Showing posts with label സുഷമഅമ്മങ്കോട്. Show all posts
Showing posts with label സുഷമഅമ്മങ്കോട്. Show all posts

ബാല്യസ്മരണകൾ




Visit http://www.nallezhuth.com for full post and more
മീനച്ചിലാറൊഴുകീടുന്ന നാട്ടിലെൻ ,
ബാല്യസ്മരണകൾ മുത്തണിഞ്ഞീടുന്നു 
ജന്മഗേഹംവെടിഞ്ഞിങ്ങു ദൂരത്തുള്ള -
വള്ളുവനാട്ടിൽ ഞാനെത്തീ വിധിവശാൽ
ആഞ്ഞിലിയും പ്ലാവും തെങ്ങും കവുങ്ങുമായ് ,
നീളെ സമൃദ്ധമായ് നിന്നൊരു ഭൂമിയിൽ ,
ഓടിക്കളിച്ചുനടന്നോരു ബാല്യമെൻ
ഓർമ്മയിലിന്നും മറയാതെ നില‌്പു ഹാ!
മുറ്റത്തുനിന്നൊരു മൂവാണ്ടൻമാവു,മാ-
മാവിൽ പടർന്നൊരു പിച്ചകവല്ലിയും,
തലയിൽ നിറകുടമേന്തി നില്ക്കുന്നൊരാ -
ചെന്തെങ്ങും പേരയും ഈന്തും കദളിയും
നട്ടുനനച്ചൊരെൻ പിച്ചകവള്ളി ,ഞാ-
നെത്തുന്നതും നോക്കിനില്പതുണ്ടാകുമോ ?
കത്തുന്ന വേനലിൽ മുത്തുകള്‍ സൂക്ഷിച്ച -
സ്വർണ്ണക്കുടമേന്തിയാഞ്ഞിലി വൃക്ഷവും ?
മുറ്റത്തരികിലാ പുല്ത്തൊഴുത്തിൽ ,ഇന്നും
' ചെമ്പോത്തി 'യും 'കറുമ്പി'പ്പശുവുംകൂടി,
കഞ്ഞിയും പുല്ലുമായമ്മ ചെല്ലുന്നതും കാത്തു,
തലയാട്ടിനോക്കിനില്ക്കുന്നിതോ
ശുദ്ധമാം പൈമ്പാൽ കറന്നമ്മ ചെല്‍‌വതും-
കാത്തു പാണ്ടൻപൂച്ച കാവലിരിക്കുമോ?
ആ പാലു കൊണ്ടമ്മ ഞങ്ങൾക്കുവേണ്ടി
നല്പ്പാൽപ്പായസം ചമയ്ക്കുന്നതുണ്ടാകുമോ ?
എല്ലാം വെറുംതോന്നൽ ,വർഷങ്ങളേറെയായ് ,
എങ്കിലുമിന്നുമെന്നോർമ്മകളാമണ്ണിൽ
ഓടിക്കളിക്കുന്നു, വീണ്ടുമൊരിക്കലാ-
ജന്മഗൃഹമൊന്നു കാണാൻ കൊതിപ്പു ഞാൻ.
ഇങ്ങിവിടെ ,ഈ വിദൂരത്തിലിന്നു
മനപ്പായസമുണ്ടു ഞാനിരിക്കുന്നിതാ
********************************************
സുഷമ അമ്മങ്കോട്.

നല്ല നാട്



ഇമ്പമോടേയെൻ്റെ മുറ്റത്തായി
തുമ്പയൊന്നു ചിരിതൂകി നില്പൂ
ഇന്നലെയന്തിക്കും കണ്ടതില്ലാ
ഇന്നിപ്പോഴെങ്ങുന്നു വന്നുനീയും?
കുഞ്ഞരിപ്പല്ലു വിടർത്തിനില്ക്കും
തുമ്പതന്നന്തികത്തെത്തി ഞാനും
തൊട്ടുതലോടിയിരുന്ന നേരം
ഇത്തിരിക്കണ്ണുനീരൂറി കണ്ണിൽ.
പൊയ്പ്പോയൊരോണദിനങ്ങളുള്ളിൽ
തുമ്പപ്പൂപോലെ ചിരിച്ചുനില്പൂ
തുമ്പ ചിരിക്കാത്ത കാലമോർത്തു,
തുംഗമാം ദു:ഖം കുമിഞ്ഞു ഹൃത്തിൽ
പണ്ടു നീയെൻ്റെ തൊടിയിൽനീളേ
പൂത്തുചിരിച്ചങ്ങു നിന്നിരുന്നു
ഇന്നത്തെയീ ഓണനാളിൽപ്പോലും
നിൻ്റെ പാൽപ്പുഞ്ചിരി കാൺമതില്ലാ.
എങ്ങോട്ടു പോയ് നിങ്ങളീമണ്ണിൽനി-
ന്നെങ്ങോട്ടുപോയിമറഞ്ഞിരിപ്പൂ
മാബലിമന്നൻ്റെ നാട്ടിൽ വീണ്ടും
ഓണമുണ്ണാനായണയുകില്ലേ ?
പൊയ്പ്പോയ നാളുകളോർത്തു ഞാനാ -
ത്തുമ്പച്ചെടിതന്നടുത്തിരിക്കേ ,
തുമ്പമെല്ലാം തീർന്നു ,മാനസത്തിൽ
തുമ്പികൾ പാറിക്കളിച്ചിടുന്നു
ഓണമുണ്ണാനായി വീണ്ടുമിന്നെൻ
മുറ്റത്തണഞ്ഞൊരു കുഞ്ഞുതുമ്പേ!
ഓണപ്പാട്ടൊന്നു ഞാൻ പാടിത്തരാം
ഓണവട്ടങ്ങളൊരുക്കിത്തരാം
ഈ മണ്ണിൽനിന്നു പൊയ്പ്പോയിടല്ലേ,
മാബലിത്തമ്പുരാൻ വാണനാട്
ജാതിഭേദങ്ങൾ മറന്നു ഞങ്ങൾ
ഓണമൊരുക്കിടും നല്ല നാട്.
സുഷമ അമ്മങ്കോട്.
05- O9 -2016

DON'T MISS

Nature, Health, Fitness
© all rights reserved
made with by templateszoo