..................ഇത്തവണത്തെ ജി.സി.ഡി എ.ഓഫീസിൽ നിന്നുമുള്ള വിനോദയാത്ര പരുന്തുംപാറയിലേക്കായിരുന്നു.... പരുന്തുംപാറ കേരളത്തിന്റെ വിനോദ സഞ്ചാര ഭൂപടത്തിലേക്ക് ചേക്കേറിയിട്ട് കുറച്ചു നാളുകൾ മാത്രമെ ആയിട്ടുള്ളൂ... കഴിഞ്ഞ ഒക്ടോബർ മാസത്തിലെ രണ്ടാം ശനിയാഴ്ചയായിരുന്നു ഞങ്ങളുടെ യാത്ര.. രാവിലെ 8 മണിക്ക് ഓഫീസിൽ നിന്നും ഒരു ബസ് നിറയെ ആളുണ്ടായിരുന്നു... കുടുംബസമേതമാണ് യാത്ര.... കടവന്ത്രയിൽ നിന്നും തലയോലപറമ്പ് - പാല റൂട്ടിലൂടെയുള്ള യാത്ര.... ബസിനുള്ളിൽ ഡാൻസും പാട്ടുമായി നല്ല ഓളം.... ഇടയ്ക്ക് പ്രഭാത ഭക്ഷണത്തിനു മാത്രമായി ഒരിടത്തു നിർത്തി... ഇടുക്കി ജില്ലയിലാണ് പരുന്തുംപാറ.... വിനോദസഞ്ചാര മേഖലകളായ വാഗമണിനും പീരുമേടിനും വളരെ അടുത്ത്..മുണ്ടക്കയം ഒക്കെ കഴിഞ്ഞുള്ള യാത്ര വളരെ രസാവഹമായിരുന്നു.... ഇരുവശവും പ്രക്യതി രമണീയമായ കുന്നുകളും താഴ്വരകളും... എല്ലാം പച്ച പരവതാനി നിറച്ച പോലെ മനോഹരം.. ഇടയ്ക്ക് ചെറിയ ജലധാരകളും കാണാം... നട്ടുച്ചയ്ക്കും കോടമഞ്ഞ് തൊട്ടുതലോടി പോകുന്ന ചെറിയ താഴ്വരകൾ....റോഡ
ിനോടു ചേർന്നു ചെറിയ ഒരു വെള്ളച്ചാട്ടത്തിനടുത്ത് വണ്ടി നിർത്തി... കുറച്ചു ഫോട്ടോകളും സെൽഫിയും എടുത്തു... സ്ഫടികം പോലെ തിളങ്ങുന്ന തണുത്ത ജലം കൊണ്ട് മുഖം കഴുകി യാത്രയുടെ ക്ഷീണം മാറ്റി.... ചെറിയ മരങ്ങളിൽ യാത്രക്കാർ എറിഞ്ഞു നൽകുന്ന ഭക്ഷണത്തെ നോക്കിയിരിക്കുന്ന കുട്ടി കുരങ്ങുകൾ ഒരു കൗതുകമായിരുന്നു.... യാത്ര വീണ്ടും തുടർന്നു.. ഏകദേശം ഒരു മണിയോടു കൂടി പരുന്തുംപാറയിലെത്തി... ബസ്സിൽ നിന്നിറങ്ങി ചുറ്റുപാടും ഒന്നു നോക്കി... ഭൂമിയിലെ സ്വർഗ്ഗമാണോ എന്നു തോന്നിപ്പോയി.... ചുറ്റിനും മനോഹരമായ ചെറിയ കുന്നുകളും താഴ്വരകളും... പച്ച പുതച്ച് മനസ്സിനെ കുളിർപ്പിച്ചു... ഭക്ഷണ സമയമായതിനാൽ അവിടെ ബസ്സ് ഒതുക്കി അതിനുള്ള ഏർപ്പാടുകൾ തുടങ്ങി... ഉച്ചഭക്ഷണം കഴിഞ്ഞ് ചെറിയ ഗ്രൂപ്പുകളായി തിരിഞ്ഞ് കാഴ്ചകൾ ആസ്വദിക്കുവാൻ തുടങ്ങി... ഉച്ചവെയിൽ മാറിയതോടെ കുന്നുകളും താഴ്വരകളും നിറഞ്ഞ പ്രദേശം മുഴുവൻ പച്ചപ്പിൽ നിന്നും സുവർണ്ണനിറമായി.... ആകാശം വ്യക്തമായിരുന്നതിനാൽ അകലെ ശബരിമല കാടുകൾ കാണാമായിരുന്നു.... ശബരിമലയിലെ മകരജ്യോതി ഇവിടെ നിന്നും കാണാമെന്ന് പറയുന്നു... ആ പ്രദേശം മൊത്തത്തിൽ ഒന്നു വീക്ഷിച്ചാൽ ഒരു പരുന്തു പറന്നിറങ്ങുന്നതു പോലെ ആയിരുന്നു... ഒരു പക്ഷേ അതിനാലാകാം പരുന്തുംപാറ എന്ന് അറിയപ്പെടുന്നത്... എടുത്തു പറയാവുന്ന മറ്റൊന്ന് ഇവിടത്തെ 'സൂയിസൈഡ് പോയിന്റാണ് '. ഇവിടെ നിന്നും താഴേക്കു നോക്കിയാൽ കണ്ണെത്താത്ത നിഗൂഢ താഴ്വരയാണ്.. നമുക്കു തല കറങ്ങുന്നതായി അനുഭവപ്പെടും... ടാഗോർ ഹെഡും അവിസ്മരണീയമായ ഒരു കാഴ്ചയാണ്.... ചിലയിടങ്ങളിൽ ചരിഞ്ഞ കുന്നുകൾ ഉണ്ട്.... ശ്രദ്ധയോടെ നടന്നില്ലെങ്കിൽ അപകടം ഉണ്ടാകുവാൻ സാദ്ധ്യതയുണ്ട്.. അവിടവിടെയായി ചെറിയ ചായക്കടകളുണ്ട്... ചെറിയ തണുപ്പിൽ ചൂടുചായ കുടിക്കുവാൻ നല്ല രസമായിരുന്നു... അപ്പോഴേയ്ക്കും സമയം അഞ്ചു മണിയോട് അടുത്ത്... എല്ലാവരും ചേർന്ന് കുറച്ച് ഫോട്ടോ എടുത്തപ്പോഴേക്കും പനിനീർ തളിക്കുന്ന പോലെ മഴത്തുള്ളികൾ വീണു തുടങ്ങിയിരുന്നു.. പുൽ പ്രദേശം മുഴുവൻ കോടമഞ്ഞ് പുതപ്പിച്ച് തുടങ്ങിയിരുന്നു.. കോടമഞ്ഞ് ഒഴുകി പോകുന്നതു കാണുവാൻ ഒരു പ്രത്യേക ഭംഗി തന്നെയുണ്ടായിരു
ന്നു..... അതും ആസ്വദിച്ച് ഞങ്ങൾ മടക്കയാത്ര ആരംഭിച്ചു.... ക്ഷീണം തോന്നിയതേയില്ല... പാട്ടും ഡാൻസുമൊക്കെ വീണ്ടും തുടങ്ങി... തിരിച്ച് മുണ്ടക്കയത്ത് ഒരു ഹോട്ടലിൽ നിന്നും രാത്രി ഭക്ഷണം കഴിച്ച് പതിനൊന്നര മണിയോടെ എറണാകുളത്തെത്തി...... ഇടുക്കി ജില്ലയിലെ പീരുമേടിൽ നിന്നും 6 KM ഉം തേക്കടിയിൽ നിന്നും 25 KM ഉം അകലെയായി സ്ഥിതി ചെയ്യുന്ന പരുന്തുംപാറ ഒരു എകദിന വിനോദയാത്രയ്ക്ക് പറ്റിയ സ്ഥലമാണ്... കോട്ടയം - കുമളി നാഷണൽ ഹൈവേയിൽ നിന്നും 3 KM അകലെയാണ്.. വളർന്നു വരുന്ന ഒരു വിനോദ സഞ്ചാര കേന്ദ്രമായതിനാൽ താമസ സൗകര്യങ്ങളുടെ കുറവുകളുണ്ട്... മനസ്സിൽ എന്നും കുറിച്ചു വയ്ക്കാവുന്ന ഒരു വിനോദയാത്ര തന്നെയായിരുന്നു പരുന്തുംപാറയിലേതെന്ന് നിസ്സംശയം പറയാവുന്നതാണ്....
By: hariMenon
