ഏതൊരു സ്ത്രീയുടെ ഉള്ളിലും ഒരു ഫെമിനിസ്റ്റ് ഒളിഞ്ഞു കിടപ്പുണ്ട് എന്ന് പറയുന്നത് എത്ര ശരിയാണ് .......എപ്പോ വേണമെങ്കിലും ആ ഫെമിനിസ്റ്റ് പുറത്തേക്കു ചാടാം ....
എന്നെ പുറത്തൊന്നും കൊണ്ട് പോകുന്നില്ല എന്ന് മുഖം വീർപ്പിച്ചു ഇരുന്നത് പ്രമാണിച്ചാണ് അന്നത്തെ വീക്കെൻഡ് അന്തവും കുന്തവുമില്ലാതെ വണ്ടിയോടിച്ചു നടക്കാമെന്നും പറഞ്ഞു ഏട്ടൻ എന്നെയും കൊണ്ട് പുറത്തേക്കിറങ്ങിയത് ........ പുറംകാഴ്ചകൾ കണ്ടിരിക്കാൻ എനിക്കെന്നും വല്യ ഇഷ്ടമായിരുന്നു ...... കാറിൽ മാക്സിമം ഒച്ചയിൽ "ആലുമാ ഡോലുമാ " പാട്ടും വച്ചിട്ടുണ്ട് ......
പെട്ടെന്നാണ് കണ്ണിനു കുളിർമയേകി ഒരുപറ്റം കിടു ബുള്ളറ്റുകളും ഹാർലി ഡേവിഡ്‌സണുകളും നല്ല കിലുക്കു ഹെൽമെറ്റുകളും വച്ച് ലൈറ്റ് ഒക്കെ ഇട്ടു ചുറ്റുമുള്ളവരെ ഒക്കെ കൊതിപ്പിച്ചു കടന്നു കളഞ്ഞത് ...... അവര് കണ്ണിൽ നിന്ന് മാഞ്ഞിട്ടും കണ്ടു നിന്നവരുടെ വായ അടഞ്ഞിട്ടില്ലായിരുന്നു
" ഹിതൊക്കെ കാണുമ്പോഴാ ....ഒരു ആണായി ജനിച്ചില്ലലോ എന്ന് വിഷമം തോന്നുന്നത് ...."
ഞാൻ പറഞ്ഞില്ലേ ...ഫെമിനിസ്റ്റ് പുറത്തു ചാടി ....." നിങ്ങൾക്ക് ആണുങ്ങൾക്ക് ഒക്കെ എന്താ സുഖം ...... ഏതു പാതിരാത്രിക്കും പുറത്തു പോകാം ...... ബുള്ളറ്റെടുത്തു ഓടിക്കാം ....ഇഷ്ടം പോലെ കറങ്ങി നടക്കാം ...ആരുടെയും കാലു പിടിക്കണ്ട ഒന്ന് പുറത്തു പോണമെകിൽ .....ല്ലേ ????"
എന്നിട്ട് കാക്ക നോക്കും പോലെ ചെരിഞ്ഞൊന്നു നോക്കി ...കെട്ട്യോന്റെ മുഖത്തേക്ക് ..... ഒരു പുഞ്ചിരി മാത്രം ... " ഉം ...." ഹാവൂ ഒരു മൂളല് വന്നു ...
"ഞാൻ ഒരു ആണായിരുന്നെങ്കിൽ നോക്കിക്കോ ......ഒറപ്പായിട്ടും ബുള്ളറ്റ് എടുത്ത് ലോകം മൊത്തം കറങ്ങിയേനെ ...... ദുൽഖർ സൽമാനെപ്പോലെ..." എന്നിട്ടു വീണ്ടും പുച്ഛിച്ചൊന്നു ചെരിഞ്ഞു നോക്കി .....
മിണ്ടാട്ടം ഇല്ല .... ഫെമിനിസ്റ്റ് അങ്ങ് വിജയിച്ചു നെഞ്ചും വിരിച്ചു ഇരുന്നു ....
"ആഗ്രഹം ഉണ്ടായിരുന്നു ചിപ്പീ..... കൂട്ടുകാരുടെ കയ്യിലെ മുന്തിയ ഫോണുകളും ബൈക്കുകളും കാണുമ്പോൾ ... അന്നും എനിക്കതു സാധിക്കുമായിരുന്നു .... വീട്ടിൽ പറഞ്ഞാൽ അവരതൊക്കെ വേടിച്ചു തരുമായിരുന്നു ....പക്ഷെ .... ഡിഗ്രിക്ക് പഠിക്കുമ്പോ മനസ്സിൽ പഠിക്കണം എന്ന ചിന്തയെ ഉണ്ടായിരുന്നുള്ളു ..... ഞാൻ അത്ര പഠിപ്പിസ്റ്റൊന്നും ആയിരുന്നില്ലേ .... ഒത്തിരി കഷ്ടപ്പെട്ടിട്ടാ.... രാത്രി ഒക്കെ ട്യൂഷൻ പോയിട്ടാ നല്ല മാർക്കിൽ ജയിച്ചത് ...."
നമ്മൾ വല്ലാണ്ടൊന്നു പരുങ്ങി .....
"അതിനിടയ്ക്കും സ്വന്തമായി അധ്വാനിച്ചിരുന്നു .... പഠിത്തം കഴിഞ്ഞു നല്ല ശമ്പളത്തിൽ ജോലിക്ക് കയറിയപ്പോഴും നല്ലൊരു മൊബൈലോ വണ്ടിയോ വാങ്ങിയില്ല ...... എല്ലാം കൂട്ടിവച്ചു നല്ലൊരു വീട് പണിഞ്ഞു .... അത് കൊണ്ടൊക്കെ അല്ലേ മുത്തേ നിന്നെപോലൊരു പെണ്ണിനെ എനിക്ക് കിട്ടിയത് ..... ഇതുപോലൊന്നും ഇല്ലാതെ തെക്കുവടക്കു വണ്ടിയോടിച്ചു നടക്കുകയായിരുന്നെങ്കിൽ നിന്നെ നിന്റെ വീട്ടുകാർ എനിക്ക് തരുമായിരുന്നോ????"
"ഏട്ടാ.....അത്...."
"അച്ഛനും അമ്മയ്ക്കും ഒരു കടവും വരുത്താതെ ആർഭാടമായി നിന്നെ താലി കെട്ടി ഞാൻ കൊണ്ട് പോന്നു.........ആണായി ജനിച്ചതോണ്ട് എന്ത് വേണേലും ചെയ്യാം ....ശരിയാ .... പക്ഷെ ശരിയായ രീതിയിൽ കാര്യങ്ങൾ ചെയ്താലേ അവൻ ഒരു നല്ല ആണാവൂ ....."
"ശോ.....എനിക്കെന്തിന്റെ കേടായിരുന്നൂ "......പുറത്തേക്കു വന്ന ഫെമിനിസ്റ്റിനെ ചന്തിക്കു നാല് പെട കൊടുത്തു അകത്തേക്ക് കേറ്റി വിട്ടിട്ട് .....കെട്ടിയോന്റെ ചുമലിലേക്ക് ചാഞ്ഞിരുന്നപ്പോൾ എന്തൊരു സുഖം ....
" മുത്തിന് എന്താ വേണ്ടേ ഇപ്പൊ .....ബുള്ളറ്റിൽ പോണം അല്ലേ ...... നാട്ടിൽ ചെല്ലട്ടെ ....നിർമലിന്റെ ബുള്ളറ്റെടുത്തു നിന്നെ എത്ര ദൂരം വേണേലും ഞാൻ കൊണ്ട് പോവാം ട്ടോ ....."
വാൽക്കഷ്ണം : ഞാൻ പണ്ടേ നന്നായതാ .....എന്നാലും ഇടക്ക് ഒക്കെ ഇങ്ങനെയാ
By
മഴമേഘ പെണ്ണ്
