അന്തംവിട്ട് പരസ്പരം നോക്കി .

ഓട്ടോറിക്ഷയിൽ നിന്ന് മീനാക്ഷിയും അവളുടെ തൊട്ടുപിന്നാലെ സുകുമാരൻ നായരുടെ അമ്മ ഭവാനി അമ്മയും പുറത്തേക്കിറങ്ങി . ഓട്ടോ കാശ് കൊടുത്ത് തിരിഞ്ഞു നോക്കുമ്പോഴാണ് വീട്ടിനു മുന്നിലെ ആൾക്കൂട്ടം അവരുടെ ശ്രദ്ധയിൽ പെട്ടത് .
അച്ഛമ്മേ ... വീട്ടിന് മുന്നിൽ എന്താ ഒരു ആൾക്കൂട്ടം മീനാക്ഷി സംശയത്തോടെ തിരക്കി .
ഈശ്വരാ ഇനി സുകുമാരനോ മാധവിക്കോ എന്തെങ്കിലും പറ്റിയോ .. ഭവാനിയമ്മ വേഗം വീടു ലക്ഷ്യമാക്കി നടന്നു പിന്നാലെ മീനാക്ഷിയും .
മോനേ സുകുമാരാ ... നിലവിളിച്ചു കൊണ്ട് ഭവാനിയമ്മ വീടിനുമ്മറത്തേക്ക് പ്രവേശിച്ചു .
അമ്മയുടെ നിലവിളി കേട്ട് സുകുമാരൻ നായർ ചാരുകസേരയിൽ നിന്ന് വേഗം എഴുന്നേറ്റു .
അമ്മേ ... നായർ അമ്മയ്ക്ക് അരികിലേക്ക് ചെന്നു
ഭവാനിയമ്മയുടെ കൂടെ മീനാക്ഷിയെ കണ്ട് നായർ അമ്പരന്നു . മോളെ നീ .. നായർ ചോദ്യഭാവത്തിൽ മകളെ നോക്കി .
മോനെ നിനക്കൊന്നും പറ്റീല്ലെ .. മാധവി എവിടെ? എന്താ ഇവിടെ ഒരു ആൾക്കൂട്ടം ? മോളെ മാധവീ ... ഭവാനി അകത്തേക്ക് നോക്കി വിളിച്ചു .
ഉമ്മറത്ത് സംസാരം കേട്ട് മാധവി പുറത്തേക്ക് വന്നു.
പുറത്ത് ഭവാനിയമ്മയേയും മീനാക്ഷിയേയും കണ്ട് മാധവി ഒന്നു അമ്പരന്നു . അവർ വേഗം മകളുടെ അരികിലേക്ക് ചെന്നു .
മോളെ നീ എവിടെയായിരുന്നു ഇത്രയും നേരം ? ഞങ്ങൾ എന്തുമാത്രം വിഷമിച്ചെന്നറിയോ ? മാധവി മകളെ ചേർത്തു പിടിച്ചു കൊണ്ട് ചോദിച്ചു.
അത് അമ്മേ ... ഞാൻ അമ്പലത്തിൽ പോകുന്ന വഴി അച്ഛമ്മയെ കണ്ടു. അച്ഛമ്മ ആശുപത്രിയിൽ പോകുകയായിരുന്നു . ഷുഗർ ടെസ്റ്റ് ചെയ്യാൻ . ഞാൻ നോക്കിയപ്പോ കൂടെ ആരുമില്ല . രാവിലെ തന്നെ ഭക്ഷണമൊന്നും കഴിക്കാതെ തനിച്ച് പോയാൽ വല്ല വയ്യാഴ്ക വന്നു പോയാൽ ആരും കൂടെയില്ലല്ലോ എന്നോർത്തപ്പോ ഞാനും അച്ഛമ്മയുടെ കൂടെ ആ ഓട്ടോറിക്ഷയിൽ കയറി പോയി . ഫോൺ എടുക്കാതെ പോയതുകൊണ്ടാ വിളിച്ചു പറയാതിരുന്നത് . അതും അല്ല അധികം വൈകിയൊന്നുമില്ലല്ലോ ? ഞാൻ ചിലപ്പൊഴോക്കെ ഇതുപോലെ വൈകാറുണ്ടല്ലോ കൂട്ടുകാരികളെ എങ്ങാനും കണ്ടാലും മറ്റും . ഇന്നെന്താ ഇത്ര പ്രതേകത . അതുപോലെ ഇതെന്താ വീടിനു മുന്നിൽ ഇത്രയും ജനക്കൂട്ടം . ഇവരൊക്കെ എന്താ ഇവിടെ ? മീനാക്ഷി പുറത്തേക്ക് നോക്കി ചോദിച്ചു.

ഉമ്മറത്തു നടക്കുന്ന സംഭവങ്ങൾ കണ്ടു ഒന്നും മിണ്ടാതെ നിൽക്കുകയാണ് പുറത്ത് കൂടിയ ജനങ്ങൾ . അവർ പരസ്പരം മുഖത്തേക്ക് നോക്കി . ചിലരുടെ ഒക്കെ നോട്ടം ചായക്കടക്കാരൻ സുഗതൻ ചേട്ടനിൽ ആണ് . പുള്ളിക്കാരന്റെ കടയിൽ നിന്നാണല്ലോ കഥയുടെ ആരംഭം . സുഗതൻ ചേട്ടനാണേൽ എന്തു ചെയ്യണമെന്നറിയാതെ നിലത്തേക്ക് മിഴികളൂന്നി നിൽക്കുന്നു.

സുകുമാരൻ നായർ കത്തുന്ന മിഴികളോടെ പുറത്തു നിൽക്കുന്ന ആളുകൾക്ക് നേരെ തിരിഞ്ഞു .
"ഏത് ചെറ്റയാടാ പറഞ്ഞത് എന്റെ മോള് ഒളിച്ചോടീന്ന് . ഏതവനാടാ കണ്ടത് അവൾ കാമുകന്റെ കൂടെ പോകുന്നത് . പറയെടാ നാറികളെ ... ഓരോരുത്തവൻമാര് എറങ്ങിക്കോളും മാനംമര്യാദയായിട്ട് ജീവിക്കുന്നവരെ നാറ്റിക്കാനായിട്ട് . നിന്റെയൊക്കെ കുടുംബത്താണ് ഇങ്ങനെ ഒക്കെ നടന്നതെങ്കിൽ നീയൊക്കെ ഇങ്ങനെ വിളിച്ചു കൂവി നടക്കുമോടാ . ആരാന്റെ അമ്മക്ക് ഭ്രാന്ത് പിടിച്ചാൽ കാണാൻ നല്ല ചേലാണല്ലേ . എന്റെ കയ്യിന്ന് കാശും വാങ്ങി എന്റെ കുടുംബത്തെ നാറ്റിക്കാൻ ഇറങ്ങിയേക്കുന്നു അലവലാതികൾ . നീയൊക്കെ ഇനി ഇങ്ങ് വാ കാശും ചോദിച്ചോണ്ട്. ഒറ്റ ഒരെണ്ണം ഈ പടി കടന്ന് വന്നേക്കരുത് . ഇപ്പോ എറങ്ങിക്കോണം എല്ലാവൻമാരും എന്റെ പറമ്പിന്ന് . ഒരെണ്ണത്തിനെ ഇവിടെ കണ്ടു പോയാൽ വെട്ടുകത്തി എടുക്കും ഞാൻ .
ഛീ എറങ്ങിനടാ എല്ലാം." സുകുമാരൻ നായർ ചീറി .

നിമിഷ നേരം കൊണ്ട് ജനക്കൂട്ടം നാലു വഴിക്കും ഓടി . അവിടം ആളൊഴിഞ്ഞ ഉത്സവ പറമ്പു പോലെയായി.

വാ അമ്മേ ... നമുക്ക് അകത്തേക്ക് പോകാം . ഭക്ഷണം ഒക്കെ കഴിച്ച് വൈകുന്നേരം അമ്മ തറവാട്ടിലേക്ക് പോയാൽ മതി . നായർ അമ്മയേയും വിളിച്ച് അകത്തേക്ക് പോയി പിന്നാലെ മീനാക്ഷിയും മാധവിയും

ശുഭം

ലിജിയ ഷാനവാസ്

പാദസരം,,

പാദസരം,,

അവളുടെ പാദസരത്തിന്റെ കിലുക്കം അത് അവന്റെ ഹൃദയ താളമായിരുന്നു . എന്നും രാവിലെ അവൾ ക്ലാസിലേക്ക് പടികൾ കയറി ഓടി വരുമ്പോൾ അവന്റെ ഇടനെഞ്ചിൽ പെരുംമ്പറ കൊട്ടുമായിരുന്നു . എന്തു ചോദിച്ചാലും തർക്കുത്തരം മാത്രം നൽകുന്ന തന്റെ ജുനിയറിനോട് അവന് എന്തെന്നില്ലാത്ത ആവേശമായിരുന്നു. കുട്ടുകാർ വിലക്കിയിട്ടും അവൻ അവളെ തന്നെ വളച്ചെടുക്കുമെന്നു് ബെറ്റ് വെച്ചപ്പോ നീ കൊണ്ടാലെ പഠിക്കുമെന്നു് അവന്റെ ഒരു സുഹൃത്ത് മുന്നറിയിപ്പ് നൽകി...

അവളെ കാണാനായി അവൻ മനപ്പുർവ്വം പഠിക്കാതെ വന്നു , ടീച്ചർ പുറത്താക്കിയപ്പോ ഒരു മൂളിപ്പാട്ടും പാടി അവളുടെ പാദസരകിലുക്കവും പ്രതീക്ഷിച്ച് വരാന്തയിൽ കാത്തിരുന്നു , അവൾ അരികിലെത്തിയപ്പോ അവനു ഒരു മോഹം പാദസരം അണിഞ്ഞ ആ കാലിൽ ഒന്നു തൊടണം , കൂട്ടുകാരനെ ചട്ടം കെട്ടി , അവളെ എന്തെങ്കിലും പറഞ്ഞു ഒന്നു പിടിച്ചു നിർത്താൻ . കൂട്ടുകാരൻ വാക്കു പാലിച്ചു ,ഈ തക്കത്തിന് നമ്മുടെ കഥാനായകൻ അവളുടെ കാലുകളിൽ മൃദുവായി സ്പർശിച്ചു , ആദ്യം അവൾ കരുതിയത് അവൻ അറിയാതെ ആയിരിക്കുമെന്നാണ് , അവൾ പ്രതികരിക്കുന്നില്ലെന്നു കണ്ട അവൻ തന്റെ രണ്ടു കൈകൾ കൊണ്ട് അവളുടെ പാദത്തിൽ ചേർത്തു പിടിച്ചു.....

ടപ്പോ ,,,

ഒച്ച കേട്ടു നോക്കിയവർ കണ്ടത് കവിളിൽ കൈ കൊടുത്ത് ഇരിക്കുന്ന പാവം കാമുകനെ ആണ്.

ഇനി മേലിൽ അനുവാദമില്ലാതെ ഒരു പെണ്ണിനേയും തൊട്ടു പോകരുതെന്ന ഒരു ശാസനയോടെ അവൾ പാദസരം കിലുക്കി നടന്നകന്നു.....

ഇപ്പോഴ് അവനു പാദസരം പോയിട്ട് പാ എന്നു കേൾക്കുമ്പോൾ തന്നെ ഒരു ഇതാ ,,, എന്തോ ഒരു ഇത്‌ ,,,,,

ലിജിയ ഷാനവാസ്

ഞാൻ ഒരു രഹസ്യം പറയാം ,,

ഞാൻ ഒരു രഹസ്യം പറയാം ,,

ദേ നിങ്ങളെ വിശ്വസിച്ചു പറയാട്ടോ ആരോടും പറയരുത് .
ഞാൻ 8 ആം ക്ലാസ്സിൽ പഠിക്കുന്ന കാലം . Border സിനിമ കണ്ടു കഴിഞ്ഞപ്പോ ഒരു പൂതി ,കല്ല്യാണം കഴിക്കുന്നെങ്കിൽ പട്ടാളക്കാരനെ കല്ല്യാണം കഴിക്കണം . പക്ഷേ എന്തു ചെയ്യാൻ എന്റെ നാട്ടിൽ ഒരു പട്ടാളക്കാരനെ മഷിയിട്ടു നോക്കീട്ടും കിട്ടാനില്ല .
ക്ലാസിൽ ടീച്ചർ ആരാകാനാ താത്പര്യമെന്ന് എല്ലാരോടും ചോദിക്കുമ്പോൾ , ക്ലാസിലെ ഓരോ ആൺകുട്ടിയുടെ മുഖത്തേക്കും പ്രതീക്ഷയോടെ ഞാൻ നോക്കും , ഒരുത്തനെങ്കിലും പട്ടാളക്കാരനാകണമെന്നു പറയുമെന്നുപ്രതീക്ഷിച്ച് , എവിടെ എല്ലാർക്കും ഡോക്ടറും എഞ്ചിനീറും ആയാൽ മതി.
അങ്ങനെയിരിക്കെ എന്റെ ഇത്താത്താടെ കല്യാണം റെഡിയായി , ഇത്താത്താനു വെച്ചാ എന്റെ മൂത്തുമ്മാന്റെ മകൾ , അവരൊക്കെ അങ്ങ് തൊടുപുഴയിലാ താമസം ,

കുടുംബത്ത് ഒരു കല്യാണം എന്നു വച്ചാ ഞങ്ങൾക്ക് ഉത്സവമാ, മക്കളും കൊച്ചുമക്കളുമൊക്കെയായി തകർക്കും 1 ആഴ്ച്ച: അങ്ങനെ ഞങ്ങൾ ഫാമിലിയായി പെരുമ്പാവൂരിലെ തറവാട്ടിലേക്ക് തിരിച്ചു , അവിടുന്നു എല്ലാവരും ഒന്നിച്ച് തൊടുപുഴയിലേക്ക്.
തൊടുപുഴ എത്ര ഭംഗിയുള്ള നാട് , അങ്ങനെ ഞങ്ങൾ മൂത്തുമ്മാടെ വീട്ടിലെത്തി , മൂത്തൂമ്മാ താമസിക്കുന്നത് പാടി ( Quarters) യി ലാണ് . അവിടെ ഒരു പാട് കുടുംബങ്ങൾ താമസിക്കുന്നുണ്ട് . മൂത്തുമ്മാ താമസിക്കുന്നതിന്റെ നേരേ എതിർ വീട്ടിൽ ഒരു കൂട്ടർ താമസിക്കുന്നുണ്ട് . അവിടുത്തെ പെണ്ണ് എന്റെ ഇത്താത്താടെ ചങ്ങാതിയാണ് . അവൾടെ കല്ല്യാണവും തീരുമാനിച്ചു വച്ചിരിക്കാണത്രേ . ഇത്താത്ത പറഞ്ഞപ്പോഴാ അറിയുന്നത് ആ പെണ്ണിന്റെ സഹോദരൻ പട്ടാളത്തിലാണെന്ന് , ഒന്നുകൂടി പറഞ്ഞു അയാൾ ഇപ്പോ ലീവിനു വന്നിട്ടുണ്ട് പോലും പെങ്ങടെ കല്ല്യാണം നടത്താൻ ,

ഹോ , രോഗി ഇച്ഛിച്ചതും പാല് വൈദ്യൻ കൽപിച്ചതും പാല് എന്ന അവസ്ഥയിലായി ഞാൻ, കല്ല്യാണം കൂടാൻ വന്ന തൊക്കെ അങ്ങ് മറന്നു , പിന്നെ പുള്ളിക്കാരനെ ചുറ്റിപറ്റിയായി എന്റെ നsത്തം ,
ആ മനുഷ്യനാകട്ടെ ഞങ്ങൾ മുന്നിലെത്തുമ്പോൾ കലപില കൂടി നടക്കുന്ന കുഞ്ഞി പിള്ളേരെ കണ്ട അവസ്ഥയും , അങ്ങനെ കല്ല്യാണവും കഴിഞ്ഞ് പെണ്ണ് ചെക്കന്റെ വീട്ടിലുമെത്തി , എന്നിട്ടും എന്റെ മനസ്സ് അവിടെ പാറി നടന്നു ,

തിരിച്ചു പോരേണ്ട സമയമായി , എല്ലാവരോടും യാത്ര പറഞ്ഞ് ഇറങ്ങി , എത്ര മനസ്സിൽ മാത്രം ഒരു വല്ലാത്ത വിങ്ങൽ ,കണ്ണു നിറയുന്നുണ്ടോ , അങ്ങനെ മനസ്സില്ലാ മനസ്സോടെ ഞാൻ വീട്ടിലേക്ക് പോന്നു .

വീട്ടിൽ എത്തിയിട്ടും ഒരു മനസ്സമാധാ വുമില്ല , ഒന്നിനും ഒരു Concentration കിട്ടുന്നില്ല , ഇതാരോടെങ്കിലും ഒന്നു തുറന്നു പറയണമെന്ന് തോന്നി , അങ്ങനെ എന്റെ ഒരു ഫ്രണ്ട് അവനോട് കാര്യം പറഞ്ഞു . മുഴുവനും കേട്ടതും അവൻ ചിരിക്കാൻ തുടങ്ങി , എന്റെ ഫീലിംഗ്സ് മനസ്സിലാക്കാതെ ചിരിക്കുന്ന അവനെ എനിക്ക് തല്ലിക്കൊല്ലാൻ തോന്നി .

എടീ പൊട്ടിക്കാളി നീ 8 ആം ക്ലാസിലല്ലേ ആയിട്ടുള്ളൂ. അയ്യാള് പഠിത്ത മൊക്കെ കഴിഞ്ഞ് പട്ടാളത്തിൽ ചേർന്നതല്ലേ , നിന്നെ കാളും എത്ര മൂത്തത്താ , ഇപ്പോ പെങ്ങളെ കെട്ടിച്ചെങ്കിൽ , അടുത്ത വരവിന് അയാളും കെട്ടും , അപ്പോ നീ പത്താം ക്ലാസിൽ പോലും ആകില്ല , എന്നിട്ടാ അവള് പട്ടാളക്കാരനെ കെട്ടാൻ നടക്കുന്നേ .
അപ്പോഴാണ് ശരിക്കും ഞാനാ സത്യം മനസ്സിലാക്കിയത് ,

ഹൊ എന്തൊക്കെ ആയിരുന്നു , പട്ടാളക്കാരനും പ്രണയവും കല്യാണവുമൊക്കെ പൊതിഞ്ഞു കെട്ടി പെട്ടിലാക്കി . പിന്നീട്‌ അവരെ കുറിച്ച് കേട്ടിട്ടേയില്ല . മൂത്തുമ്മ താമസം മാറി , അതോടെ ആ ചാപ്റ്റർ ക്ലോസ് ,,,

ദേ നിങ്ങളെ വിശ്വസിച്ചാ ഞാൻ ഇതൊ ക്കെ പറഞ്ഞത് ആരോടെലും പറഞ്ഞാലുണ്ടല്ലോ ???

സന്ദേസേ ആതിഹേ
ഹമേ തട്പാത്തി ഹേ ,,,,,,

ലിജിയ ഷാനവാസ്

വിതച്ചതേ കൊയ്യൂ ....

വിതച്ചതേ കൊയ്യൂ ....

അല്ല കൂട്ടുകാരേ നിങ്ങളു പറ ,,,

ഇതൊക്കെ ശരിയാണോന്ന്. ഇങ്ങനെ നിറം മാറോ മനുഷ്യൻമാര് ,

ഹോ , കാര്യം പറഞ്ഞില്ല അല്ലേ . പറയാം , അതിനു മുൻപ് ഒരു കാര്യം , ഈ കഥ യിലെ കഥാപാത്രങ്ങൾ ജീവിച്ചിരിക്കുന്നവരോ മരിച്ചവരോ ആയി യാതൊരു ബന്ധവുമില്ല , ഇനി അങ്ങനെ തോന്നിയാൽ അതിന് എന്നോട് യുദ്ധത്തിന് വരണ്ട ,,,,,

ഈ കഥ നടക്കുന്നത് , അങ്ങ് ബീഹാറിലോ , ആസാമിലോ അല്ല ഈ കൊച്ചു കേരളത്തിലാണ് .

അലിക്കുഞ്ഞ് അതാണ് നമ്മുടെ കഥാനായകൻ , ഭാര്യ റംല, 2 മക്കൾ റസിയയും റിയാസും . ആദ്യം അലിക്കുഞ്ഞിന്റെ കഥ പറയാം

അലിക്കുഞ്ഞ് , ഹൈദ്രോസിന്റെയും , പാത്തുമ്മാടെയും മൂത്ത മകൻ . ഹൈദ്രോസിന് എറണാകുളം മാർക്കറ്റിൽ ചുമടെടുപ്പാണ് പണി , 4 മക്കൾ അലിക്കുഞ്ഞിനെ കൂടാതെ 2 സഹോദരിമാരും ഒരു അനുജനും , അന്നന്നത്തേ വക കൊണ്ട് ജീവിക്കുന്ന കുടുംബം , 8 ആം ക്ലാസ്സിൽ പഠിപ്പ് നിർത്തി അലിക്കുഞ്ഞ് ബാപ്പാന്റൊപ്പം പണിക്കിറങ്ങി , അൽപസ്വൽപം ഇsത് രാഷ്ട്രിയവും ഉണ്ട് പുള്ളിക്കാരന് .

അങ്ങനെ ഇരിക്കെ അങ്ങാടിയിൽ നടന്ന ഒരു അടിപിടി കേസിൽ അലിക്കുഞ്ഞും പെട്ടു, പോലീസ് കേസായപ്പോ പാർട്ടിക്കാര് പറഞ്ഞു , തൽക്കാലത്തേക്ക് ഒന്നു മാറി നിക്കാൻ അല്ലേൽ പുലിവാലാകുമെന്നു് , കേട്ടപാതി കേൾക്കാത്ത പാതി ഹൈദ്രോസ് മോനേ , മലപ്പുറത്തുള്ള പെങ്ങടെ വീട്ടിലേക്ക് പറഞ്ഞയച്ചു . ഹൈദ്രോസിന്റെ പെങ്ങടെ ഭർത്താവിന് ഒരു പലചരക്കു കsയാണ് , അങ്ങനെ അലിക്കുഞ്ഞ് അവിടുത്തെ സഹായിയായി.

മലപ്പുറത്തെ ഒരു മുന്തിയ കുടുംബത്തിലെ ഇളയ മകൾ ആണ് റംല , നല്ല മൊഞ്ചത്തി 4 ആങ്ങള മാരുടെ ഒരേ ഒരു കുഞ്ഞി പെങ്ങൾ . ബാപ്പാക്ക് കുറേ ബിസിന സൊക്കെയുണ്ട് , ആങ്ങളമാരിൽ മൂത്ത രണ്ടു പേര് അതൊക്കെ നോക്കി നടത്തുന്നു , ഇളയവർ രണ്ടും dubai യിൽ ബിസ്നസ്സ് ,നല്ല സമ്പന്ന കുടുംബം.

അലിക്കുഞ്ഞ് നിക്കണ കടയുടെ മുന്നിലൂടെ യാണ് റംല എന്നും തയ്യൽ പഠിക്കാൻ പോകുന്നത് , പഠിക്കാൻ ഭയങ്കര ബുദ്ധിയായതുകൊണ്ട് 9 ആം ക്ലാസിൽ 2 കൊല്ലം ഇരുന്നപ്പോരേ പഠിത്തം നിർത്തി , പിന്നെ എന്തെങ്കിലും കൈപ്പണി അറിയേണ്ടേ എന്നു വച്ച് ആണ് തയ്യലിനു വിട്ടത് , അങ്ങനെ പോയി പോയി അലിക്കുഞ്ഞും റംലയും തമ്മിൽ പ്രേമത്തിലായി , ഈ സമയത്താണ് റംലക്ക് വീട്ടിൽ കല്യാണം ആലോചിക്കുന്നത് , എന്തു പറയാൻ , കല്ല്യാണാലോചന മുറുകിയപ്പോ അലിക്കുഞ്ഞ് റoലായേയും അടിച്ചോണ്ട് രായ്ക്ക് രാമായ്നം എറണാകുളത്തേക്ക് നാടുവിട്ടു.

അലിക്കുഞ്ഞ് നേരേ റംലയുമായി ചെന്നു കേറിയത് പാർട്ടി ഓഫീസിലേക്ക് , മലപ്പുറത്തുന്ന് കാര്യം അറിഞ്ഞ് എല്ലാരും എത്തിയപ്പോഴേക്കും കല്ല്യാണവും കഴിഞ്ഞ് പെണ്ണ് ചെക്കന്റെ വീട്ടിലുമായി , പാർട്ടി ഇടപെട്ടതുകൊണ്ട് തന്നെ പെണ്ണ് വീട്ടുകാർ മടങ്ങിപോയി , അങ്ങനെ റംല അലിക്കുഞ്ഞിന്റെ ഭാര്യയായി ജീവിതം ആരംഭിച്ചു

പിന്നെ അലിക്കുഞ്ഞിന് ജീവിക്കാൻ വാശിയായി നല്ലോണം കഷ്ടപ്പെട്ടു പെങ്ങൻമാരെ കെട്ടിച്ചു വിട്ടു അനിയനെ ഗൾഫിലേക്ക് അയച്ചു , പുതിയ വീടു വെച്ചു , ഇതിന്റെ ഇടയിൽ റംല 2 പെറ്റു , അതോടെ റംലയുടെ വീട്ടുകാരുടെ പിണക്കം മാറി , അലിക്കുഞ്ഞ് ഒരു ചെറിയ മുതലാളിയായി നല്ല വീട് , കാറ് , ആഭരങ്ങൾ വില കൂടിയ വസ്ത്രം എന്നു വേണ്ട മക്കൾക്ക് എന്തു വേണോ അതൊക്കെ അലിക്കുഞ്ഞ് ആ നിമിഷം വാങ്ങിക്കൊടുക്കും , അതു കൊണ്ടാണ് Plus 2 വിന് ഉയർന്ന മാർക്കു വാങ്ങിയപ്പോ റസിയ ആവശ്യപ്പെട്ട സ്ക്കൂട്ടി വാങ്ങി ക്കൊടുത്തത്. അങ്ങനെ പുതിയ കോളേജിലേക്കുള്ള റസിയയുടെ പോക്ക് പുതിയ സ്ക്കൂട്ടിയിലായി .

ഒരിക്കൽ വണ്ടി കേടായപ്പോ കോളേജിന്റെ അടുത്തുള്ള വർഷോപ്പിലേക്ക് അവൾ ചെന്നു , അവിടെ വച്ചാണ് അവൾ അൻവറിനെ പരിചയപ്പെടുന്നത് ,

അൻവർ , ഒരു പാവപ്പെട്ട കുടുംബത്തിലെ ഇളയ മകൻ , മൂത്തത് 2 സഹോദരിമാര് , കല്യാണപ്രായം കഴിഞ്ഞ് നിൽക്കുന്നു , വാപ്പ മരിച്ചു , ഉമ്മാക്ക് വാപ്പ മരിച്ച നാൾ മുതൽ പല വിധ രോഗങ്ങളാണ് , കുടുംബത്തിന്റെ ആകെ വരുമാനവും അത്താണിയും അൻവർ മാത്രമായി , അതോടെ പഠിത്തം ഉപേക്ഷിച്ച് അവൻ വർഷോപ്പിൽ കേറി .

റസിയക്ക് അൻവറിനെ പെരുത്തു ഇഷ്ടായി ,അവന്റെ നിഷ്കളങ്കതയും സ്നേഹവും അവളെ അവനിലേക്ക് അടുപ്പിച്ചു , അങ്ങനെ അവരു തമ്മിൽ പ്രണയത്തിലുമായി. അങ്ങനെ ഇരിക്കെ അവരുടെ പ്രണയം പതിയെ നാട്ടിൽ പാട്ടായി തുടങ്ങി, അങ്ങനെ ഒരു ദിവസം അത് അലിക്കുഞ്ഞിന്റെ ചെവിയിലുമെത്തി.

അതോടെ അലിക്കുഞ്ഞിന്റെ സകല നിയന്ത്രണവും നഷ്ടപ്പെട്ടു , നാട്ടിൽ പ്രമാണിയായ തന്റെ മകൾ ഒരു മെക്കാനിക്കിനെ പ്രണയിക്കുന്നോ . അയാൾ മകളെ പിൻമാറാൻ ഉപദേശിച്ചു ,അവൾ കൂട്ടാക്കിയില്ല , മകളെ നന്നായി വളർത്താത്തതിന് റംലക്കായി കുറ്റം ,

" ഉമ്മ വേലി ചാടിയാൽ മകൾ മതിലു ചാടും " അലിക്കുഞ്ഞ് ഭാര്യയുടെ നേരേ ചീറി , റസിയ യെ അയാൾ മുറിയിൽ പൂട്ടിയിട്ടു , അവൾ എന്നിട്ടും വഴങ്ങിയില്ല , കെട്ടുന്നെങ്കിൽ അൻവറിനെയേ കെട്ടൂ എന്നു് അവൾ തറപ്പിച്ചു പറഞ്ഞു , അൻവറിനെ കൊന്നുകളയുമെന്നായി അലിക്കുഞ്ഞ് , എന്നാൽ വാപ്പ ആദ്യം എന്റെ മയ്യത്ത് കാണുമെന്ന് റസിയ , അവൾ അതിനുള്ള ആദ്യ ശ്രമമായി കൈയ്യിലെ ഞരമ്പു മുറിച്ചു , റിയാസ് തക്ക സമയത്ത് കണ്ടതു കൊണ്ട് വേഗം ഹോസ്പിറ്റലിൽ എത്തിച്ചു, അതുകൂടി ആയപ്പോ അലിക്കുഞ്ഞ് തളർന്നു പോയി .

അവസാനം റംലയുടെ സഹോദരൻമാർ ഇടപ്പെട്ടു , വിവാഹം നടത്തി കൊടുക്കാമെന്നു് എറ്റു , അലിക്കുഞ്ഞിനെ കൊണ്ട് ഒരു വിധം സമ്മതിപ്പിച്ചു , വിവാഹ ശേഷം അൻവറിനെ ദുബായിലേക്ക് കൊണ്ടു പോകാനും അൻവറിന്റെ സഹോദരിമാർക്ക് നല്ല വിവാഹ ബന്ധം ശരിയാക്കി കൊടുക്കാനും അവർ തന്നെ മുൻകൈ എടുത്തു , അങ്ങനെ വിവാഹം കഴിഞ്ഞ് ഇപ്പോൾ അവർ മധുവിധു ആഘോഷത്തിലാണ്.

ഇതിൽ നിന്ന് നിങ്ങൾക്ക് എന്തു മനസ്സിലായി വിതച്ചതേ കൊയ്യൂ അല്ലേ , അലിക്കുഞ്ഞിന് ഇതിന്റെ വല്ല ആവശ്യമുണ്ടാരുന്നോ , പണം കൈയ്യിൽ വന്നപ്പോ അയാൾ കഴിഞ്ഞതൊക്കെ സൗകര്യപൂർവ്വം വിസ്മരിച്ചു . എത്രയൊക്കെ നാം ഉയരത്തിലെത്തിയാലും കഴിഞ്ഞ കാലം മറന്നു ജീവിക്കരുത് . അത് നമ്മെ നാശത്തിലേക്ക്‌ നയിക്കും

ലിജിയ ഷാനവാസ്

വിധി,,,,,,

വിധി,,,,,,

അവൻ അമീർ... ചെക്കൻമാരുടെ കൈയ്യിലുള്ള എല്ലാ തരികിടകളും അവന്റെ കയ്യിലുമുണ്ട് . സ്ക്കൂൾ തലം മുതലേ അവന്റെ മനസ്സ് കടിഞ്ഞാണില്ലാത്ത ഒരു കുതിരയെ പോലെ പാഞ്ഞു കൊണ്ടേ ഇരുന്നു . ഓരോ കൊല്ലവും ഓരോ പെൺകുട്ടികളോടാണ് അവന് പ്രണയം തോന്നുക.തെറ്റു പറയരുതല്ലോ ഒരാളോടുപോലും അത് തുറന്നു പറയാൻ കഴിഞ്ഞിട്ടില്ല

അവന്റെ അയൽപക്കത്തു താമസിക്കുന്ന കുട്ടിയാണ് ഷാഹിന . അവനെക്കാളും 2 വയസ്സ് ഇളയത് . പക്ഷേ അവൾക്ക് അമീറിനെ ജീവനാണ് . അവനാകട്ടെ ഓരോ തവണയും പ്രണയം തോന്നുന്ന പെണ്ണിന്റെ അടുക്കലേക്ക് ദൂതുമായി പറഞ്ഞയക്കുന്നത് അവളെയാണ് , അതു കൊണ്ട് തന്നെ ആ പെൺകുട്ടികളാരും അവന്റെ പ്രണയം അറിഞ്ഞതേയില്ല.

സഹിക്കെട്ട് ഷാഹിന ഒന്നു തീരുമാനിച്ചു . തന്റെ പ്രണയം അവനെ അറിയിക്കണം, അങ്ങനെ ഇരിക്കെ ഇന്ത്യ Vs പാക്കിസ്ഥാൻ ക്രിക്കറ്റ് മാച്ച് നടക്കുന്ന ദിവസം ടി വി യിൽ Live കാണിക്കുന്നുണ്ട് , അമീറിന്റെ വീട്ടിൽ ടി വി ഇല്ല , ഒരു സാധാരണ യാഥാസ്ഥിതിക കുടുംബമാണ് അമീറിന്റെ, ഷാഹിനായുടെ വീട്ടിലാണ് അവൻ ടിവി കാണാൻ പോകുന്നത് , അവിടെ ഷാഹിനാക്ക് ഒരു സഹോദരൻ കൂടി ഉണ്ട് , അമീർ അവന്റെ ചങ്ങാതി ആണ്. ഷാഹിനാടെ കുടുംബം നല്ല സാമ്പത്തിക ശേഷിയുള്ള കൂട്ടരാണ്.

അങ്ങനെ Match നടക്കുന്ന ദിവസം അമീർ ഷാഹിനയുടെ വീട്ടിൽ എത്തി . ഷാഹിനായും സഹോദരനും അമീറും ഒരുമിച്ചിരുന്നു ടി വി കാണുകയായിരുന്നു . ഇടക്ക് വച്ച് സഹോദരൻ എന്തോ ആവശ്യത്തിന് മുറിയിലേക്ക് പോയ തക്കത്തിന് , അവൾ ഒരു കുസൃതി ഒപ്പിച്ചു , അമീറിന്റെ അടുക്കൽ ചെന്നു , അവന്റെ കവിളിൽ ഒരു മുത്തം നൽകി ഓടി മറഞ്ഞു , എന്താണ് സംഭവിച്ചതെന്ന് തിരിച്ചറിയാൻ അവന് ഒരു നിമിഷം വേണ്ടി വന്നു . ഒരു പ്രണയത്തിന്റെ തുടക്കമായിരുന്നു അത് ....

പിന്നീട് അവരുടെ പ്രണയം ഒരു മഴക്കാലം പോലെ പെയ്തു കൊണ്ടേയിരുന്നു , 2 വർഷം പോയത് അവർ അറിഞ്ഞില്ല, വീട്ടിലെ ബുദ്ധിമുട്ടും സഹോദരിയുടെ വിവാഹവും അവനെ പ്രവാസ ജീവിതത്തിലേക്ക് നയിച്ചു, മനസ്സില്ലാമനസോടെ തന്റെ പ്രണയിനിയെ വിട്ട് അവൻ ദുബായിലേക്ക് പറന്നു, നിറകണ്ണൂകളോടെ ഷാഹിന അവനെ യാത്രയാക്കി , 3 വർഷത്തെ കോൺട്രാക്ക്ട് വിസാ ആയിരുന്നു , പിന്നീടുള്ള പ്രണയം Net കാളിംഗ് ലൂടെയും ചാറ്റിങ്ങിലൂടെയും കടന്നു പോയി .

ഒരു വർഷം കഴിഞ്ഞപ്പോഴാണ് , പെട്ടെന്ന് ഒരു ദിവസം ഷാഹിനായുടെ തുരു തുരെ യുള്ള മിസ് കോൾ കേട്ടാണ് അവൻ ഉണർന്നത് , വാപ്പാ തന്റെ വിവാഹം തീരുമാനിച്ചു എന്ന നടുക്കുന്ന വിവരം അവന്റെ സകല സന്തോഷവും തകർക്കുന്നതായിരുന്നു 3 വർഷത്തെ വിസ ആയതു കൊണ്ട് അവന് നാട്ടിൽ എത്തിപ്പെടാൻ കഴിയുമായിരുന്നില്ല .

എന്തും വരട്ടെ എന്നു കരുതി അവൻ അവളുടെ വാപ്പായെ ഫോണിൽ വിളിച്ചു , ഷാഹിനായെ തനിക്ക് ഇഷ്ടമാണെന്നും വിവാഹം കഴിച്ചു തരണമെന്നും അപേക്ഷിച്ചു , പക്ഷേ അയ്യാൾ അവന്റെ വാക്കുകൾ പുച്ഛിച്ചു തള്ളി. എന്റെ മകളെ കെട്ടാൻ എന്തു യോഗ്യതയാണ് നിനക്ക് ഉള്ളതെന്നു പറഞ്ഞ് അയാൾ ഫോൺ കട്ടു ചെയ്തു .

പിന്നീടുള്ള നടപടികളൊക്കെ വേഗമായിരുന്നു , അവളുടെ എതിർപ്പിനെ വകവെക്കാതെ , അവളെ മറ്റൊരുവന് വിവാഹം ചെയ്തു കൊടുത്തു , നെയ്തുകൂട്ടിയ സ്വപ്നങ്ങളൊക്കെയും ഉപേക്ഷിച്ച് അവൾ മണിയറയിലേയ്ക്ക് വലതുകാൻ വച്ചു കയറി .

2 മാസം കഴിഞ്ഞു, പുതുമോടി കഴിഞ്ഞു തുടങ്ങിയപ്പോൾ ചോദ്യങ്ങൾ വരാൻ തുടങ്ങി ,

വിശേഷം ഒന്നും ആയില്ലേന്നു് , കേട്ടു മതിയായപ്പോൾ അവർ ഒരു ഡോക്ടറെ കാണാൻ തിരുമാനിച്ചു , പരിശോധന കഴിഞ്ഞ് ഡോക്ടർ വിധി എഴുതി , ഷാഹിനക്ക് കുട്ടികൾ ഉണ്ടാകില്ലത്രേ , 2 മാസം നീണ്ടു നിന്ന വിവാഹ ജീവിതത്തിന് അവിടെ തിരശീല വീണു.
ഭർത്താവ് മൊഴി ചൊല്ലിയ അവൾ തിരികെ തന്റെ വീട്ടിലേക്ക് പോന്നു.

3 വർഷങ്ങൾക്ക് ശേഷം അമീറ് നാട്ടിൽ തിരിച്ചെത്തി , അതു വരെ ഷാഹിനാ യെ കുറിച്ച് ഒരു വിവരവും അവന് കിട്ടിയിരുന്നില്ല , നാട്ടിൽ എത്തിയപ്പോൾ അവൻ അവളെ കുറിച്ച് തിരക്കി , അപ്പോഴാണ് അവൻ വിവരങ്ങൾ അറിയുന്നത് , പിന്നെ ഒരു തീരുമാനമെടുക്കാൻ അവന് താമസം ഉണ്ടായില്ല , നേരേ അവളുടെ വീട്ടിൽ എത്തി വാപ്പായോട് വീണ്ടും അപേക്ഷിച്ചു , മകളെ തനിക്ക് നൽകണമെന്ന് .

ഇത്തവണ ആ വ്യദ്ധൻ തൊഴുകൈയ്യോടെ അവനെ സ്വീകരിച്ചു , ചെയ്തു പോയ തെറ്റിന് മാപ്പിരന്നു , തന്റെ മകൾക്ക് ഒരു ജീവിതം നൽകിയതിന് ഒരു പാട് നന്ദി പറഞ്ഞു .

അങ്ങനെ ഷാഹിന അമീറിന്റെ ബീവിയായി , കുട്ടികളില്ലാത്തതിന്റെ സങ്കടം ഷാഹിന പറയുബോൾ അവൻ പറയും , എനിക്ക് മകളായ് നീയും , നിനക്ക് മകനായ് ഞാനുമില്ലേ മുത്തേന്നു് ,,,,,

പ്രണയം അങ്ങനെയാണ് , വിധിച്ചിട്ടുണ്ടേൽ അത് തേടി വരും എത്ര കാലം കഴിഞ്ഞാലും

ശുഭം.....

അവൾ മീര .....

അവൾ മീര .....

ഓർമ്മവെച്ച നാൾ മുതൽ ആ വീട്ടിൽ ഒരു അധികപറ്റായിരുന്നു അവൾ. എന്തിനും ഏതിനും ശകാരമായിരുന്നു അവൾക്ക് ലഭിച്ചിരുന്നത് . ആ വീട്ടിലെ ആരും തന്നെ അവൾക്ക് സ്നേഹത്തോടെ ഒരു നോട്ടമോ വാക്കോ നൽകിയിരുന്നില്ല . അശ്രീകരമെന്നും നിഷേധിയെന്നും ശാപം പിടിച്ചവളെന്നും കേട്ട് കേട്ട് അവൾ തന്റെ പേരു പോലും മറന്നിരുന്നു.

മുന്തിയ തറവാട്ടിലെ അംഗമായിരുന്നു മീര . അച്ഛൻ, അമ്മ, ചേട്ടൻ, ഏട്ടത്തിയമ്മ, ചേച്ചി, ചേട്ടന്റെ കുട്ടികൾ ഇത്ര പേരടങ്ങുന്ന കുടുംബമായിരുന്നു അവളുടെത് . ചേട്ടനും ചേച്ചിയും അവളെക്കാൾ കുറച്ച് മുതിർന്നവരാണ്. രണ്ട് കുട്ടികൾ ആയതിന് ശേഷം വേറേ കുട്ടികൾ വേണ്ട എന്നു തീരുമാനിച്ച് മീരയുടെ അമ്മ പ്രസവം നിർത്തിയിരുന്നു. പക്ഷേ ദൈവനിശ്ചയം മീര ജനിക്കണമെന്ന് തന്നെ ആയിരുന്നു . ദൈവനിശ്ചയത്തിന് മുന്നിൽ ശാസ്ത്രം തോറ്റു പോയി . അവർ വീണ്ടും ഗർഭിണിയായി . വിവരം അറിഞ്ഞപ്പോഴേക്കും അലസിപ്പിക്കാൻ കഴിയാത്ത അവസ്ഥയിലായി . മനസ്സില്ലാ മനസ്സോടെയാണ് അവർ മീരക്ക് ജൻമം നൽകിയത് . അതു കൊണ്ട് തന്നെ ചെറുപ്പത്തിൽ യാതൊരുവിധ പരിചരണവും അവൾക്ക് കിട്ടിയിരുന്നില്ല. എന്തിന് മുലപ്പാൽ പോലും അവൾക്ക് അവർ നിഷേധിച്ചു.
വീട്ടിൽ പുറംപണിക്ക് അമ്മയെ സഹായിക്കാൻ വരുന്ന ജാനകി ചേച്ചിയാണ് അവൾക്ക് ആഹാരം കൊടുക്കുകയും കുളിപ്പിക്കുകയുമൊക്കെ ചെയ്തിരുന്നത്. അവളുടെ സഹോദരങ്ങളാകട്ടെ ഇങ്ങനെ ഒരു സഹോദരി തങ്ങൾക്ക് ഉണ്ടെന്ന ഭാവമേ ഉണ്ടാരുന്നില്ല. അച്ഛൻ അവളെ ഒന്നു നോക്കാറു പോലുമില്ല. നല്ല ഭക്ഷണമോ വസ്ത്രമോ മറ്റു വസ്തുക്കളോ അവൾക്ക് കിട്ടിയിരുന്നില്ല . ചേച്ചി ഉപയോഗിച്ച് ഉപേക്ഷിച്ച പല സാധനങ്ങളാണ് അവർക്ക് കിട്ടിയിരുന്നത് .

മുതിർന്നപ്പോൾ ഒരിക്കൽ അവൾ ജാനകി ചേച്ചിയോട് ചോദിച്ചു . എന്തുകൊണ്ടാണ് തന്നോട് എല്ലാവരും ഇങ്ങനെ പെരുമാറുന്നതെന്നു് . ചേച്ചി പറഞ്ഞാണ് അവൾ ആ സത്യം മനസ്സിലാക്കിയത് . അവളുടെ ജനനസമയത്ത് ഏതോ ഒരു ജ്യോത്സ്യൻ പ്രവചിച്ചു വത്രേ . അവൾ അപശകുനമാണെന്ന് . കുടുംബത്തിലുള്ള പുരുഷൻമാർക്ക് ആപത്തുണ്ടാകുമെന്ന് . അവളുടെ ജനന ശേഷം അച്ഛനുണ്ടായ നെഞ്ചു വേദനയും അവൾ വളർന്ന ശേഷം ഏട്ടനുണ്ടായ ബൈക്ക് ആക്സിടന്ററും എല്ലാം പാവം അവളുടെ തലയിൽ ആയി. അങ്ങനെയാണ് അവൾ ആ വീട്ടിൽ ഒരു അധിക പറ്റായത്. അവളുടെ വിദ്യാഭ്യാസം പോലും അവർ നിഷേധിച്ചു പ്ലസ് ടുവിൽ ഉയർന്ന മാർക്ക് വാങ്ങി പാസായിട്ടും തുടർന്ന് പഠിക്കാൻ അവൾക്ക് യോഗ മുണ്ടായില്ല.

അങ്ങനെ ഇരിക്കെയാണ് മീരയുടെ സഹോദരിയുടെ വിവാഹം ഉറപ്പിക്കുന്നത് . വിവാഹത്തിൽ നിന്നും അവളെ മാറ്റി നിർത്താൻ പോലും അവർ ആലോചിച്ചു . പക്ഷേ നാട്ടുകാർ ചിലരുടെ മുറുമുറുപ്പ് ഭയന്ന് അവസാനം ആ ശ്രമം അവർ ഉപേക്ഷിച്ചു . കല്യാണത്തിന് മണ്ഡപത്തിന്റെ ഏഴ് അയലത്ത് കണ്ടു പോകരുതെന്ന് എല്ലാവരും അവളെ വിലക്കി. അങ്ങനെ അവൾ കലവറയുടെ പിന്നിൽ ഒതുങ്ങി കൂടി . എത്ര നിയന്ത്രിച്ചിട്ടും അവൾക്ക് കരച്ചിലടക്കാൻ കഴിഞ്ഞില്ല . ഈ സമയത്താണ് സുധി അവിടെ എത്തിയതും അവൻ അവളെ കാണുന്നതും . സുധിയുടെ അമ്മാവനാണ് കല്യാണത്തിന് ഭക്ഷണത്തിന്റെ ചുമതല . ഇടക്ക് അവൻ അമ്മാവന്റെ ഒപ്പം സഹായിയായി പോകാറുണ്ട്. ഒരു പ്രൈവറ്റ് സ്ഥാപനത്തിൽ അക്കൗണ്ടൻറ് ആണ് സുധി . വർഷങ്ങൾ ക്കൊണ്ട് പി എസ് സി പരിക്ഷ എഴുതി ഗവൺമെന്റ് ജോലിക്കായി കാത്തിരിക്കുകയാണ് .

മീരയെ കണ്ടപ്പോൾ തന്നെ അവന് എന്തോ പന്തികേട് തോന്നി . അങ്ങനെയാണ് അവളെ കുറിച്ച് അവൻ അന്വോഷിച്ചത് . കഥകളൊക്കെ കേട്ടപ്പോൾ അവന് അവളോട് സഹതാപം തോന്നി . അത് പതിയെ ഇഷ്ടത്തിലേക്ക് വഴിമാറി .

തിരികെ വീട്ടിൽ എത്തിയിട്ടും സുധിയുടെ മനസ്സിൽ നിന്ന് മീരയുടെ മുഖം മായുന്നേയില്ല . പിന്നീട് അവളുടെ വീടിന്നരികിൽ അവളെ ഒരു നോക്ക് കാണാനായി അവൻ പല വട്ടം പോയി . പക്ഷേ നിരാശയായിരുന്നു ഫലം . ദിവസം ചെല്ലുന്തോറും മീര അവന്റെ സിരകളിൽ പ്രാണവായു പോലെ അലിഞ്ഞു ചേർന്നു. പിന്നീട് ഒന്നും അവൻ ചിന്തിച്ചില്ല . തന്റെ വീട്ടിൽ അവൻ മീരയുടെ കാര്യം അവതരിപ്പിച്ചു . അമ്മയും അമ്മാവൻമാരും ആദ്യം എതിർത്തെങ്കിലും പിന്നിട് അവർ അവനെ അനുകൂലിച്ചു . അങ്ങനെ അവന്റെ അമ്മാവൻ മുഖേന കല്യാണാലോചന മീരയുടെ വീട്ടിലുമെത്തി .

സ്ത്രീധനമായി ഒരു ചില്ലികാശോ പൊന്നോ ഒന്നും തരില്ല . അങ്ങനെ ആണേൽ മാത്രം വിവാഹം നടത്തി തരാമെന്നാരുന്നു മീരയുടെ വീട്ടുകാരുടെ പ്രതികരണം . താൻ സ്നേഹിച്ചത് മീരയെ ണെന്ന് അവൻ ഉറപ്പിച്ചു പറഞ്ഞു . അങ്ങനെ ഒരു ആർഭാടവുമില്ലാതെ വിവാഹം നടന്നു . മീര സുധിയുടെ വധുവായി അവന്റെ ജീവിതത്തിലേക്ക് പ്രവേശിച്ചു ..

അത് ഒരു രണ്ടാം ജൻമമായാണ് അവൾക്ക് തോന്നിയത് . സ്നേഹം കൊണ്ട് വീർപ്പു മുട്ടിക്കുന്ന ഭർത്താവ് , മകളെ പോലെ തന്നെ സ്നേഹിക്കുന്ന അമ്മ , ഏട്ടത്തി എന്നു വിളിച്ച് പിന്നാലെ നടക്കുന്ന കുഞ്ഞിപെങ്ങൾ അങ്ങനെ ആ വീട് ഒരു സ്വർഗ്ഗമായി അവൾക്ക് തോന്നി .

വിവാഹം കഴിഞ്ഞ് ഒരാഴ്ച കഴിഞ്ഞപ്പോൾ സുധിക്ക് ഗവൺമെന്റ് ജോലിക്കുള്ള അപ്പോന്റ് മെന്റ് ലറ്റർ വന്നു. അതോടെ ആ വീട്ടിലെ സന്തോഷം ഇരട്ടിയായി . എല്ലാം എന്റെ മരുമകളുടെ ഭാഗ്യമാണെന്ന സുധിയുടെ അമ്മയുടെ വാക്കുകൾ കേട്ട് അവൾ പൊട്ടിക്കരഞ്ഞു പോയി . ശാപം മാത്രമായിരുന്നു താൻ എന്നും സ്വന്തം കുടുംബത്തിൽ എന്നാൽ ഇപ്പോൾ മറ്റൊരു കുടുംബത്തിന്റെ ഭാഗ്യമായി മാറിയിരിക്കുന്നു . അവൾ ഈശ്വരനോട് നന്ദി പറഞ്ഞു.

അന്നു രാത്രി സുധിയുടെ നെഞ്ചിൽ തല ചായ്ച്ച് കിടന്നപ്പോൾ അവൾ തന്റെ നന്ദിയും കടപ്പാടും അവനെ അറിയിച്ചു. രണ്ടു കരങ്ങൾ കൊണ്ട് അവളെ ചേർത്ത് പിടിച്ച് നെറുകയിൽ ഒരു ചുംബനം നൽകി അവൻ പറഞ്ഞു. നീയാണ് എന്റെ സ്വത്ത് , നീയാണ് എന്റെ ഭാഗ്യം എന്നും എപ്പോഴും എന്നരികിൽ നീ ഉണ്ടാവണം . അതാണ് എന്റെ സ്വപ്നവും . രണ്ടു തുള്ളി കണ്ണുനീരുകൊണ്ട് അവൾ ആ ജൻമം അനുഭവിച്ച ദുഃഖങ്ങൾക്ക് എന്നെന്നേക്കുമായി വിട നൽകി .......

ശുഭം

ലിജിയ ഷാനവാസ്

ഒരു അനുഭവകഥ ,,,

പ്ലസ് ടു വിന് പഠിക്കുന്ന കാലം , ക്ലാസിൽ 25 ആൺകുട്ടികളും 25 പെൺകുട്ടികളും . ഞങ്ങൾടെ കൂട്ടത്തിൻ അധികം ആരോടും സംസാരിക്കാത്ത ഒരു പാവം കുട്ടി ഉണ്ടാരുന്നു . മായ ( പേര് സാങ്കൽപികം ), ഇടതുർന്ന മുടിയിൽ തുളസിക്കതിർ ചൂടി നെറ്റിയിൽ ചന്ദനക്കുറി തൊട്ട് എന്നും അവൾ ക്ലാസിൽ വരുന്നത് , പാടും ന്യത്തം ചെയ്യും നന്നായി പഠിക്കും , എല്ലാവർക്കും അവളെ ഇഷ്ടമായിരുന്നു .

ഒരുപാട് ആൺകുട്ടികൾ അവൾക്ക് പിന്നാലെ പ്രണയാഭ്യർത്ഥനയുമായി ചെന്നിട്ടും അവൾ ആരേയും കണ്ടതായി നടിച്ചില്ല . പിന്നീടാണ് ഞങ്ങൾ അറിഞ്ഞത് അവൾ ഒരു ക്രിസ്ത്യൻ പയ്യനുമായി പ്രണയത്തിലാണെന്ന് .

പ്ലസ് ടു കഴിഞ്ഞ് ഞങ്ങൾ പല വഴിക്ക് പിരിഞ്ഞു. അവൾ അടുത്തുള്ള ഒരു കോളേജിൽ ഡിഗ്രിക്കും ഞാൻ ഐ റ്റി ഐ യിൽ സിവിൽ ഡിപ്ലോമ കും ചേർന്നു . സെക്കൻഡ് ഇയറിൽ പഠിക്കുമ്പോഴാണ് കേൾക്കുന്നത് അവൾ ആ പയ്യന്റെ ഒപ്പം ഒളിച്ചോടി എന്ന് .
അവൾ ആ കുടുംബത്തിലെ മൂത്ത മകൾ ആയിരുന്നു അവൾക്ക് താഴെ നാലു പെൺകുട്ടികൾ ,അച്ഛൻ ഗൾഫിൽ .

അവനാകട്ടേ ഏക മകൻ നല്ല സാമ്പത്തിക ഭദ്രതയുള്ള കുടുംബം: അവൾ പോയതോടെ അവളുടെ കുടുംബം ആകെ തകർന്നു . അച്ഛൻ ജോലി ഉപേക്ഷിച്ചു നാട്ടിലേക്ക് പോന്നു . അവരെ സ്വീകരിക്കാൻ അവളുടെ വീട്ടുകാർ തയ്യാറായില്ല . ഏക മകനായതുകൊണ്ടാകാം ചെക്കന്റെ വീട്ടുകാർ അവരെ സ്വീകരിച്ചു .

പിന്നീട് ഒരു വർഷത്തിനു ശേഷം ഒരിക്കൽ യാദൃച്ഛികമായി ഞാൻ അവളെ കണ്ടു . വഴിയരികിൽ ഭർത്താവിനെയും കാത്തു നിൽക്കുകയായിരുന്നു അവൾ . സന്തോഷവതിയായിരുന്നു എന്റെ വിവാഹ മാണെന്ന് അറിഞ്ഞപ്പോൾ കുടുംബ ജീവിതത്തെ പറ്റി അവൾ ഒരു പാട് സംസാരിച്ചു , ഭർത്താവ് കൂടെയുണ്ടെങ്കിൽ മറ്റൊന്നും നമുക്ക് വേണ്ട , എന്നവൾ അഭിമാനത്തോടെ പറഞ്ഞു . പിന്നെ താൻ ഒരു അമ്മയാകാൻ പോകുന്നു എന്നു തെല്ലു നാണത്തോടെയും . സംസാരിച്ചു നിൽക്കെ അവളുടെ ഭർത്താവ് വന്നു . എന്നോട് യാത്ര പറഞ്ഞ് അവർ പോയി;

പിന്നീട് 2 മാസങ്ങൾക്ക് ശേഷം ഞങ്ങളുടെ ഒരു സഹപാഠിയെ ഒരു shop ൽ വെച്ചു കാണാനിടയായി . വിശേഷങ്ങൾ ചോദിക്കുന്നതിനിടെ മായയുടെ കാര്യം ആരാഞ്ഞു. അപ്പോഴാണ് അവളാ നടുക്കുന്ന സത്യം പറഞ്ഞത് . അവളുടെ ഭർത്താവ് ആത്മഹത്യ ചെയ്തു പോലും . വീട്ടിൽ അവന്റെ അച്ഛനുമായുണ്ടായ വാക്കുതർക്കമാണ് അവനെ ആത്മഹത്യയിൽ കൊണ്ട്‌ എത്തിച്ചത് , അവളുടെ കാര്യമാണ് കഷ്ടം , ഈ ആഘാതത്തിൽ അവൾക്ക് കുഞ്ഞിനെയും നഷ്ടപ്പെട്ടു , അവൾ തീർത്തും അനാഥത്വത്തിലേക്ക് ,,,

പിന്നീട്‌ അറിയാൻ കഴിഞ്ഞു അവന്റെ വീട്ടുകാർ അവളുടെ സംരക്ഷണം ഏറ്റെടുത്തെന്ന്. ഇപ്പോ എവിടെ എന്നോ എന്തെന്നോ അറിയില്ല . ഒരു നേർത്ത നൊമ്പരമായി അവൾ ഞങ്ങൾക്ക് ഉള്ളിൽ ഇന്നു മുണ്ട്

പ്രിയ കൂട്ടുകാരീ , മണലാരണ്യത്തിൽ നിനക്കും അനുജത്തിമാർക്കും വേണ്ടി കഷ്ടപെട്ട പിതാവിനെ നീ ഓർത്തില്ല , ഭർത്താവ് അടുത്തില്ലാതെ 5 പെൺകുട്ടികളെ തനിച്ചു സംരക്ഷിച്ച മാതാവിനെ നീ ഓർത്തില്ല ,നീ പോയാൽ അതിനു ശേഷമുള്ള നിന്റെ അനുജത്തിമാരുടെ ഭാവി നീ ഓർത്തില്ല . എന്നിട്ടു നീ നേടിയതോ എല്ലാം നഷ്ടപ്പെട്ട് ഒരു അന്യ വീട്ടിൽ അഗതിയെ പോലെ ഒരു ജീവിതം .
പ്രണയത്തെ കുറിച്ച് വാ തോരാതെ സംസാരിക്കുന്ന പ്രിയ സുഹൃത്തുക്കളോടായ് ,,,,
നാളെ എന്തെന്ന് പ്രവചിക്കാൻ നമുക്കാവില്ല എങ്കിലും എന്തു വന്നാലും നേരിടാനും സംരക്ഷിക്കാനും മാതാപിതാക്കളെക്കാൾ വലിയൊരു ആശ്രയവുമില്ല ..

ലിജിയ ഷാനവാസ്

തെരുവിൻ്റെ മക്കൾ

ഇതൊരു സംഭവകഥയാണ് ...
എന്റെ സുഹൃത്ത് അവളുടെ അനുഭവം എന്നോട് പറഞ്ഞപ്പോൾ അത് നിങ്ങളോടും കൂടി പങ്കു വെക്കണമെന്ന് തോന്നി ....

വീണ (പേര് സാങ്കൽപ്പികം) മുംബൈ സ്വദേശിയാണ് . മുംബൈ എന്ന മഹാനഗരത്തെ കുറിച്ച് നമ്മൾ കേട്ടിട്ടുള്ളത് തന്നെ ഇന്ത്യയിലെ പ്രാധാന നഗരങ്ങളിൽ ഒന്നായാണ് . വിവിധ സംസ്ഥാനങ്ങളിൽ നിന്ന് വന്ന് താമസിക്കുന്ന ആളുകളാണ് അവിടെ കൂടുതൽ . സിനിമാ മോഹവുമായോ അല്ലെങ്കിൽ എന്തെങ്കിലും ജോലി തേടിയോ വന്നുപെട്ടവർ . അധോലോക സംഘങ്ങളുടെയും ചുവന്ന തെരുവിന്റെയും നഗരം . എന്നാൽ അവിടെയുമുണ്ട് പട്ടിണി പാവങ്ങൾ ഒരു നേരത്തെ അന്നത്തിനായി ഇരന്നു ജീവിക്കുന്നവർ അങ്ങനെ അങ്ങനെ എത്രയോ പേർ ...

വീണയും കൂട്ടുകാരും എന്നും വൈകുന്നേരങ്ങളിൽ പുറത്തേക്ക് പോകും . അടുത്തുള്ള പാർക്കിൽ കൂട്ടുകാരുമൊത്ത് കളിച്ച് ചിരിച്ച് ചെറിയ ഒരു സായാഹ്നസവാരി . അങ്ങനെ ഒരു വൈകുന്നേരം വീണയും സുഹൃത്ത് മോഹനും പാർക്കിലെ ഒരു മരച്ചുവട്ടിൽ സംസാരിച്ചിരിക്കയായിരുന്നു . അവളുടെ കൈയിൽ ഒരു ചെറിയ കടലയുടെ പൊതിയുണ്ട് അതും കൊറിച്ച് കൊണ്ട് അവർ സംസാരം തുടർന്നു . അപ്പോഴാണ് അവൾ ഒരു കാര്യം ശ്രദ്ധിച്ചത്. തങ്ങളെ നോക്കി ഒരു ചെറിയ കുട്ടി അടുത്ത് മാറി നിൽക്കുന്നു . ഒരു 4 വയസ് പ്രായം തോന്നിക്കും . മുഷിഞ്ഞ ബനിയനും ട്രൗസറുമാണ് വേഷം . അവന്റെ നോട്ടം അവളുടെ കൈയിലെ പൊതിയിലേക്ക് ആണ് . അവൾ പതിയെ അവന്റെ അരികിലേക്ക് ചെന്നു . കടല അവന്റെ നേർക്ക് നീട്ടി . ആദ്യമൊന്നു മടിച്ചെങ്കിലും അവൻ അത് വാങ്ങി ആർത്തിയോടെ തിന്നാൻ തുടങ്ങി . അവൾ അവനെ വിളിച്ച് അടുത്തിരുത്തി .
നീ ഭക്ഷണം കഴിച്ചില്ലേ ? അവൾ ചോദിച്ചു
ഇല്ല എന്ന അർത്ഥത്തിൽ അവൻ തല വെട്ടിച്ചു
എവിടെയാ നിന്റെ വീട് ?
അവൻ അടുത്തുള്ള ചേരിയിലേക്ക് വിരൽ ചൂണ്ടി
നീ എന്താ ഭക്ഷണം കഴിക്കാത്തത് ? നിന്റെ അമ്മ എവിടെ ? അവൾ തിരക്കി
എനിക്ക് അമ്മയില്ല .. അവൻ പറഞ്ഞു
പിന്നെ ആരാ ഉള്ളത്? അവൾ ചോദിച്ചു
ചേച്ചിയുണ്ട് അതാ അവിടെ .. ദൂരെ നിൽക്കുന്ന പെൺകുട്ടിയെ അവൻ ചൂണ്ടി കാട്ടി. കുറച്ചകലെയായി ഒരു പെൺകുട്ടി ഒരു ചെറിയ കൈകുഞ്ഞിനേയും എടുത്ത് കൊണ്ട് ഭിക്ഷ യാചിക്കുന്നത് അവൾ കണ്ടു .
നിനക്ക് ഞാൻ ഭക്ഷണം വാങ്ങിത്തരാം .
അവൾ മോഹനോട് ഭക്ഷണം വാങ്ങി വരാൻ ആവശ്യപ്പെട്ടു . അടുത്തുള്ള ഹോട്ടലിൽ നിന്നവൻ ഭക്ഷണം വാങ്ങി വന്നു . ഭക്ഷണപ്പൊതി കണ്ടതും അവൻ അതു വാങ്ങി ആർത്തിയോടെ കഴിക്കാൻ തുടങ്ങി .
പതുക്കെ കഴിച്ചാൽ മതി മുഴുവനും നിനക്കുള്ളതാ .
എത്ര ദിവസായി നീ ഭക്ഷണം കഴിച്ചിട്ട് ? അവൾ ചോദിച്ചു
ഒരു നിമിഷം ചിന്തിച്ച ശേഷം അവൻ പറഞ്ഞു എനിക്ക് അറിയില്ല ...
സാരല്യ ചേച്ചി ഇനി നിനക്ക് എന്നും ഭക്ഷണം കൊണ്ടുത്തരാട്ടോ ... അവൾ പറഞ്ഞു
സന്തോഷത്താൽ അവൻ തലയാട്ടി .

ചില പ്രശ്നങ്ങളാൽ പിറ്റേ ദിവസം അവൾക്ക് പുറത്ത് പോകാൻ സാധിച്ചില്ല . അതിനടുത്ത ദിവസം പുറത്തേക്ക് പോന്നപ്പോൾ ഒരു പൊതി ഭക്ഷണം അവനു വേണ്ടി അവൾ കരുതിയിരുന്നു.
അവൾ അതുമായി ആ പാർക്കിലേക്ക് ചെന്നു . പക്ഷേ കുറേ തിരഞ്ഞെങ്കിലും അവനെ കാണാൻ കഴിഞ്ഞില്ല . അവൾ അവനെ അന്വേഷിച്ച് ആ ചേരിയുടെ ഭാഗത്തേക്ക് പോയി . എത്ര നോക്കിയിട്ടും നിരാശയായിരുന്നു ഫലം . അങ്ങനെ നടന്ന് അവൾ ചേരിയുടെ ആളൊഴിഞ്ഞ ഭാഗത്തേക്ക് എത്തി . പെട്ടെന്ന് ഒരു മൺകൂനയിൽ കാൽ തട്ടി അവൾ നിലത്തേക്ക് വീണു . പതിയെ എഴുന്നേറ്റ അവൾ അപ്പോഴാണ് ഒരു കാര്യം ശ്രദ്ധിച്ചത് . ആ മൺകൂനയിലെ ഒരു തുണിക്കഷണത്തിൽ തട്ടിയാണ് അവൾ വീണത് .
അതെന്താണെന്നറിയാനുള്ള ആകാംക്ഷയിൽ അവൾ പതിയെ മണ്ണ് മാറ്റി നോക്കി . പെട്ടെന്ന് ഭയന്ന് നിലവിളിച്ചവൾ പിന്നോക്കം മറിഞ്ഞു . കഴിഞ്ഞ ദിവസം താൻ ഭക്ഷണം നൽകിയ കുട്ടിയുടെ ചേതനയറ്റ ശരീരമായിരുന്നു അത് .
ആരോ മണ്ണുമാന്തി മൂടി വെച്ചത് പോലെയായിരുന്നു ആ ശവശരീരം കാണപ്പെട്ടത്.
അവൾക്ക് തന്നെ നിയന്ത്രിക്കാൻ കഴിഞ്ഞില്ല . കരഞ്ഞുകൊണ്ടവൾ സഹായത്തിനായി ചുറ്റും നോക്കി . പെട്ടെന്നാണ് അവൾ അവൻ പരിചയപ്പെടുത്തിയ ചേച്ചിയേ കുറിച്ചോർത്തത് . അവൾ വേഗം ചേരിയിലേക്ക് അവളെ അന്വേഷിച്ച് ചെന്നു .
അധികം അന്വേഷിക്കുന്നതിന് മുൻപ് തന്നെ ആ പെൺകുട്ടിയെ അവൾ കണ്ടെത്തി .അവളോട് അവനെ കുറിച്ചന്വേഷിച്ചപ്പോൾ ഇന്നലെ മുതൽ അവനെ അവൾ കണ്ടിട്ടില്ലെന്ന് പറഞ്ഞു .
ആ പെൺകുട്ടിയേയും കൂട്ടി അവൾ അവന്റെ ശവശരീരത്തിനടുത്തേക്ക് പോയി . അവന്റെ ശരീരം കണ്ടിട്ടും അവളുടെ മുഖത്ത് ഭാവഭേദമൊന്നും ഉണ്ടായില്ല .

ചേച്ചി എന്തിനാ ഇതൊക്കെ നോക്കുന്നേ? ഇതൊക്കെ ഇവിടെ പതിവാ . ഇന്നു കാണുന്ന വരെ നാളെ കാണില്ല . ഞങ്ങൾക്ക് ചോദിക്കാനും പറയാനും ആരുല്ല . തെരുവിൽ ജനിച്ച് തെരുവിൽ ജീവിച്ച് തെരുവിൽ തന്നെ മരിച്ചു വീഴുന്നവരാ ഞങ്ങൾ . ചേച്ചി വിഷമിക്കണ്ട . ഇവിടെ കിടന്ന് ശവം നാറുമ്പോൾ മുൻസിപ്പാലിറ്റിക്കാര് വന്ന് കൊണ്ടു പൊക്കോളും ഇത്രയും പറഞ്ഞ് അവൾ തിരിച്ചു പോയി .

വീണക്ക് ഇതൊന്നും ഉൾക്കൊള്ളാൻ കഴിഞ്ഞില്ല. ഇത്രയും വലിയ നഗരത്തിൽ പട്ടിണിയും ദാരിദ്രവും കൊണ്ട് ജീവിച്ചു മരിക്കുന്ന ഒരുപാട് ജന്മങ്ങൾ ഉണ്ടെന്ന സത്യം അവൾക്ക് ബോധ്യപ്പെട്ടു . അവൾ വിവരമറിയിച്ചതിനെ തുടർന്ന് പോലീസെത്തി ശവം നീക്കം ചെയ്തു. ഇത് എങ്ങനെ സംഭവിച്ചെന്നോ ആരു ചെയ്തെന്നോ പോലീസ് പോലും അന്വേഷിച്ചില്ല. എന്തിന് ഇതിനെ കുറിച്ച് പറഞ്ഞ അവളോട് നിനക്കൊന്നും വേറേ പണിയില്ലേ ? മനുഷ്യനെ മെനക്കെടുത്താനായി എന്ന് പറഞ്ഞ് പോലീസ് ഒച്ചവെക്കുക കൂടി ചെയ്തു .

പിന്നീട് പുറത്തേക്ക് പോകുമ്പോൾ വീണയും കൂട്ടുകാരും ഒരു പൊതി ഭക്ഷണം കരുതാൻ മറക്കാറില്ല . തങ്ങളാലാവുന്ന വിധം കുറച്ചു പേരുടെ എങ്കിലും വിശപ്പ് മാറ്റാൻ കഴിയുമല്ലോ എന്ന ആശ്വാസത്തിൽ ...

ഒന്ന് ചിന്തിച്ചു നോക്കൂ . വികസന രാജ്യമാണെന്ന് വീമ്പിളക്കുന്ന നമ്മുടെ ഇന്ത്യയിൽ പട്ടിണിയും ദാരിദ്രവും ഇന്നും കൊടികുത്തി വാഴുന്നുണ്ട് . ഇതൊക്കെ കണ്ടിട്ടും അറിഞ്ഞിട്ടും അറിയാത്ത ഭാവം നടിക്കുന്ന അധികാര സമൂഹം . ചേരികളിലും മറ്റും പട്ടിണിയും പരിവട്ടവുമായി കഴിയുന്ന എത്രയോ കുടുംബങ്ങൾ . ജീവിക്കാൻ വേണ്ടി മാനം വിൽക്കാൻ തയ്യാറായി എത്രയോ സ്ത്രീകൾ . അവർ പ്രസവിക്കുന്ന മക്കൾ വീണ്ടും തെരുവിലേക്ക് തന്നെ . എന്നാണോ ഇതിന് ഒരു അവസാനം ഉണ്ടാകുക ? ഗാന്ധിജി ഇന്ത്യയെ കുറിച്ച് കണ്ട സ്വപ്നം ഇതായിരുന്നോ ???

ലിജിയ ഷാനവാസ്

തിരിച്ചറിവുകൾ ....

മനോജിന് ഉറങ്ങാൻ കഴിഞ്ഞില്ല. കണ്ണടക്കുമ്പോൾ തന്റെ മകൻ ആരോമലിന്റെ മുഖമാണ് മനസ്സിൽ തെളിഞ്ഞു വരുന്നത്. അവനിപ്പോൾ എവിടെയായിരിക്കുമോ എന്തോ? എന്റെ കുട്ടി ഭക്ഷണം കഴിച്ചിട്ടുണ്ടാകുമോ? ചിന്തിക്കും തോറും നെഞ്ചു പൊട്ടുന്നത് പോലെ തോന്നി .
മനോജ് ഒരു IT ഉദ്യോഗസ്ഥനാണ്. ഭാര്യ ശ്രീക്കുട്ടി ഒരു ബാങ്ക് ജീവനക്കാരിയും. സമ്പന്ന കുടുംബമാണ് ഇരുവരുടെയും. മനോജിന്റെ അച്ഛൻ ഗൾഫിൽ ബിസിനസ് ആയിരുന്നു . ആയുസിന്റെ പകുതിയും മരുഭൂമിയിൽ അദ്വാനിച്ച് നേടിയെടുത്ത സ്വത്തും സമ്പാദ്യവും. ഇപ്പോ നാട്ടിൽ എത്തി വിശ്രമജീവിതം നയിക്കുന്നു. ഭാര്യ സുമതി വീട്ടമ്മയാണ്. ഭർത്താവിന്റെ അഭാവത്തിൽ കുടുംബം നോക്കി മക്കളെ പഠിപ്പിച്ച് നല്ല നിലയിൽ എത്തിച്ച വീട്ടമ്മ. ഒരു സഹോദരിയുണ്ട് മനോജിന് സന്ധ്യ. അവൾ ഭർത്താവിന്റെ ഒപ്പം വിദേശത്ത് ആണ് .

ശ്രീക്കുട്ടി എറണാകുളത്തെ ഒരു മുന്തിയ ഹോട്ടലുടമയുടെ ഒരേയൊരു മകൾ . ശ്രീകുട്ടിയുടെ അമ്മ ഒരു ബ്യൂട്ടി പാർലർ നടത്തുന്നു . ഒരു മകൾ ആയതു കൊണ്ടു തന്നെ എല്ലാവിധ സ്വാതന്ത്രത്തോടും ലാളനയോടും വളർന്ന കുട്ടി . എറണാകുളത്തെ ആഡംബരജീവിതത്തിൽ ജീവിച്ചതാണ് അവൾ .

ഒരു കൂട്ടുകാരിയുടെ വെഡ്ഡിംഗ് റിസപ്ഷനാണ് മനോജും ശ്രീക്കുട്ടിയും കണ്ടുമുട്ടുന്നത് . വളരെ വേഗം അവർ സുഹൃത്തുക്കളായി . സൗഹൃദം പ്രണയത്തിലും പിന്നീട് വിവാഹത്തിലും എത്തിച്ചു. ശ്രീക്കുട്ടിയുടെ നിർബന്ധത്തിന് വഴങ്ങി വിവാഹശേഷം മനോജ് എറണാകുളത്ത് ശ്രീക്കുട്ടിയുടെ അച്ഛൻ സമ്മാനിച്ച ഫ്ലാറ്റിലേക്ക് താമസം മാറി. ഭാര്യയോടുള്ള അമിത സ്നേഹം അവനെ മാതാപിതാക്കളിൽ നിന്ന് അകറ്റി . നിറകണ്ണുകളോടെ ആ അച്ഛനും അമ്മയും മകനെ യാത്രയാക്കി .

പുതിയ ഫ്ലാറ്റ് ജീവിതവും ആഡംബരങ്ങളും അവനെ മറ്റൊരു മനുഷ്യനാക്കി. സ്വന്തം അച്ഛനമ്മമാരെ പോലും അവൻ മറന്നു തുടങ്ങി . വളരെ വൈകാതെ അവർക്ക് ഒരു ഉണ്ണി പിറന്നു. ആരോമൻ എന്ന് അവന് പേരും ഇട്ടു . പ്രസവം തന്റെ സൗന്ദര്യത്തിന് കോട്ടം തട്ടുമെന്നും ഒന്നിൽ കൂടുതൽ കുട്ടികൾ ബാധ്യതയാണെന്നുമുള്ള ശ്രീക്കുട്ടിയുടെ വാശിക്ക് മുന്നിൽ ആദ്യ പ്രസവത്തോടെ ഇനി ഒരു ഗർഭധാരണത്തിനുള്ള സാധ്യത അവർ ഇല്ലാതാക്കി.

ശ്രീക്കുട്ടിയുടെ ചില വാശികളും ദേഷ്യങ്ങളും ഒഴിച്ചാൽ അവരുടെ ജീവിതം സന്തോഷപ്രദമായിരുന്നു. ആരോമൽ നഴ്സറിയിൽ പോകാൻ തുടങ്ങിയപ്പോഴാണ് ശ്രീക്കുട്ടി തന്റെ ആഗ്രഹം വെളുപ്പെടുത്തിയത് . അവൾക്ക് വീട്ടിലിരുന്നു മടുപ്പായി എന്നും ഒരു ജോലിക്ക് പോകണമെന്നും . മകന്റെ സംരക്ഷണത്തെ കുറിച്ച് തർക്കങ്ങൾ ഉണ്ടായെങ്കിലും ഒരു ആയയെ നിർത്താമെന്ന ശ്രീക്കുട്ടിയുടെ വാശിക്ക് മുന്നിൽ മനോജ് കീഴടങ്ങി . അങ്ങനെ തന്റെ അച്ഛനെ സ്വാധീനമുപയോഗിച്ച് ഒരു ബാങ്കിൽ ശ്രീക്കുട്ടി ജോലിക്ക് കയറി . പിന്നീട് തിരക്ക് പിടിച്ച ജീവിതമായിരുന്നു ഇരുവർക്കും .

ശ്രീക്കുട്ടിക്ക് മകന്റെ കാര്യങ്ങൾ ശ്രദ്ധിക്കാൻ സമയമില്ലാതായി. മനോജിന് തന്റെ ആവശ്യങ്ങൾ സ്വയം ചെയ്യേണ്ട അവസ്ഥയായി . മകന്റെ പൂർണ്ണ ഉത്തരവാദിത്വം ആയയുടെ മേൽനോട്ടത്തിലായി . അവനെ ഒന്നു പുറത്ത് കൊണ്ടുപോകാനോ ഒന്നു സ്നേഹിക്കാനോ എന്തിന് ഭക്ഷണം കഴിച്ചോ എന്ന് അന്വോഷിക്കാനോ അവർക്ക് നേരം കിട്ടാതെയായി . അവർ ഇരുവരും സ്വന്തം തിരക്കുകളുടെ ലോകത്തിലേക്ക് ഒതുങ്ങിക്കൂടി.

അങ്ങനെയിരിക്കയാണ് ഓഫിസിൽ നിന്ന് അത്യാവശ്യമായി ചെന്നൈ വരെ മനോജിന് പോകേണ്ടി വന്നത് . പെട്ടെന്നുള്ള തീരുമാനമായതുകൊണ്ട് ശ്രീക്കുട്ടിയെ അറിയിക്കാൻ ഫോൺ വിളിച്ചപ്പോൾ അവൾ കാൾ എടുത്തില്ല . പോകുന്ന വിവരം അവൾക്ക് മെസേജ് ചെയ്തത് അവൻ എയർപ്പോർട്ടിലേക്ക് തിരിച്ചു .

ബാങ്കിൽ ഓഡിറ്റിംഗ് നടക്കുന്നത് കാരണം ശ്രീക്കുട്ടിയുടെ ഫോൺ സൈലന്റ് ആയിരുന്നു അവളാകട്ടേ മെസേജ് ഒന്നു പോലും ശ്രദ്ധിച്ചതുമില്ല. വളരെ വൈകി ഓഫിസിൽ നിന്ന് വീട്ടിലെത്തിയ അവൾ കാളിംഗ് ബെൽ അമർത്തി. ആരും തുറക്കാതെ വന്നപ്പോ ഡ്യൂപ്ലിക്കേറ്റ് ചാവി ഉപയോഗിച്ച് വാതിൽ തുറന്നു. വീടിനുള്ളിൽ ആരേയും കാണാതെ വന്നപ്പോൾ അവൾ മനോജിനെ വിളിക്കാനായി ഫോൺ എടുത്തു . അപ്പോഴാണ് മനോജിന്റെ മിസ്സ് കോളും മെസേജും അവൾ കാണുന്നത് .
അപ്പോൾ പിന്നെ മോനും ആയയും എവിടെ ? അവൾ വീടു മുഴുവനും അന്വേഷിച്ചു . അവരെ കണ്ടുകിട്ടിയില്ല . തൊട്ടടുത്തുള്ള ഫ്ലാറ്റുകളിൽ അന്വേഷിക്കാമെന്നു വച്ചാൽ ആരേയും പരിചയമില്ല . നഗരങ്ങളിലെ ഫ്ലാറ്റുകളിലെ ജീവിതം അങ്ങനെയാണ് .തൊട്ടടുത്തുള്ള അയൽവാസികളെ പോലും പരിചയമില്ല . എല്ലാവർക്കും സ്വന്തം ജീവിതങ്ങൾ മാത്രം .

ശ്രീക്കുട്ടിക്ക് തളരുന്നത് പോലെ തോന്നി. അവൾ വേഗം അച്ഛനെ വിളിച്ചു . വിവരമറിഞ്ഞ് ഓരോരുത്തരായി എത്തി അന്വേഷണം തുടങ്ങി . പോലീസിലും അറിയിച്ചു . മനോജിന്റെ ഓഫിസിൽ അറിയിച്ചതിനെ തുടർന്ന് അവർ മുഖേന മനോജ് തിരിച്ചെത്തി . പോലീസ് ഭിക്ഷാടനമാഫിയകളേയും അന്യസംസ്ഥാനത്തൊഴിലാളികളെയും ചുറ്റിപ്പറ്റി അന്വേഷണം തുടങ്ങി . പക്ഷേ പ്രതീക്ഷിച്ചതായി ഒരു തുമ്പും കിട്ടിയില്ല .

പത്രമാധ്യമങ്ങളിലൂടെയാണ് മനോജിന്റെ മാതാപിതാക്കൾ വിവരം അറിഞ്ഞത് . അവർ വേഗം മകന്റെ അരികിലേക്ക് പുറപ്പെട്ടു .

തന്റെ മാതാപിതാക്കളെ കണ്ടപ്പോഴാണ് തന്നിലെ അച്ഛനെ അവൻ തിരിച്ചറിഞ്ഞത് . താൻ തന്റെ മാതാപിതാക്കളോട് ചെയ്ത തെറ്റിന് ഈശ്വരൻ തനിക്ക് തന്ന ശിക്ഷയാണിതെന്ന് അവൻ തിരിച്ചറിഞ്ഞു . കഷ്ടപ്പെട്ടു വളർത്തിയ മാതാപിതാക്കളെ ഒരു നിമിഷം കൊണ്ട് തള്ളിക്കളഞ്ഞതിൽ അവൻ ഖേദിച്ചു . അവരുടെ കാലുപിടിച്ച് അവൻ മാപ്പിരന്നു . തന്റെ തെറ്റുക്കൾ അപ്പോഴാണ് ശ്രീക്കുട്ടിക്കും ബോധ്യമായത്. മാതാപിതാക്കളിൽ നിന്ന് മക്കളെ അകറ്റുമ്പോഴുള്ള വേദന അവൾ ഇന്ന് തിരിച്ചറിഞ്ഞു.

പക്ഷേ എന്തു ചെയ്യാം തിരിച്ചറിവുകൾ ഉണ്ടായപ്പോഴേക്കും അവരുടെ മകൻ അവരിൽ നിന്ന് അകലേക്ക് പോയ്മറഞ്ഞിരുന്നു .....

ലിജിയ ഷാനവാസ്

മരണമെത്തുന്ന നേരത്ത് .... ( ചെറുകഥ )

എഴുന്നേറ്റേ... ഒന്നെഴുന്നേറ്റേന്ന് ....
ഓഫിസിൽ എപ്പോഴോ അറിയാതെ ഉറക്കത്തിലേക്ക് വീണുപോയതാണ് ....

ശ്ശോ ആരാ ഇത് ... കണ്ണുതുറന്നപ്പോൾ ഒരു പരിചയവുമില്ലാത്ത മുഖം .

നിങ്ങളാരാ .. എന്താ ഇവിടെ ? എന്തിനാ എന്നെ വിളിച്ചത് ? ഒരു പരിചയവുമില്ലാത്ത ഒരാൾ ശല്യം ചെയ്തപ്പോഴുള്ള നീരസം മറച്ചു വയ്ക്കാതെ ഞാൻ തിരക്കി .

ഇപ്പോ ഞാൻ ആരാണെന്നതാണോ പ്രശ്നം ? നിങ്ങൾ ഒന്ന് പുറത്തേക്ക് വന്നേ ഒരു കൂട്ടം കാട്ടിത്തരാം ... ഇതും പറഞ്ഞയാൾ എന്നെ പുറത്തേക്ക് വിളിച്ചു .

എന്തു കാട്ടിത്തരാമെന്ന് നിങ്ങളാരാന്ന് എനിക്കറിയില്ല പിന്നെ ഞാൻ എന്തിന് നിങ്ങടെ കൂടെ വരണം . ഞാൻ വരില്ല . അയാളുടെ മുഖഭാവം ശ്രദ്ധിച്ചു കൊണ്ട് ഞാൻ പറഞ്ഞു.

നിങ്ങൾക്ക് വന്നേ പറ്റൂ .. നിങ്ങളെ കാത്ത് പുറത്തൊരാൾ നിൽപ്പുണ്ട് ഒന്നു വേഗം വായോ ..
അയാൾ വീണ്ടും ധ്യതി കാട്ടി .

എന്നെ കാത്തോ ആരാ ? എവിടുന്നാ ? ഞാൻ തിരക്കി
നിങ്ങൾ തന്നെ വന്നു നോക്ക് അതും പറഞ്ഞയാൾ വേഗം പുറത്തേക്ക് നടന്നു ..

ആരാണ് വന്നതെന്നറിയാനുള്ള ധ്യതിയിൽ ഞാനും വേഗം അയാൾക്കൊപ്പം ഇറങ്ങി .
ലീഫ്റ്റിൽ കയറി Ground FIoor press ചെയ്തു.

അയ്യാൾ ആകട്ടേ ഒന്നും മിണ്ടാതെ എന്തോ ചിന്തിച്ചു നിൽക്കുന്നു . ലിഫ്റ്റ് Ground FIoor ൽ എത്തി പതിയെ ഞാൻ അയാൾക്ക് പിന്നാലെ പുറത്തേക്ക് ഇറങ്ങി . ഫ്ലാറ്റിന് പുറത്ത് റോഡരികിൽ ഒരു ജനക്കൂട്ടം .
ദേ .. അങ്ങോട്ട് ചെല്ല് ആ കൂട്ടത്തിന് നടുവിൽ നിന്റെ ചോദ്യങ്ങൾക്കുള്ള ഉത്തരമുണ്ട് .. അവിടെക്ക് ചൂണ്ടി അയ്യാൾ പറഞ്ഞു.

ഞാൻ വേഗം ആ ജനക്കൂട്ടം ലക്ഷൃമാക്കി നടന്നു.
പടച്ചോനെ വല്ല ആക്സിഡൻറും ആണോ ? ആരായിരിക്കും ? പരിചയമുള്ള നൂറു മുഖങ്ങൾ മുന്നിലൂടെ കടന്നു പോയി .

ആളുകൾക്കിടയിലൂടെ ഞാൻ നടുവിലേക്ക് ചെന്നു . നിലത്തു ചോരയിൽ കുളിച്ചു കിടക്കുന്ന മുഖം കണ്ട് ഒരു നിമിഷം ഞെട്ടിത്തരിച്ചു പോയി.

റബ്ബേ .. ഇതു ഞാൻ തന്നെയല്ലേ ? എനിക്ക് എപ്പോ ഇത് സംഭവിച്ചു . അപ്പോ ഈ ഞാൻ ആരാണ് ?
ചുറ്റും കൂടിനിൽക്കുന്നവർ എന്നെ ശ്രദ്ധിക്കുന്നേയില്ല .

അപ്പോഴാണ് കൂട്ടത്തിൽ ഒരുവൻ പറയുന്നത് കേട്ടത് . ജീവനുണ്ട് . ഇനിയും മരിച്ചിട്ടില്ല .

എന്താ .. എനിക്ക് ജീവനുണ്ടെന്നോ? എന്നിട്ടെന്താ ഇവർ ഒന്നും ചെയ്യാതെ നോക്കി നിൽക്കുന്നത് ? ആരെങ്കിലും ഒന്ന് ആശുപത്രിയിൽ എത്തിച്ചൂടെ ?

ഞാൻ നിസ്സാഹയായി ചുറ്റുമുള്ളവരെ നോക്കി ..
പലരും Mobile ൽ ഫോട്ടോ പിടിക്കുന്നതിനും Selfi എടുക്കുന്ന തിരക്കിലാണ് .
ആരോ പറയുന്നത് കേട്ടു . ആക്സിഡന്റ് കേസാണ് തൊട്ടു പോയാൽ തലയിലാകുമത്രേ ..

എന്നു കരുതി ജീവൻ അവശേഷിക്കുന്നവരെ രക്ഷിക്കാൻ ശ്രമിക്കരുതെന്നാണോ ?

എനിക്ക് മരിക്കണ്ട ... ഇനിയും ജീവിക്കണം ..
ആരേലും എന്നെ ഒന്നു രക്ഷിക്കുമോ ???
ഞാൻ അവരോടായി കേണപേക്ഷിച്ചു ...
ആരു കേൾക്കാൻ ... ജീവനുള്ളവയുടെ നിലവിളി കേൾക്കാത്തവർ എങ്ങനെ ആത്മാവിന്റെ നിലവിളി കേൾക്കും??

ഇനി എന്തു ചെയ്യും ? അപ്പോഴാണ് എന്നെ വിളിച്ചു കൊണ്ടു വന്ന ആളിനെ കുറിച്ചോർത്തത്.
അയ്യാൾക്ക് എന്നെ കാണാൻ സാധിക്കുമല്ലോ . അയ്യാളോട് അപേക്ഷിക്കാം രക്ഷിക്കുമോ എന്ന് .

ഞാൻ ചുറ്റും നോക്കി കുറച്ചകലെയായ് അയാൾ എന്തോ ആലോചിച്ചു നിൽപ്പുണ്ട് ഞാൻ വേഗം അങ്ങോട്ട് ചെന്നു .
പ്ലീസ് ചേട്ടനെങ്കിലും എന്നെ രക്ഷിക്കണം എനിക്ക് ഇപ്പോ മരിക്കണ്ട . എന്നെ ഒന്ന് ആശുപത്രിയിൽ എത്തിക്കുമോ ???

എന്റെ അവസ്ഥ കണ്ട് അയ്യാൾ ഒന്നു പുഞ്ചിരിച്ചു ...

കഴിഞ്ഞ ആഴ്ച നിന്റെ സ്ഥാനത്ത് ഞാനായിരുന്നു . ഈ കണ്ട ജനക്കൂട്ടത്തോട് ഞാനും അഭ്യർത്ഥിച്ചതാ . പക്ഷേ ആരും കേട്ടില്ല. ഇന്നു നീ ആണെങ്കിൽ നാളെ മറ്റൊരാൾ .
ആരും ഉണ്ടാകില്ല സഹായത്തിന് ചോര വാർന്ന് ജീവൻ നിശ്ചലമാകുന്നത് വരെ ...
അത്രേം പറഞ്ഞ് അയാൾ മുന്നോട്ട് നടന്നു ...

ഞാൻ പതിയെ ആൾക്കൂട്ടത്തിലേക്ക് പിന്തിരിഞ്ഞു നോക്കി ... അവിടെ എന്റെ ജീവൻ അതിന്റെ അവസാനതുടിപ്പിലേക്ക് ചെന്നെത്തുകയായിരുന്നു ...

ലിജിയ ഷാനവാസ് ..