കഴിക്കാനുള്ള ചോറും കറിയും ഉപ്പേരിയും മേശപ്പുറത്ത് കൊണ്ട് വെച്ച് രാജേഷ് ബെഡ് റൂമിൽ വന്ന് കിടന്നു..
ഫേസ്ബുക്കിൽ റയീസ് മുബാറക് എന്ന ഫേക്ക് ഐഡിയിൽ ലോഗ് ഇൻ ചെയ്തു..
ഒരു ഗ്രൂപ്പിൽ രാഷ്ട്രീയ ചർച്ച നടക്കുന്നുണ്ട്.
കമ്മന്റ്സിലൂടെ കുറച്ച് വായിച്ച ശേഷം.
അവനും ഒരു കമ്മന്റ് ഇട്ടു..
കമ്മന്റ് -ഇത് ഞങ്ങളുടെയും നാടാണ്.. ഞങ്ങളുടെ പഴയ തലമുറയും ഈ നാടിന് വേണ്ടി പോരാടിയിട്ടുണ്ട്. അതുകൊണ്ട് നിങ്ങളുടെ സ്വന്തം രാജ്യം മാത്രം എന്ന ആഗ്രഹങ്ങൾ വേണ്ട.
ഉടനെ അതിന് മറുപടിയും വന്നു..
കമ്മന്റ് -നിങ്ങളുടെ രാജ്യം തൊട്ടപ്പുറം ഉണ്ട്. അങ്ങോട്ടേക്ക് പൊക്കോളൂ..
അതിന് താഴെയും കുറെ കമ്മന്റ്സ് രണ്ട് ചേരിയിലിൽ നിന്നും വന്നു..
കുറെ വായിച്ച ശേഷം ലോഗ് ഔട്ട് ചെയ്തു.
രാജേഷ് കൃഷ്ണൻ എന്ന ഒറിജിനൽ അക്കൗണ്ട് ലോഗ് ഇൻ ചെയ്തു..
പോസ്റ്റുകൾ നോക്കുന്നതിടക്ക് അമ്മയുടെ മിസ്സ് കാൾ വന്നു..
നാട്ടിലപ്പോൾ 10. 30 ആയിക്കാണും..
തിരിച്ച് വിളിച്ചു..
എന്തായി അമ്മേ കുറവുണ്ടോ.. ?
എനിക്ക് കുറവുണ്ട്.. പക്ഷെ ഇന്നലെ മുതൽ അവൾക്കും തുടങ്ങി..
എന്നിട്ട്.. ?
ഇന്നലെ തന്നെ മരുന്ന് തുടങ്ങി.
പക്ഷെ നല്ല ക്ഷീണം.. എന്നേക്കാൾ കൂടുതൽ പൊന്തിയിട്ടും ഉണ്ട്..
രണ്ട് പേർക്കും ഒന്നും ചെയ്യാനും പറ്റാണ്ടായി..
എന്നിട്ട് ഭക്ഷണം.. ?
കാലത്ത് ബ്രെഡ് കഴിച്ചു.. ഇന്നലത്തെ കഞ്ഞി ഉണ്ടാർന്നു അത് ഉച്ചക്കും..
നിങ്ങൾക്കപ്പോൾ അമ്മായിനെ വിളിക്കാറുനിലെ.. ?
വിളിച്ചു.. ഉണ്ണ്യേളെ സ്കൂളിലെ യുവജനോത്സവം ആണത്രേ.. അവൾക്ക് അവടെ പോണെന്ന്..
ഉം. ലത ചേച്ചിയോ ?
ചേച്ചിക്ക് പേടി.. അവിടെ ആർക്കും വസൂരി മുൻപ് വന്നിട്ടില്ലെന്ന്..
ഉം.. ആരൊക്കെ ഉണ്ടായിട്ട് എന്തിനാലെ അമ്മേ.. ?രാത്രി എന്ത് ചെയ്തു.. ?
കുറച്ച് ദിവസം ആയല്ലോ പുറത്തിറങ്ങിട്ട്. ഇന്നലെ മുതൽ ഇവളും അകത്തല്ലേ.. രണ്ട് പേരേം കാണാതെ ആയപ്പോൾ ഇന്ന് ഇത്ത വന്നിട്ട് ഉണ്ടാരുന്നു.. പറയാത്തതിനും വിളിക്കാത്തതിനും കുറെ വഴക്ക് പറഞ്ഞു.
കുറെ കഴുകാൻ ഉണ്ടായിരുന്നു.. അത് കഴുകി.. അടുക്കള മൊത്തം തുടച്ചു.. ഒരു രണ്ട് രണ്ടര മണിക്കൂർ കഷ്ട്ടപെട്ടു പാവം..
കുട്യേള് സ്കൂളിന് വരാറായപ്പോൾ പോയി..
ആ തിരക്ക് കഴിഞ്ഞപ്പോൾ ആ മൂന്നിനേം കൊണ്ട് വന്നു.. എനിക്കൊരു പേടിയും ഇല്ല.. പിന്നെ വന്നാൽ അപ്പൊ നോക്കെന്നേ... മുറ്റം മൊത്തം അടിച്ചു.. നനച്ചിട്ട് കുറെ നാളായിരുന്നു.. നാല് പേരും കൂടി മൊത്തം നനച്ചു.. 7 ആകാറായപ്പോൾ പോയി.. കുറച്ച് മുൻപ് ഭക്ഷണം കൊണ്ട് തന്നു..
വിളിച്ചിട്ട് ഉണ്ടായിരുന്നു.. കാലത്ത് ബ്രെഡ് കഴിക്കണ്ട.. അവിടെന്നു കൊണ്ട് വരാമെന്നു..
മനുഷ്യരെന്നു പറയണത് ഇതൊക്കെ ആണ്.
എന്ത് മതോം ജാതിയും.
സ്നേഹമെന്നു പറയണത് ഇതൊക്കെ ആണ്..
ഉം... ഞാൻ വിളിക്കാം.. അവളോട് പറഞ്ഞേക്ക്..
ഫോൺ വെച്ച് കുറെ നേരം കണ്ണടച്ച് കിടന്നു..
അമ്മയെ വീണ്ടും വിളിച്ച് സീനത്തയുടെ നമ്പർ വാങ്ങി..
ഹലോ.. ഇത്ത രാജേഷ് ആണ്..
ആ .. മോനെ.. എന്തുണ്ട് വിശേഷം.. നിനക്ക് സുഖലേ... ജോലിയൊക്കെ കുഴപ്പമില്ലലോ.. നി തടിച്ചോ .. കളർ വെച്ചോ.. ഇവിടത്തെ കാര്യം ആലോചിച്ച് വിഷമിക്കണ്ടാട്ടാ.. ഞങ്ങളൊക്കെ ഉണ്ട്.. നി ധൈര്യമായിരിക്ക്..
ഉം.. അങ്ങോട്ടേക്കൊന്നും പറയാൻ തോന്നിയില്ല.. പറ്റിയില്ല..
ഫോൺ വെച്ചു.. കണ്ണ് നിറഞ്ഞിരുന്നു..
വീണ്ടും കണ്ണടച്ച് കിടന്നു..
എഴുന്നേറ്റപ്പോൾ ആദ്യം ചെയ്തത് റയീസ് എന്ന അക്കൗണ്ട് ഡിലീറ്റ് ചെയുകയാണ്..
ഫ്രണ്ടിന് ഒരു മെസ്സേജ് അയച്ചു..
ടാ.. നീ ഒരു അക്കൗണ്ടിനെ ആവശ്യം ഉണ്ടെന്ന് പറഞ്ഞിരുന്നില്ലേ.. എന്റെ ഒരു ആളുണ്ട് . എനിക്ക് വേണ്ടപെട്ടതാ.. അത് നി എന്തായാലും നീ ശരിയാക്കി തരണം.. ഞാൻ അവനോട് നിന്റെ മെയിലിലേക്ക് സിവി അയക്കാൻ പറയാം. ഉമ്മർ എന്നാ പേര്..
ഉമ്മർ, സീനത്തയുടെ സഹോദരനാണ്...
By: Vineeth Vijayan
